Kurdî  ■  كوردی  ■  عربي
MON, 5 JUN 2023 19:51 Erbil, GMT +3
پارتی دیموکراتی کوردستان
ئازادی . دیموکراسی . دادپەروەری
 

مەستی خەونی ڕووخان
| KDP.info


زكری موسا

زەنگی داڕووخانی هەرێم لێدرا... گورزێكی تر بە هەرێم كەوت... ئابووریی سەربەخۆ كۆتایی هات... هەرێمی كوردستان لە لێواری كەوتن دایە... هەرێم هەڵدەوەشێتەوە... هەرێم نامێنێ... ئەم مانشێتانە بەشێكن لەو شەڕە ڕاگەیاندن و دەروونیانەی بە لێشاو و بە شێوەیەكی مونەزەم، ڕۆژانە لە دژی دانیشتوانی هەرێمی كوردستان و دامەزراوەكانی بەڕێوە دەچێت. ڕۆژانە زەین و هۆشی خەڵك بە هەواڵی ساختە و گرژ و بێمانا بۆردومان دەكرێن و یاری بە باری دەروونیی كۆمەڵگە دەکرێت. جێگەی هەڵوەستەكردنیشە ئەم شەڕ و ئەم دەنگە شوومانە لە لایەن دوژمن و داگیركارانەوە نایەت بەڵكو لە گەرووی دامودەزگەی ئیعلامی و سۆشیاڵمیدیای ئەو لایەن و حزبە كوردیانەوە دێت كە خۆیان بە ئۆپۆزیسیۆن دەزانن و ملیۆنان دۆلاری لێ سەرفكراوە و هەزاران كادیری بۆ تەیار كراوە.

ڕاستیتان دەوێ هیچ یەك لە نەیارە دەرەكییەكانی هەرێم ئەو جورئەتەیان نەبووە ڕێگە بە خۆیان بدەن، باس لە نەهێشتن و لەناوبردن و ڕووخانی هەرێم بكەن. كەچی ئەوانە بە هەناسەیەكی سارد و بە دڵخۆشییەوە ڕۆژانە مەستی خەونی ڕووخانی هەرێمەکەیانن و وەك موژدەیەك دەیڵێنەوە و دەیڵێنەوە. ئەو تەماح و دڵخۆشییە بۆ (ڕووخاندنی خود)ـە، چاوگەكەی تەنیا ڕقلێبوونەوە لە بزووتنەوەی ڕزگاریخوازی كورد یان پارتی نییە، كردەوەیەكی تەندروستی سیاسی و ڕۆژنامەوانیش نییە و لە زانایی و مەعریفە و ڕۆشنگەرییشەوە سەرچاوە ناگرێت، بەڵكوو جۆرێکە لە پەرێشانی و دیاردەیەكی سەدلەسەد دژەكولتوورییە كە دەبێ دیراسە بكرێت و هۆكارەكانی بدۆزرێنەوە و چارەسەر بكرێن.

ئایا تینوویەتی بۆ گرتنەدەستی دەستەڵات ئەوە دەهێنێت كە تۆ ئامادە بیت یاری بە هەبوو و نەبوو و خاك و سەرزەمین و مێژوو و ئێستا و ئاییندەی وڵاتت بكەی و چەپڵە بۆ داڕووخان لێ بدەی؟  سرووشتیە خەڵك هەبێت حەزی لە دەستەڵات بێت و هەوڵی بۆ بدات و ببێتە ئۆپۆزیسیۆن، بەڵام ئۆپۆزیسیۆنبوونیش ئسووڵی خۆی هەیە. تەنانەت ڕقڵێبوونەوە و دوژمنبوونیش فۆڕمۆڵ و پڕەنسیپ و ڕێوشوێنی خۆی هەیە. لە هیچ كامێك لەم شێوازانەدا شەیدایی بۆ ڕووخان و هەڵوەشانەوە و كەوتنی وڵات بوونی نییە. 

ئۆپۆزیسیۆن كێیە و چییە؟ پێناسەی ئۆپۆزیسیۆن بریتییە لەو لایەنانەی لە هەوڵی ئەوەدان دەستەڵات بگرنە دەست و ببنە ئەلتەرناتیڤی دەستەڵات. ئەم هەوڵدانە یان لە ڕێگەی بەشداریكردنە لە هەڵبژاردن و لەڕێی میكانیزمە دیموكراتییەكان ئەنجام دەدرێت كە تێیدا ئۆپۆزیسیۆن بەشێكە لە سیستەمی سیاسیی وڵات، یانیش لە ڕێگەی تر كە ئۆپۆزیسیۆن لە دەرەوەی سیستمەی سیاسی بە پشتبەستن بە چەك هەوڵی گۆڕینی دەستەڵات دەدات. لە سەردەمی ئێستاكەدا مۆدیلی ئۆپۆزیسیۆنبوون لە ڕێگەی چەك و توندوتیژی كڕیاری نییە و زۆر باوی نەماوە. بەڵام ڕاستییەك هەیە كە لە هەموو حاڵەتێكدا ئۆپۆزیسیۆن چ شەڕخواز بێت یان دیموكراتی، باوەڕی پتەوی بە خاك و خەڵك و سەروەریی و هەبوو و نەبووی وڵاتەكەی هەیە و هەرگیز ئارەزووی ڕووخان و هەڵوەشانەوە و نەمانی ناكات.

هەرێمی كوردستان موڵكی تاك تاكی هاووڵاتیانی هەرێمی كوردستان و لایەنە سیاسییەكان و دەستەڵات و ئۆپۆزیسیۆنە و دەبێ بە هاوكاری و هەماهەنگیی هەموو لایەك بپارێزرێت و بەهێز بكرێت و كەموكوڕییەكانی چارەسەر بكرێن. ئەمە نەخشەڕێگەی دروستی كاركردنە بۆ بەرژەوەندیی وڵات و نەوەكانی داهاتوو. بەڵام دڵخۆشی و شەیدایی بۆ ڕووخان و هەڵوەشانەوە، نە بوێرییە نە زانایی و نە شانازی، بەڵكو سەرلێشێوانێكی موتڵەقە و جێگەی بەزەییە.

 




دوایین هەواڵەکان

پرسەنامەیەک لە سەرۆکی حکومەتی هەرێمی کوردستانەوە

MONDAY, 05 JUNE 2023 18:06:31

بە داخەوە هەواڵی کۆچی دوایی کەسایەتیی ناسراوی کلدانی شاری شەقڵاوە خوالێخۆشبوو قەشە فرانسیس جوبرائیل شێر-م پێگەیشت. پرسە و سەرەخۆشی لە سەرۆکایەتی کەنیسەی کلدانی ومەتڕانی ئیبارشیەی هەولێر وبنەماڵە بەڕێزەکەی و کەس و کار و ئاشنایانی و خوشک و برایانی کریستیانی شەقڵاوە دەکەم و هاوخەمیانم. خوای مەزن گیانی بە بەهەشت شاد بکات و ئارامی و دڵنەوایی بە هەمووان ببەخشێت.

 

شەوکەوت بەربھاری: ھاتوچۆی ھاووڵاتیان و گەشتیاران لە دەروازەی پێشابوور ئاسایی بووەتەوە

MONDAY, 05 JUNE 2023 16:06:25

دوای 25 ڕۆژ لە داخستنی، ئەمڕۆ دووشەممە دەروازەی پێشابوور کرایەوە و بەڕێوەبەری دەروازەکەش دەڵێ، ھاتوچۆی ھاووڵاتیان و بارزگانی وەک پێشتر لە پێشابوور ئاسایی بووەتەوە.

 

بە گوژمەی 25 ملیار دینار پرۆژە لە سێکتەری ئاو جێبەجێ دەکرێن

MONDAY, 05 JUNE 2023 16:06:27

هەولێر -KDP.info- بەڕێوەبەری ئاوی هەرێمی کوردستان گوتی، ئەمساڵ بەراورد بە ساڵی ڕابردوو کێشەکانی ئاو کەمتر بوون و حکوومەتی هەرێمی کوردستان 25 ملیار دیناری بۆ تەرخان کردووین و ئێستا دەکرێتە پرۆژە و لە هەرێمی کوردستان جێبەجێ دەکرێن، کە بەشێک لە پرۆژەکان کەوتوونەتە واری جێبەجێکردنەوە.

 
پلانی حکوومەتی هەرێمی کوردستان ئەوەیە بە بەرهەمی ناوخۆ پێداویستیی ناوخۆ پڕ بکاتەوە و هەناردەی دەرەوەشی بکات

MONDAY, 05 JUNE 2023 16:06:24

هەولێر -KDP.info- حکوومەتی هەرێمی کوردستان لەم کابینەیەدا گرنگیی تایبەت بە کەرتی کشتوکاڵ دەدات بە جۆرێک کە پێداویستیی ناوخۆ پڕ بکرێتەوە و هەناردەی دەرەوەش بکرێت، بۆ ئەو مەبەستەش هەنگاوی زۆر باش لە لایەن وەزارەتی کشتوکاڵ و حکوومەتی هەرێمی کوردستانەوە نراوە.

 

لیژنەیەکی یاسایی سەردانی ناوچە کوردستانییەکان دەکات

MONDAY, 05 JUNE 2023 15:06:00

هەولێر -KDP.info- بڕیارە لیژنەیەکی یاسایی سەردانی ناوچە کوردستانییەکانی دەرەوەی ئیدارەی حکوومەتی ھەرێمی کوردستان بکات و ڕاوێژکاری دەستەی ناوچە کوردستانییەکانیش دەڵێ، حەفتانە ڕاپۆرت لەبارەی ڕەوشی ئەو ناوچانە دەدرێت بە سەرۆکایەتیی ئەنجومەنی وەزیران.

 



 
© 2023 Kurdistan Democratic Party, KDP

Contact