دهۆك-KDP.info- رێڤه‌به‌رێ گشتى یێ چاندنێ ل پارێزگه‌ها دهۆكێ دیار كر كو ب مه‌ره‌ما گرنگیدانه‌كا پتر ب به‌رهه‌مێ ناڤخۆ نوكه سێڤا ده‌ڤه‌را به‌رواریا ل سنوورێ پارێزگه‌ها دهۆكێ ل فرۆشگه‌هێن نێڤده‌وله‌تى یێن هه‌رێما كوردستانێ دهێته فرۆتن و هه‌مى بزاڤ دهێنه‌كرن ره‌وانه‌ى ده‌رڤه‌ى وه‌لاتى ژى بهێته‌كرن.
ئه‌حمه‌د جه‌میل، رێڤه‌به‌رێ گشتى یێ چاندنێ ل پارێزگه‌ها دهۆكێ بۆ ماڵپه‌رێ فه‌رمیێ پارتى دیموكراتى كوردستان ئاشكرا كر كو ل دووڤ پشكنینا بۆ سێڤا به‌رواریا هاتیه‌كرن دیار بوویه كو ماددێن قڕكه‌ر و كیمیایى د ناڤ دا نینن و رێژا شه‌كرێ ژى 14.9، ل دووڤ ستاندارتێن جیهانى 100% یا سرۆشتیه و نوكه ل نه‌هـ فرۆشگه‌هێن نێڤده‌وله‌تى ل هه‌رێما كوردستانێ دهێته فرۆتن.
ناڤهاتى ئاماژه دا وێ چه‌ندێ كو وه‌كو د كارناما كابینا نه‌هێ یا حكومه‌تا هه‌رێما كوردستانێ دا هاتى كو دێ گرنگیه‌كا باش ب كه‌رتێ چاندنێ هێته‌دان، نوكه ئه‌ڤ چه‌نده ب كریار دهێته ئه‌نجامدان و ژ بلى ره‌وانه‌كرنا هنده‌ك ژ به‌رهه‌مێ جۆتیاران بۆ ده‌رڤه‌ى وه‌لاتى نوكه هه‌مى بزاڤ یێن دهێنه‌كرن كو سێڤا ده‌ڤه‌را به‌رواریا ره‌وانه‌ى ده‌رڤه‌ى وه‌لاتى ژى بهێته‌كرن، د هه‌مان ده‌م دا بزاڤ د به‌رده‌وامن بۆ دانانا كارگه‌هه‌كا چێكرنا دوشاڤ و شه‌ربه‌تا فێقى ل ده‌ڤه‌را ناڤهاتى بۆ وێ چه‌ندێ به‌رهه‌مێ جۆتیاران ب هه‌روه نه‌چیت و زوورترین ژمارا جۆتیاران ژ به‌رهه‌مێ خوه مفاداربن، ئه‌ڤه د ده‌مه‌كى دایه كو نوكه 104 كۆگه‌هێن هه‌لگرتنا به‌رهه‌مێ خۆمالى ل پارێزگه‌ها دهۆكێ دهێنه دروستكرن.
رێوار محه‌مه‌د ره‌شید