Kurdî  ■  كوردی  ■  عربي
WED, 28 SEP 2022 00:12 Erbil, GMT +3
پارتی دیموکراتی کوردستان
نوێبوونەوە . دادپەروەری . پێکەوەژیان
 

بەیاننامەی مەکتەبی سیاسیی پارتی دیموکراتی کوردستان بە بۆنەی (٧٦) حەفتاوشەشەمین ساڵیادی دامەزراندنی پارتی دیموکراتی کوردستان
| KDP.info


ھەولێر-KDP.info- ھاوڵاتییانی ئازیزی کوردستان خانەوادەی سەربەرزی شەھیدان و پێشمەرگە قارەمانەکانی کوردستان کادیر و ئەندام و دۆست و ھەوادارە قەدرگرانەکانی پارتی دیموکراتی کوردستان ئەمڕۆ شازدەی ئابە، ڕۆژە مەزن و پڕشنگدار و بەرھەمدارەکەی گەلەکەمان، کە تیایدا پارتی دیموکراتی کوردستان دامەزرا و لە ھەمان ڕۆژیشدا ڕێزدار سەرۆک مەسعود بارزانی لەدایکبوو و چاوی بە ژیان و خەبات ھەڵێنا، دەستپێک بە دڵێکی پڕ لە ھیواوە، ھیوا بەرەو ئاییندەیەکی گەشتر، پیرۆزبایی لە رۆڵەکانی گەل، ڕێزدار سەرۆک بارزانی، نیشتیمانپەروەر و ئازادیخوازان دەکەین.

لە شازدەی ئابی ساڵی ١٩٤٦، لە نێو تاریکی زوڵم و ڕۆژگاری پڕ لە ستەمی ئەوکات و لە وەرچەرخانێکی مێژووییدا، پارتی دیموکراتی کوردستان دامەزرا و سەرکێشیی خەباتێکی نەپساوەی لە پێناو ئازادی گەل و خاک و نیشتیمان وەئەستۆ گرت و لەو ساوە تا ئێستا، واتە (٧٦) حەفتاوشەش ساڵە، دەستەویەخە لە سەنگەری پێشەوەی قوربانیدانە و بۆتە ناسنامەی کوردایەتی و قۆناغ دوای قۆناغ، بە پێی ھەلومەرج و دەرفەتەکان دەستکەوتگەلێکی فرەلایەنی بۆ گەلی کوردستان وەدەستھێناوە، کە ئەمڕۆ بە شانازییەوە یادیان دەکەینەوە، لەوانە:

چارەسەرکردنی گرێی سایکۆلۆژیی ژێردەستی و دروستکردنی ھیوا بۆ ڕۆڵەکانی گەل؛ ھەڵگیرساندنی شۆڕشی مەزنی ئەیلول و قوربانییەکانی و رێککەوتننامەی یازدەی ئادار؛ چۆکدادان بە پیلانی شوومی جەزائیر و شکاندنی نسکۆ و ھەڵگیرساندنی شۆڕشی گوڵانی نیشتیمانی، کە بۆ ئەوکات و ئێستایش پڕە لە ھێز و ھیوا و ھەستانەوەی نەتەوەییانە و نیشتیمانییانە؛ داڕشتنی پلان و نەخشەی حەکیمانەی ڕاپەڕینی ئاداری ساڵی ١٩٩١ و ڕابەرایەتیکردنی بەرەی کوردستانی لەلایەن ڕێزدار سەرۆک مەسعود بارزانی و دواتر خاوەندارییەتیی یەکەم مانیفێستی ھەڵبژاردنی دیموکراسییانەی گەل، کە سەرۆک مەسعود بارزانی لە وتارە مێژووییەکەیدا لە ڕۆژی ٢٢ ی ئاداری ساڵی ١٩٩١ لە شاری کۆیە پێشکەشی کرد؛ شکاندنی سوپای ڕژێمی بەعس لە دوای کۆڕه‌وە ملیۆنییەکە؛ بەشداریکردنی لە دامەزراندنی ئەزموونی یەکەمین پەرلەمان و حکومەتی ھەرێمی کوردستان و سەرپێخستنی دامەزراوەکانی تری کوردستان و بڕیاری فیدرالیەت؛ بەشداریی کارای لە پرۆسەی ڕوخاندنی ڕژێمی بەعس و پرۆسەی بنیاتنانەوەی عێراقی نوێ و نووسینەوەی دەستووری عێراق؛ ڕووبەڕووبوونەوەی مەردانەی ڕێکخراوی تیرۆریستی داعش و، تاجی دەستکەوتەکانیش ڕیفراندۆمی سەربەخۆیی بوو، کە تا ھەتایە مایەی شانازیی نیشتیمانپەروەرانی کوردستانەو، وەک ئەستێرە بە ئاسمانی کوردستانەوە دەدرەوشێتەوە.

جەماوەری ئازیزی کوردستان پارتی دیموکراتی کوردستان، بە سوودوەرگرتن لە جیھانبینیی(مستەفا بارزانی)ی ڕابەری نەتەوە و دامەزرێنەری پارتی، لە ڕۆژی گەشی دامەزراندنییەوە تا ئێستا خەبات دەکات لە پێناو ئاشتی، ئازادی، دیموکراسی، پێکەوەژیانی ئایینی و نەتەوەیی و سیاسی و، ھەروەسا کار دەکات لە پێناو پێشکەوتنی کۆمەڵایەتی و بووژانەوەی ئابووری و گەشەکردنی کولتووری و فەراھەمکردنی باشترین ژیان بۆ ھاوڵاتییان، پێخەمەت ئەو ئارمانجانەیش بەردەوام لەگەڵ حکومەتی ھەرێمی کوردستان و حکومەتی فیدراڵی عێراق لە کار و کۆششدایە بۆ کوردستانێکی بەھێز و ژیانێکی باشتر.

ھاوڵاتییانی خۆشەویست کادیر و ئەندام و دۆست و ھەوادارانی ھێژای پارتی دیموکراتی کوردستان لە کاتێکدا کە ئەم یادە شکۆدارە بەرز و پیرۆز ڕادەگرین، ناوچەکە و عێراق و کوردستان بە قۆناغێکی ھەستیار و پڕ ئەرکدا تێدەپەڕێت، گرفتە سیاسی و ئابوورییەکان تا دێ ھەڵدەکشێن، بۆیە دەبێ ھەموومان ڕووەو چارەسەر ھەنگاو بنێین، بەرژەوەندییە باڵاکان ببینین و لە پەنجەرە گەورەکەوە سەیری ئەرکە ھەنووکەیی و ھەمیشەییەکان بکەین، پارتی دیموکراتی کوردستان وەک ھەمیشە، ڕووی لە ئاشتی، چارەسەر، یەکریزیی نێوخۆییدایە و، لەگەڵ بەغدایش دەستووری هەمیشەیی عێراق و رێککەوتن و سازان بە بنەمای چارەسەر دەزانێت و لەو پێناوەشدا ماندوو نابێ و ھەموو ھەوڵە سیاسی و دیبلۆماسییەکانی خۆی دەخاتەوە گەڕ و شێلگیرانە لەو پێناوەدا خەبات دەکات.

لەم یادە پیرۆزەدا دروود بۆ گیانی شەھیدانی کوردستان دەنێرین، ئەو شەھیدە سەربەرزانەی بە خوێنی ئاڵی خۆیان کوردستانیان لە بەرزیدا ھێشتەوە، بە سەری بەرزەوە لە باڵای پڕ ئیفتیخاری پێشمەرگە قارەمانەکانی کوردستان دەڕوانین و سڵاوی شانازییان بۆ دەنێرین.

دەرفەتێکی زێڕینە سوپاسی دڵسۆزی و لەخۆبردوویی و ئەمەکداریی سەرکردایەتی و کادیر و ئەندام و دۆست و ھەوادارانی پارتی دیموکراتی کوردستان بکەین، کە لە سەختیدا پێشمەرگە و لە ئاشتیدا چرا و لە کاتی ھەڵبژاردندا دەنگی مسۆگەری سەرکەوتنن و ئیرادە بۆ نەوەکان دەگوازنەوە. سەرکەوتن بۆ گەلی کوردستان، بۆ پارتی دیموکراتی کوردستان، کە لە پێناو گەلی کوردستان و وەدیھێنانی ئاوات و خەونە لە مێژینەکانی دامەزراوە.

شکۆدار بێت (١٦ ی ئاب)، ڕۆژە مەزن و پڕشنگدار و بەرھەمدارەکەی گەلی کوردستان.

مەکتەبی سیاسیی پارتی دیموکراتی کوردستان




دوایین هەواڵەکان

سەرۆکی حكومەت سەردانی جووتیارێکی نموونەیی لە پارێزگای دهۆک دەکات

TUESDAY, 27 SEPTEMBER 2022 20:09:15

ئەمڕۆ سێشەممە 27ی ئەیلوول، مەسرور بارزانی سەرۆکی حکومەتی هەرێمی کوردستان، سەردانی جووتیار محەمەد سەلیم بەربهاری لە گوندی بەربهار کرد لە پارێزگای دهۆک، کە یەکێکە لە جووتیارە نموونەییەکانی دەڤەرەکە و پێش دوو ڕۆژ داوای لە جەنابی سەرۆک بارزانی کردبوو ھاوکاری زیاتری جووتیاران بکرێت .

 
سەرۆکی حکومەت لە گەڵ ژمارەیەک لە وەبەرهێنەر و خاوەنکارانی سنووری ئیدارەی سەربەخۆی زاخۆ کۆدەبێتەوە

TUESDAY, 27 SEPTEMBER 2022 18:09:38

ئەمڕۆ سێشەممە 27 ی ئەیلوول ، مەسرور بارزانی سەرۆکی حکومەتی هەرێمی کوردستان، لە شاری زاخۆ، لە گەڵ ژمارەیەک لە وەبەرهێنەر و خاوەنکارانی سنووری ئیدارەی سەربەخۆی زاخۆ کۆبووەوە.

 
ژمارەیەک ئەفسەری پێشمەرگە خانەنشین دەکرێن

TUESDAY, 27 SEPTEMBER 2022 15:09:37

هەولێر -KDP.info- دوای ڕێکارە یاسایی و سەربازییەکان بە فەرمانی سەرۆکی حکوومەتی ھەرێمی کوردستان زیاتر لە دوو ھەزار ئەفسەری ھێزەکانی پێشمەرگە خانەنشین کران و سەرچاوەیەکیش ئاشکرای کرد، ئەو ئەفسەرانەی خانەنشین کراون بەپێی یاسا بووە.

 

نووسینگەی کوردانی فەیلی بووەتە چەترێک بۆ کۆکردنەوەی کوردانی فەیلی و چارەسەرکردنی کێشەکانیان

TUESDAY, 27 SEPTEMBER 2022 15:09:37

هەولێر -KDP.info- بەرپرسی نووسینگەی کوردانی فەیلی سەر بە بارەگای بارزانی گوتی، نووسینگەی کوردانی فەیلی سەر بە بارەگای بارزانی بووەتە چەترێک بۆ کۆکردنەوەی کوردانی فەیلی لە عێراق و چارەسەرکردنی کێشەکانیان، کە لە عێراق دوو ملیۆن کوردی فەیلی هەیە و هەوڵ دەدرێت ناسنامەش بۆ ئەوانە بگەڕێتەوە کە ناسنامەیان لێ وەرگیراوەتەوە.

 

دادگای فیدراڵیی عێراق دانی بە کۆمسیۆنی هەڵبژاردنی هەرێمدا ناوە و بە یاسایی لەقەڵەمی داوە

TUESDAY, 27 SEPTEMBER 2022 15:09:38

هەولێر -KDP.info- سەرۆکی کۆمسیۆنی بالای سەربەخۆی هەڵبژاردن و ڕاپرسیی هەرێمی کوردستان گوتی، ئەو بڕیارەی دادگای فیدراڵی لەبارەی کۆمسیۆن داویەتی، زۆر باشە و لە بەرژەوەندیی هەرێمی کوردستاندایە، چونکە دان بە کۆمسیۆندا نراوە و بە یاسایی لەقەڵەم دراوە و هەموو دەسەڵاتەکانیشی وەکوو خۆی ماوە.

 



 
© 2022 Kurdistan Democratic Party, KDP

Contact