دھۆک -KDP.info- رێڤەبەرێ شینواران ل پارێزگەھا دھۆکێ دیار کر کو حکومەتا ئەمریکا ٥٠٠ ھزار دۆلار بۆ نوژەنکرنا کنیشتا (حزقیال) ل گوندێ شوش ل سنوورێ قەزا ئاکرێ یا سەر ب پارێزگەھا دھۆکێ ڤە تەرخانکرن.
د.بێکەس بریفکانی، رێڤەبەرێ شوونواران ل پارێزگەھا دھۆکێ بۆ مالپەرێ فەرمیێ پارتی دیموکراتی کوردستان دیار کر کو پشتی بزاڤێن وان یێن بەردەوام دگەل قۆنسلخانا ئەمریکا ل ھەرێما کوردستانێ و رێکخراوا ARCH بۆ نووژەنکرنا جھێن شوونواری یێن پارێزگەھا دھۆکێ، حکومەتا ئەمریکا ٥٠٠ ھزار دۆلار بۆ نوژەنکرنا کنیشتا (حزقیال) ل گوندێ شوش ل سنوورێ قەزا ئاکرێ یا سەر ب پارێزگەھا دھۆکێ ڤە تەرخانکرن و گۆت: "گوندێ شوش ئێک ژ گوندێن کەڤنارە و گەلەک جھێن شوونواری یێن لێ ھەین و چەندین پەرستگەھێن ئایینی ژی د ناڤ ڤی گوندی دا ھەنە ژوان پەرستگەھا زەردەشتیان و کنیشت و دێر و مزگەفتێن کەڤن، ئانکو ھەر ژ کەڤن دا پێکڤەژیان د ناڤ ڤی گوندی دا ھەبوویە".
ناڤھاتی ئاماژە دا وێ چەندێ کو ئەڤە بۆ جارا ئێکێ نینە وەلاتێ ئەمریکا کۆژمەکێ پارەی بۆ نووژەنکرنا جھەکێ شوونواری ل پارێزگەھا دھۆکێ تەرخان دکەت، بەلکو بەری نوکە ژی وەلاتێ ناڤھاتی ملیۆنەک و ٥٠٠ ھزار دۆلار بۆ نووژەنکرنا پەرستگەھا لالش ل قەزا شێخان و ئێک ملیۆن دۆلار بۆ نووژەنکرنا مەزارگەھی (ناحوم پێغەمبەر) ل ئەلقوش و ٥٠٠ ھزار دۆلار بۆ نووژەنکرنا دەرگەھێ بادینان ل قەزا ئامێدیێ یا سەر ب پارێزگەھا دھۆکێ ڤە تەرخانکربوون.
رێوار محەمەد رەشید