Kurdî  ■  كوردی  ■  عربي
TUE, 27 SEP 2022 23:47 Erbil, GMT +3
پارتی دیموکراتی کوردستان
نوێبوونەوە . دادپەروەری . پێکەوەژیان
 

مەسروور بارزانی: دانیشتوانی قارەمان ئیدارەی سەربەخۆی سۆرانتان لێ پیرۆز بێت
| KDP.info


سۆران-KDP.info- سەرۆکی حکوومەتی هەرێمی کوردستان رایدەگەیەنێت، راگەیاندنی ئیدارەی سەربەخۆی سۆران جێبەجێکردنی بەڵێنی سەرۆک بارزانییە بە خەڵکی سنوورەکە.

ئەمڕۆ سێشەممە مەسروور بارزانی، سەرۆکی حکوومەتی هەرێمی کوردستان لە وتارێکدا لە رێوڕەسمی راگەیاندنی ئیدارەی سەربەخۆی سۆران، رایگەیاند: وەک وەفادارییەك بۆ خەبات و تێكۆشانی خەڵکی سنووری سۆران، ”هاتوینەتە خزمەتیان بۆ راگەیاندنی ئیدارەی سەربەخۆی ئەم دەڤەرە.

دەقی وتارەکەی مەسروور بارزانی:

بەناوی خوای گەورە و میهرەبان

خوشك و برایانی بەرێز

ئامادەبوانی هێژا

هاووڵاتیانی خۆشەویستی كوردستان

دانیشتوانی تێكۆشەر و قارەمانی دەڤەری سۆران

ئیدارەی سەربەخۆی سۆرانتان لێ پیرۆز بێت

خۆشحاڵم كە ئەمڕۆ لێرە لەگەڵ ئێوە ئامادەین بۆ راگەیاندنی ئیدارەی سەربەخۆی سۆرران كە لە هەر چوار قەزای سۆران و رەواندز و چۆمان و مێرگەسۆر پێكدێت. خەڵكی ناوچەكانی سۆران و باڵەكایەتی و بارزان كە خەڵكی ئەم ناوچە تێكۆشەرەن، سەرەڕای ئەم هەموو قوربانی و زەحمەت و ئازارەی بینیویانە، ئەمڕۆ دەبینن ئێمە وەك وەفادارییەك بۆ خەبات و تێكۆشانیان هاتوینەتە خزمەتیان بۆ راگەیاندنی ئیدارەی سەربەخۆی ئەم دەڤەرە.

ئەمڕۆ رۆژێكی مێژووییە، ڕۆژی بەجێگەیاندنی بەڵێنی سەرۆك بارزانییە بۆ ئەم دەڤەرە. رۆژی وەفادارییە بەرامبەر بە خوێنی شەهیدانمان و قوربانیی پێشمەرگە قارەمانەكانمان. ڕۆژی نشاندانی سۆز و وەفایە بۆ خەڵكی ئەم دەڤەرە.

جارێكیتر پیرۆزباییتان لێ بكەم جێی خۆیەتی سەری ڕێز و نەوازش بۆ خانەوادەی سەربەرزی شەهیدان و پێزانینمان بۆ پێشمەرگە قارەمانەكان پێشكەش بكەین.

خوشك و برایانی خۆشەویست

ئەمڕۆ راگەیاندنی ئیدارەی سەربەخۆ و دەست بەكاربوونی سەرپەرشتیاری ئیدارەكە، قۆناغێكی نوێ دەست پێدەكات. ئێرە هەمیشە بنكە و پشتیوانی هەموو شۆڕشەكانی گەل و نیشتمانەكەمان بووە. قۆناغێكی نوێ دەست پێدەكات و ئایندەیەكی گەش چاوەڕێتان دەكات. ئەم دەڤەرە دەوڵەمەندە بە سرووشتێكی دڵگیر و سەرنجراكێش، بە خەڵكێكی قارەمان و خەباتێكی مێژوویی. بینیمان هەزاران شەهید لەم دەڤەرە بۆ پاراستنی كوردستان و ڕزگاریی كوردستان خۆیان كردە قوربانی.

ئەوەی لە تواناماندا بێت بەردەوام دەبین لە پشتگیریكردنی ئەم ئیدارە سەربەخۆیە كە دەتوانێ رۆتین كەم بكاتەوە و هاتوچۆی نێوان ناوچە و دەڤەرەكان كەم بكاتەوە و زۆربەی كارەكان هەر لەم دەڤەرە رایی بكرێت و فشارێكی زۆریش لەسەر هەولێر كەم بكرێتەوە، پێكەوە دەتوانین وڵاتیكی ئاوەدانتر و سەقامگیرتر بونیاد بنێین.

دەزانین ناوچە سنوورییەكانمان هێشتا گیرۆدەی ناسەقامگیرین، هەموو هەوڵێك دەدەین بۆ گەڕاندنەوەی سەقامگیری تا ئەم ناوچانە بخرێنەوە خزمەتی ئەم دەڤەرە كە لە رووی گەشتیارییەوە دەوڵەمەندە. هەروەها ئەم ناوچەیە لە رووی كانزاكانیەوە دەوڵەمەندە و پشتیوان دەبین.

ئەمڕۆ لە مانگی ئەیلوولداین كە ئەو مانگەیە گەورەترین شۆڕشی ڕزگاریخوازی گەلەكەمان تێیدا دەست بەكار بوو. ئەمڕۆ رۆژێكی مێژوویی دەبێ تا لە رووی ئیداریشەوە ئەم دەڤەرە پێشكەوتنی بەرچاو بەخۆیەوە ببینێت.

هیوادارم لە داهاتوو بەڕێوەبەرانی ئەم دەڤەرە خزمەتی زیاتری خەڵك بكەن و یاسا جێبەجێ بكەن و ڕووبەڕووی هەموو ئەو سەرپێچیكارانە ببنەوە كە لەوانەیە لەم دەڤەرەش وەك هەموو ناوچەكانیتر روویاندابێت.

من وەك خۆم و وەك كابینەكەش پشتیوانتان دەبین بۆ جێبەجێكردنی یاسای چاكسازی و دەستەبەركردنی ئایندەیەكی گەشتر.

ئەم ناوچە دڵگیر و خۆشەی دەیبنن دەتوانێت ببێتە ناوچەیەكی گەشتیاری نەك تەنیا بۆ هەرێمی كوردستان و عێراق، بەڵكوو بۆ هەموو ناوچەكە، دەمانەوی لە هەموو ڕوێكەوە خۆمان پێبگەیەنین، لە رووی پەروەردەییەوە دەمانەوێ نەوەی داهاتوو خۆی بە زانست دەوڵەمەند بكات تا بتوانین ئایندەیەكی باشتر دەستەبەر بكەین.

قۆناغی سبەی لەمرۆوە دەست پێدەكات.

ئێمە بەڵێنی ئەوەمان داوە كە دەسەڵات شۆڕ بكرێتەوە بۆ پارێزگاكان و ئیدارە سەربەخۆكان. دەبینن ئەم هەنگاوانەمان دەست پێكردووە و كەوتۆتە كار. هیوادارین بەرپرسە بەڕێزەكان لەم ئاستە بتوانن زیاتر خزمەتی هاووڵاتیان بكەن و ئەوەی شایستەی هاووڵاتییە جێبەجێی بكەن.

بەڕێزان هەروەك دەزانن لە هەڵمەتی هەڵبژاردنیشین كە بۆ نوێنەرانی ئەنجوومەنی نوێنەرانی عێراقە. ئەم هەڵمەتە پێویستە بۆ ئەوە بێت كە ئێمە بتوانین باشترین نوێنەر كە داكۆكی لە مافەكانی خەڵكی كوردستان بكات، بۆ بەغدا بنێرین تاوەكوو لەوێوە پشتیوان بێت بۆ دەستەبەركردنی هەموو مافەكانی خەڵكی ئێمە.

ئەو نوێنەرانەی دەستنیشان دەكرێن پێویستە بەبی جیاوازی نوێنەرایەتیی هەموو كوردستان بكەن.

هیوادارم لە هەڵمەتی هەڵبژاردن، لە جیاتی پەلاماردانی یەكتر و یەكتر شكاندن، هەوڵبدرێت هەریەك بەرنامەی خۆی پێشكەش بە خەڵك بكات، ئەوەی هیچی لە هەگبەدا نەمابێت بە پەلاماردانی لایەنەكانیتر ناتوانێت هیچ بكات، توانای جێبەجێكردنی بەرنامەكەشی نابێت ئەگەر خۆی بەرنامەی چاكسازی و خزمەتكردنی هاووڵاتیان پێشكەش بكات.

لە هەموو قۆناغێكدا هەوڵمانداوە ئەو بەڵێنانە بە خەڵك بدەین كە دەتوانین جێبەجێی بكەین. داوا لە هەموو لایەنە سیاسییەكان و بەربژێرەكان دەكەم هەوڵبدەن كێبڕكێ لەسەر چۆنیەتیی خزمەتكردنی وڵات و خەڵكەكەیان بكەن.

 

جارێكیتر پیرۆزبایی ئیدارەی سەربەخۆ لە خەڵكی ئەم دەڤەرە دەكەم هیوادارم هەمووتان سەركەوتوو بن ئیشەلا لە ئایندەیەكی نزیكدا دەبینین پێشكەوتنی بەرچاو بەدەست هاتووە و ئێمەش لە حكوومەت پشتیوانتان دەبین، هەر سەركەوتوو دەبن.

خۆشتان بپارێزن چونكە هێشتا پەتای كۆرۆنا كۆتایی نەهاتووە، ڕێنماییە تەندروستییەكان جێبەجێ بكەن، بە لەشێكی تەندروست دەتوانن وڵاتێكی تەندروست بونیاد بنێن.

 

دووبارە پیرۆزە، هەر سەركەوتوو بن و كوردستانیشمان هەر ئاوەدان بێت.




دوایین هەواڵەکان

سەرۆکی حكومەت سەردانی جووتیارێکی نموونەیی لە پارێزگای دهۆک دەکات

TUESDAY, 27 SEPTEMBER 2022 20:09:15

ئەمڕۆ سێشەممە 27ی ئەیلوول، مەسرور بارزانی سەرۆکی حکومەتی هەرێمی کوردستان، سەردانی جووتیار محەمەد سەلیم بەربهاری لە گوندی بەربهار کرد لە پارێزگای دهۆک، کە یەکێکە لە جووتیارە نموونەییەکانی دەڤەرەکە و پێش دوو ڕۆژ داوای لە جەنابی سەرۆک بارزانی کردبوو ھاوکاری زیاتری جووتیاران بکرێت .

 
سەرۆکی حکومەت لە گەڵ ژمارەیەک لە وەبەرهێنەر و خاوەنکارانی سنووری ئیدارەی سەربەخۆی زاخۆ کۆدەبێتەوە

TUESDAY, 27 SEPTEMBER 2022 18:09:38

ئەمڕۆ سێشەممە 27 ی ئەیلوول ، مەسرور بارزانی سەرۆکی حکومەتی هەرێمی کوردستان، لە شاری زاخۆ، لە گەڵ ژمارەیەک لە وەبەرهێنەر و خاوەنکارانی سنووری ئیدارەی سەربەخۆی زاخۆ کۆبووەوە.

 
ژمارەیەک ئەفسەری پێشمەرگە خانەنشین دەکرێن

TUESDAY, 27 SEPTEMBER 2022 15:09:37

هەولێر -KDP.info- دوای ڕێکارە یاسایی و سەربازییەکان بە فەرمانی سەرۆکی حکوومەتی ھەرێمی کوردستان زیاتر لە دوو ھەزار ئەفسەری ھێزەکانی پێشمەرگە خانەنشین کران و سەرچاوەیەکیش ئاشکرای کرد، ئەو ئەفسەرانەی خانەنشین کراون بەپێی یاسا بووە.

 

نووسینگەی کوردانی فەیلی بووەتە چەترێک بۆ کۆکردنەوەی کوردانی فەیلی و چارەسەرکردنی کێشەکانیان

TUESDAY, 27 SEPTEMBER 2022 15:09:37

هەولێر -KDP.info- بەرپرسی نووسینگەی کوردانی فەیلی سەر بە بارەگای بارزانی گوتی، نووسینگەی کوردانی فەیلی سەر بە بارەگای بارزانی بووەتە چەترێک بۆ کۆکردنەوەی کوردانی فەیلی لە عێراق و چارەسەرکردنی کێشەکانیان، کە لە عێراق دوو ملیۆن کوردی فەیلی هەیە و هەوڵ دەدرێت ناسنامەش بۆ ئەوانە بگەڕێتەوە کە ناسنامەیان لێ وەرگیراوەتەوە.

 

دادگای فیدراڵیی عێراق دانی بە کۆمسیۆنی هەڵبژاردنی هەرێمدا ناوە و بە یاسایی لەقەڵەمی داوە

TUESDAY, 27 SEPTEMBER 2022 15:09:38

هەولێر -KDP.info- سەرۆکی کۆمسیۆنی بالای سەربەخۆی هەڵبژاردن و ڕاپرسیی هەرێمی کوردستان گوتی، ئەو بڕیارەی دادگای فیدراڵی لەبارەی کۆمسیۆن داویەتی، زۆر باشە و لە بەرژەوەندیی هەرێمی کوردستاندایە، چونکە دان بە کۆمسیۆندا نراوە و بە یاسایی لەقەڵەم دراوە و هەموو دەسەڵاتەکانیشی وەکوو خۆی ماوە.

 



 
© 2022 Kurdistan Democratic Party, KDP

Contact