Kurdî  ■  كوردی  ■  عربي
WED, 28 JUL 2021 16:20 Erbil, GMT +3
پارتی دیموکراتی کوردستان
نوێبوونەوە . دادپەروەری . پێکەوەژیان
 

ناوچەكە و گەڕانەوەی باڵانسی ھێز لە نێوان جەمسەرە جیاوازەكاندا
| KDP.info


محەمەد عەلی

لە دوای ٢٠٠٣ و دەستپێكردنی بەھاری عەرەبی و گۆڕینی زۆرێك لە حكوومەتەكان لە وڵاتانی عەرەبی، دۆخێك هاتە كایەوە، كە كاریگەرییەكی تەواوی لەسەر گۆرینی باڵانسی ھێز لە ناوچەكەدا ھەبوو، بە جۆرێك لە بەرامبەر لاوازبوونی ڕۆڵی وڵاتانی عەرەبی، ھەژموونی ئێران و دواتر توركیا بە تەواوی فراوان بوو، بەڵام ئێستا خەریكە ھاوكێشەكان بەو ئاراستەیەدا دەگۆڕێن، كە ھەمووان بگەڕێنەوە بۆ ھەمان قاڵبی پێشووتری خۆیان.

لە ماوەی ڕابردوودا، وڵاتانی عەرەبیی سووننە، زۆرترین زیانیان لە گۆڕانكارییەكانی ناوچەكەدا بەركەوت، بەڵام لە ئێستادا ھەنگاوەكانیان بە ئاراستەی گەڕانەوەیانە بۆ پێگەی پێشوویان، بە شێوەیەك، سەرەتا بە ئاراستەی ئاساییكردنەوەی پەیوەندییەكانیان لەگەڵ ئیسڕائیل ھەنگاویان نا و، دواتر گەیشتن بە لێكتێگەیشتنی ھاوبەش و نەھێشتنی گرژییەكانی نێوان وڵاتانی كەنداو و خۆیان، ئینجا كاركردن بۆ چارەسەركردنی كێشە و قەیرانە جۆربەجۆرەكانی یەكە بەیەكەی ئەو وڵاتە عەرەبیانەی  ڕووبەڕووی شەڕ و دەستێوەردانی فراوانی وڵاتانی ھەرێمی و نێودەڵەتی بوونەتەوە، ئەمەش دەكرێت وەك سەرەتایەك  ھەژمار بكەین بۆ كەمكردنەوەی ڕۆڵی ئێران و توركیا لە ناوچەكەدا. 

پڕۆژەی شامی نوێ، كە خۆی لە ھاوكاری وھەماھەنگیی سێقۆڵیی نێوان (ئوردن و میسر و عێراق)ـدا دەبینێتەوە، بە ئاراستەی پاڵپشتیی حكوومەتی عێراق و چاككردنی پەیوەندییەكانی نێوان ھەرێم و بەغدایە، كە بێگومان تێپەڕاندنی یاسای بودجەش لە پەرلەمان، بۆ ھەمان مەبەستە، هەروەها ئەمەریكاش لەم بارەیەوە تەواو پاڵپشتیی ئەم ھەنگاوانە دەكات، ئەوەتا پێشنیازی ژووری بازرگانی ئەمەریكی- عێراقی، بە مەبەستی سوودوەرگرتن لە غازی سرووشتیی ھەرێم بۆ پڕكردنەوەی پێداویستییەكانی عێراق و فرۆشتنی نەوت لە ڕێگەی بۆریی نەوتی ئوردن - میسر لە بەرامبەر وەبەرھێنانی كۆمپانیاكانیان لە عێراق، ھەژموونی ئێران و توركیا تەواو لەسەر بەغدا  كەم دەكاتەوە، ئەمە سەرباری ئەوەی ڕۆڵێكی باشی لە گێڕانەوەی پێگەی بەغدا لەسەر ئاستی سیاسی و ئابووریدا دەبێت.

ڕۆڵی سعوودیەش زۆر كاریگەرە لەم ھەنگاوانەدا، كە ھاوكار بووە بۆ بەرزبوونەوەی نرخی نەوت و ئەمەش كاریگەریی ڕاستەوخۆی لەسەر ساڕێژبوونی برینە ئابوورییەكانی وڵاتانی عەرەبی بە گشتی دەبێت، ھاوكات ڕاگەیاندنی ئاگربەست لە یەمەن، ھەنگاوێكی ترە بەرەو ئاساییكردنەوەی دۆخی سیاسی و ئەمنیی ناوچەكە و دەكرێ بە ھەوڵێكیش ھەژمار بكرێت بۆ دوورخستنەوەی حوسییەكان لە ھەژموونی ئێران، سەردانی سەرۆكوەزیر (مستەفا كازمی)ـیش بۆ سعوودیە و ئەنجامدانی چەندین گرێبەست، ھەنگاوێكی ترە بە ئاراستەی پاڵپشتیكردنی حكوومەتی نوێی عێراق، كە كاردانەوەی میلیشیا شیعەكان بە نمایشی سەربازی و ھەڕەشەكان لە سەرۆكوەزیرانی عێراق، ئەو ڕاستییە دووپات دەكاتەوە.

توركیاش باش لەم ھاوكێشە نوێیەی ڕۆژھەڵاتی ناوەڕاست گەیشتووە، لەبری زیندووكردنەوەی ئیمپراتۆرییەتی كۆن، سەرقاڵی پاراستنی پێگە كۆنەكەیەتی، بۆیە ھەموو ھەوڵێكی بۆ ئەوەیە، پەیوەندییەكانی لەگەڵ وڵاتە ئەورووپییەكان ئاسایی بكاتەوە، بە تایبەتی فەڕەنسا، ھاوكات لە سووریاش لەگەڵ ڕژێم و ڕووسیا خەریكی دانوستانە، هەروەها لە لیبیا و وڵاتانی كەنداویش، ھەژموونەكەی تەواو لە پاشەكشەدایە، لە عێراقیش لەبری فراوانخوازی، لە ئێستادا مەبەستیەتی پارێزگاری لە بەرژەوەندییەكانی بكات لە بەرامبەر فراوانبوونی ڕۆڵی وڵاتانی عەرەبیدا، كە بە دڵنیاییەوە سووننەكان بەم ئاراستەیەدا ھەنگاو دەنێن،  بە جۆرێك لە ڕابردوودا لە ڕێگەی سووننەكانەوە پێگەكەی پاراستبوو.

سەبارەت بە ئێرانیش، لە دوای ڕووخانی ڕژێمی سەددام و ڕووداوەكانی بەھاری عەرەبی، ھەژموونی ئەو وڵاتە تەواو فراوان بوو، بەڵام لە ئێستادا خەریكە دەگەڕێتەوە ھەمان قاڵبی  پێشووتری، بە تایبەتی دوای بێئومێدبوونی لە ئیدارەی نوێی ئەمەریكا و ئەورووپییەكان بە سەركردایەتیی فەڕەنسا و فەرامۆشكردنی لەلایەن ھاوپەیمانە تاكتیكییەكەی ڕووسیا، ئەوەتا ئاراستەكەی بەرەو وڵاتی (چین) گۆڕیوە و گرێبەستی ٢٥ ساڵەی بە تاكە دەروازە سەیر دەكات بۆ دەرچوون لەو گۆشەگیرییەی تێیكەوتووە، بەو ھیوایەی یارمەتیدەری بێت لە ئاساییبوونەوەی دۆخە ئابوورییەكەی، ئەمە سەرباری لاوازبوونی ڕۆڵی لە یەمەن و عێراق و لە سووریاش، كە دەكرێ بڵێین، لە سفر نزیك بووەتەوە.

 




دوایین هەواڵەکان

ئەنجومەنی وەزیران بڕیاریدا سۆران و زاخۆ بکرێن بە ئیدارەی سەربەخۆ

WEDNESDAY, 28 JULY 2021 15:07:08

ئەمڕۆ چوارشەممە 28 ی تەمموزی 2021 ئەنجومەنی وەزیرانی هەرێمی کوردستان ، بە سەرۆکایەتی مەسرور بارزانی سەرۆکی ئەنجومەنی وەزیران و ئامادەبوونی قوباد تاڵەبانی جێگری سەرۆکی ئەنجومەن ،کۆبووەوە.

 
سه‌رۆكى هه‌رێمى كوردستان پێشوازى له‌ باڵیۆزى ئیسپانیا كرد

WEDNESDAY, 28 JULY 2021 15:07:02

پاشنیوه‌ڕۆى ئه‌مڕۆ چوارشه‌ممه‌ 2021/7/28 به‌ڕێز نێچیرڤان بارزانى، سه‌رۆكى هه‌رێمى كوردستان، پێشوازى له‌ به‌ڕێز هانسى ئیسكۆبار، باڵیۆزى ئیسپانیا له‌ عیراق كرد كه‌ ئه‌ركه‌ى كۆتایى دێت.

 

سه‌رۆكى هه‌رێمى كوردستان پێشوازى له‌ باڵیۆزى توركیا كرد

WEDNESDAY, 28 JULY 2021 14:07:45

نیوه‌ڕۆى ئه‌مڕۆ چوارشه‌ممه‌ 2021/7/28 به‌ڕێز نێچیرڤان بارزانى، سه‌رۆكى هه‌رێمى كوردستان، پێشوازى له‌ به‌ڕێز ئالیڕزا گونه‌ى، باڵیۆزى تازه‌ى توركیا له‌ عیراق كرد.

 

بەیاننامەیەك لە پارتی دیموكراتی كوردستانەوە

WEDNESDAY, 28 JULY 2021 14:07:36

هەولێر-KDP.info- پارتی دیموكراتی كوردستان، بەیاننامەیەكی دەربارەی دانوستانی ستراتیژیی نێوان حكوومەتی عێراق و ویلایەتە ‌یەكگرتووەكانی ئەمەریكا سەبارەت بە بەردەوامبوونی پەیوەندی و هاوكاریی نێوان هەردوولا، بڵاو كردەوە.

 
وەزارەت: لە پلانماندایە تا كۆتایی ئەمساڵ 40%ی هاووڵاتیان بكوترێن

WEDNESDAY, 28 JULY 2021 13:07:09

هەولێر-KDP.info- راوێژكاری وەزیری تەندروستیی حكوومەتی هەرێمی كوردستان رایدەگەیەنێت، لە پلانیاندایە تا كۆتایی ئەمساڵ 40 لەسەدی هاووڵاتیانی كوردستان بە ڤاكسینی كۆرۆنا بكوترێن، لەگەڵ شاندی هەرێمی كوردستانیش لە نێو شاندی حكوومەتی عێراق، بۆ كڕینی ڤاكسین لە ئەمەریكا لەسەر هێڵن.

 


 
© 2021 Kurdistan Democratic Party, KDP

Contact