Kurdî  ■  كوردی  ■  عربي
MON, 25 JAN 2021 07:03 Erbil, GMT +3
پارتی دیموکراتی کوردستان
نوێبوونەوە . دادپەروەری . پێکەوەژیان
 

په‌یامى سەرۆکی ھەرێمی کوردستان به‌بۆنه‌ى ساڵى تازه‌وه‌
| KDP.info


ھەولێر-KDP. info-  ‌ساڵى تازه‌ له‌ هه‌موو كوردستانییان، له‌ خانه‌واده‌ى سه‌ربه‌رزى شه‌هیدان، له‌ گه‌لى عێراق و نوێنه‌رانى وڵاتان و هاوپه‌یمانان له‌ كوردستان و عێراق، هه‌روه‌ها له‌ جیهان پیرۆز ده‌كه‌م، هیوادارم له‌ ساڵى تازه‌دا كوردستان، عێراق و ته‌واوى مرۆڤایه‌تى، ناخۆشى و سه‌ختییه‌كانى ساڵى ڕابردوو، په‌تاى كۆڤید _ 19 و لێكه‌وته‌كانى جێبهێڵن و ساڵێكى پڕ له‌ ئارامى، خۆشى و سه‌قامگیرى به‌ڕێ بكه‌ن و ژیان ئاسایى ببێته‌وه‌.

ساڵى ڕابردوو هه‌رێمى كوردستانیش وه‌ك هه‌موو جیهان كه‌وته‌ به‌ر لێكه‌وته‌ سه‌خته‌كانى بڵاوبوونه‌وه‌ى ڤایرۆسى كۆرۆنا، دۆخێكى نه‌خوازراوى ته‌ندروستى، دارایى و ئابووریى سه‌خت، به‌رۆكى هه‌رێمى كوردستانى گرت كه‌ له‌ هه‌موو ڕوویه‌كه‌وه‌ بارقورسییه‌كى زۆرى خسته‌ سه‌ر شانى هاووڵاتییان. به‌ سه‌دان خانه‌واده‌ى كوردستان به‌هۆى په‌تاوه‌ ئازیزان و خۆشه‌ویستانیان له‌ ده‌ست دا، سه‌ره‌خۆشییان لێده‌كه‌م و هاوخه‌میانم.

به‌رله‌ كۆتاییى ساڵى 2020، لە پەرلەمانی عێراق هەڵسوكەوتی هێزە سیاسییە سه‌ره‌كییه‌كانى عێراق لەگەڵ هەرێمی كوردستان زۆر سته‌مكارانه‌ بوو. سیاسەتێكی پڕ لە دژایەتیكردنی هەرێمی كوردستان بوو به‌ ئامانجى پەكخستنی خزمەتگوزارییەكان و برسیكردنی خەڵكی هەرێمی كوردستان. له‌ یاسای پڕكردنەوەی كورتهێنانی داراییدا، هه‌موو هه‌وڵێكیان دا و به‌ ناوى یاساوه‌ فەرمانبەران و مووچەخۆرانی هەرێمی كوردستانیان بە هەموو شێوەیەك لە مووچه‌ و شایسته‌ دارایییه‌كان بێبەش كرد.

ئەمە دژى گیانی هاوچارەنووسی و پێكەوەژیانه‌ و هەستنەكردنە بە هیچ بەرپرسیاریه‌تییەك بەرامبەر به‌ بەشێكی فەرمانبەرانی دەوڵەتی عێراق. به‌ڕێز سه‌رۆك وه‌زیرانى عێراق و حكوومەتى فیدراڵ و هەموو دەزگا فەرمییەكانی دەوڵەتی عێراق، نەدەبووایە ئەو نادادپەروەرییە بەرامبەر به‌ فەرمانبەران و مووچەخۆران و خەڵكی هەرێمی كوردستان قبووڵ بكەن. حكوومه‌تى عێراق ده‌بێ شایسته‌ دارایییه‌كانى ساڵى 2020ى هه‌رێمى كوردستان به‌پێى ڕێككه‌وتنه‌كانى پێشوو قه‌ره‌بوو بكاته‌وه‌، هه‌وره‌ها چاوه‌ڕێین نه‌ته‌وه‌ یه‌كگرتووه‌كان، كۆمه‌ڵگه‌ى نێوده‌وڵه‌تى و هاوبه‌شانمان ڕۆڵى خۆیان له‌ چاره‌سه‌ركردنى كێشه‌كاندا بگێڕن.

پشوودرێژیی شاندی حكوومەتی هەرێمی كوردستان و مانەوە بۆ زیاتر له‌ دوو هه‌فته‌ لە بەغدا و نه‌هێشتنى هیچ به‌هانه‌یه‌ك بۆ ڕێكنه‌كه‌وتن، ئەوپەڕی نیازپاكی و ئامادەییی هەرێمی كوردستانه‌ بۆ چارەسەركردنی كێشەكان، بەڵام بەداخەوە تا ئێستا وەڵامێكی باش و كرده‌یى لەلایەن حكوومەتی فیدراڵى عێراقه‌وه‌ بۆ كەمترین مافە دارایییەكانی هەرێمی كوردستان نییه‌!

ئەوە بە هیچ شێوەیەك ئامادەیی نییە بۆ چارەسەركردنی كێشەكان لەگەڵ هەرێمی كوردستان، بەڵكو سزادانی خەڵكی كوردستانە كه‌ به‌ هیچ شێوه‌یه‌ك یاسایى و ده‌ستوورى نییه و ته‌نیا بە مەبەست و بڕیاری سیاسی ده‌كرێت. ئاماده‌یى و خواست و ویستمان بۆ گه‌یشتن به‌ چاره‌سه‌ر و ڕێككه‌وتنێكى یه‌كجاره‌كى له‌سه‌ر بنه‌ماى ده‌ستوورى عێراق دووپات ده‌كه‌ینه‌وه‌ كه‌ ماف و شایسته‌كانى گه‌لى كوردستان و سه‌قامگیرى بۆ ته‌واوى عێراق مسۆگه‌ر بكات.

لەسەر ئاستی سیاسیی هەرێمی كوردستانیش، بەداخەوە ناكۆكیی سیاسیی نێوان لایەنە سیاسییه‌كان بەردەوامە، باری ژیان و دەروونیی خەڵكی كوردستان بە شەڕێكی ئاستنزمى سۆشیاڵمیدیا خراپتر كراوە! زۆركردنی ئەو جیاوازییە سیاسییانە، هێزی سیاسیی هەرێمی كوردستان زۆر لاواز ده‌كات و دەبێتە هۆی پەرتكردنێكی گه‌وره‌ى كۆمەڵگە، ئەوەش سەقامگیریی كۆمەڵایەتی و ئاسایش لە هەرێمی كوردستان تێك دەدات و پێویستە بە زووترین كات ڕابگیرێت.

ئه‌ركى هەموو هێزە سیاسییەكانی كوردستانه‌ بیر لە پاراستنی مافەكان و قەوارەی ده‌ستوورى و سیاسیی هەرێمی كوردستان و سیستمى فیدراڵى بكەنەوە و پێكه‌وه‌ كارى بۆ بكه‌ن، لەبەرئەوەش دەبێ دەستبەجێ كۆتایی بەو ناكۆكییە سیاسییانە بهێنرێت و لەسەر چارەسەركردنی كێشەكانمان ڕێكبكەوین، سه‌رۆكایه‌تیى هه‌رێمى كوردستانیش وه‌ك هه‌میشه‌ به‌ هه‌موو شێوه‌یه‌ك هاوكار و پشتیوان ده‌بێت.

وێڕاى ده‌ربڕینى ئه‌وپه‌ڕى سوپاس و ڕێز و پێزانینمان بۆ تێگه‌یشتن و به‌رگه‌گرتن و خۆڕاگریى هاووڵاتییانى كوردستان، سوپاسى پێشمه‌رگه‌ قاره‌مانه‌كان و ته‌واوى هێزه‌ ئه‌منییه‌كان ده‌كه‌م كه‌ پارێزه‌رى كوردستانن، هه‌روه‌ها سوپاسى پزیشكان و په‌رستاران و ته‌واوى كارمه‌ندانى كه‌رتى ته‌ندروستى ده‌كه‌م كه‌ له‌ ڕیزى پێشه‌وه‌ى به‌ره‌نگاربوونه‌وه‌ى ڤایرۆسى كۆرۆنادا بوون.

هه‌رێمى كوردستان وه‌ك هه‌میشه‌ به‌ فاكته‌رێكى ئارامى و سه‌قامگیرى له‌ عێراق و ناوچه‌كه‌ ده‌مێنێته‌وه‌. له‌سه‌ر بنه‌ماى به‌رژه‌وه‌ندیى هاوبه‌ش، په‌ره‌ به‌ په‌یوه‌ندییه‌كانى له‌گه‌ڵ وڵاتانى دراوسێ و جیهان ده‌دات. له‌ هاوكارى و هه‌ماهه‌نگى له‌گه‌ڵ هاوپه‌یمانان و هاوبه‌شانمان به‌رده‌وام ده‌بێت كه‌ هێشتا له‌ عێراق و هه‌رێمى كوردستان پێویستیمان به‌ به‌رده‌وامیى ئه‌رك و پشتیوانییانه.

پێكه‌وه به‌ یه‌كڕیزى و یه‌كهه‌ڵوێستى ده‌توانین به‌سه‌ر هه‌موو سه‌ختى و قه‌یرانه‌كاندا سه‌ر بكه‌وین، شوێن و پێگه‌یه‌كى باشتر له‌ عێراق، ناوچه‌كه‌ و جیهان بگرین و ڕه‌وڕه‌وه‌ى په‌ره‌پێدان و پێشكه‌وتن له‌ وڵاته‌كه‌مان بخه‌ینه‌وه‌ گه‌ڕ. هه‌موومان له‌ كوردستان به‌ ته‌بایى، لێبورده‌یى و یه‌كترقبووڵكردن، به‌ ئومێده‌وه‌ به‌ره‌و ئاینده‌یه‌كى ڕووناك هه‌نگاو ده‌نێین.

ساڵى تازه‌ له‌ هه‌مووان پیرۆز بێت، هیواى ساڵێكى پڕ له‌ خۆشى و سه‌ركه‌وتن بۆ هه‌مووان ده‌خوازم.

نێچیرڤان بارزانى

سه‌رۆكى هه‌رێمى كوردستان

31/12/2020




دوایین هەواڵەکان

له ‌سلێمانى به‌ بڕى 100 ملیار دینار گه‌وره‌ترین کۆگاى بازرگانى دروست ده‌کرێت

SUNDAY, 24 JANUARY 2021 18:01:17

سلێمانی-KDP.info- ژوورى بازرگانى و پیشه‌سازیى سلێمانى نوێترین گه‌نجینه‌ بۆ هه‌ڵگرتنى خۆراک و پێداویستییه‌کان به‌ پێوه‌ر و ستاندارده‌ جیهانییه‌کان دروست ده‌کات و ئێستا کاری تێدا دەکرێت.‌ به‌ڕێوبه‌رى پرۆژه‌که‌ش ده‌ڵێت, پرۆژەکە یه‌کێکه‌ له‌ پرۆژه‌ ستراتیژى و گرنگه‌کانى شارى سلێمانى که‌ هاوشێوه‌ى له‌ عێراقدا نییه‌ و تاکو ئێستا هیچ پرۆژه‌یه‌کى له‌م شێوه‌یه‌ له‌ عێراق و هه‌رێمى کوردستان دروست نه‌کراوه‌ .

 

"ئەمساڵ ژمارەیەک پڕۆژەی ستراتیژی دەخرێنە بواری جێبەجێکردنەوە"

SUNDAY, 24 JANUARY 2021 18:01:42

هەولێر-KDP.info-  بڕیارە لە ماوەیەکی نزیکدا ژمارەیەک پڕۆژەی وەبەرھێنان بخرێنە بواری جێبەجێکردن و بەرپرسێکی دەستەی وەبەرھێنانیش دەڵێت، ژمارەیەک لەو پڕۆژانە ستراتیژین و بەسەر ھەرچوار پارێزگادا دابەش کراون.

 
لە پەرلەمان ھەوڵ دەدرێت بە پڕۆژەیاسایەک خزمەتی زیاتر بە پێشمەرگە دێرینەکان بکرێت

SUNDAY, 24 JANUARY 2021 17:01:30

ھەولێر-KDP.info- ئەندامی لیژنەی پێشمەرگەی پەرلەمانی کوردستان گوتی، پڕۆژەیاسایەکی تایبەت بە پێشمەرگەی دێرین لە پەرلەمانی کوردستان ھەیە کە کۆمەڵێک خاڵ لە خۆ دەگرێت و چەندین ئیمتیاز بۆ پێشمەرگەی دێرین دابین دەکات و سەرۆکی پەرلەمانیش بۆ تێپەڕاندنی پڕۆژەکە بەڵێنی داوە داوا لە سەرۆک بارزانی و لایەنەکان بکات ھاوکاریی پەرلەمان بکەن، چونکە دەستکەوتی ھەرێمی کوردستان بەرھەمی پێشمەرگە دێرینەکانە.

 

شێخ شامۆ: ئێزدییەکان ناگەڕێنەوە ژێر دەستی ھێزە ناشەرعییەکان

SUNDAY, 24 JANUARY 2021 16:01:33

دهۆک-KDP.info-  ڕاوێژکاری سەرۆکی حکوومەت بۆ کاروباری ئێزدییان، شێخ شامۆ، لە کورتە هەڤپەیڤێنێکی ماڵپەڕی فەرمیی پارتی دیموکراتی کوردستاندا باسی چەندین تەوەری گرێدراو بە ڕەوشی ئێزدییان و شنگال دەکات و دەڵێت، ئێستا لایەنە نەشەرعییەکان شنگالیان کردووەتە سەربازگە و پرۆسەی بەتەشەیوعکردن تێیدا بەردەوامە.

 

ساڵی رابردوو بە سەدان كارگە لە دھۆك دامەزراون

SUNDAY, 24 JANUARY 2021 13:01:52

دهۆك-KDP.info- ساڵی رابردوو، بە سەدان كارگە لە پارێزگای دھۆك دامەزراون و سەرۆكی ژووری پیشەسازی و بازرگانیی پارێزگای دھۆكیش دەڵێ، كارگەكان ھەزاران دەرفەتی كاریان رەخساندووە.



 
© 2020 Kurdistan Democratic Party, KDP

Contact