Kurdî  ■  كوردی  ■  عربي
MON, 6 JUL 2020 23:50 Erbil, GMT +3
پارتی دیموکراتی کوردستان
نوێبوونەوە . دادپەروەری . پێکەوەژیان
 

رێوڕەسمی سوێندخواردنی نێچیرڤان بارزانی بە "سەرۆكی دەوڵەت" دەچوو
| KDP.info


په‌روێز ره‌حیم قادر

لە ڕووی پرۆتۆكۆڵییەوە، رێوڕەسمی سوێندخواردنی نێچیرڤان بارزانی لە ١٠-٦-٢٠١٩ وەكوو سەرۆكی ھەرێمی كوردستان بە ئامادەبوونی چەندین كەسایەتی و سەركردە و باڵیۆز و نوێنەری دەوڵەت و لایەنە سیاسییەكان، زیاتر لە رێوڕەسمی فەرمیی سوێندخواردنی "سەرۆكی دەوڵەت" دەچوو، ئەمەش بۆ ھەرێمی كوردستان گرنگیی تایبەتی ھەیە.

لەلایەكی تریشەوە، بەشداریی لایەن و دەوڵەتانی پێكناكۆك وەكوو (ئێران و سعوودیە و تەنانەت توركیا) لەم رێوڕەسمەدا، نیشاندەری گرنگیی پێگەی ھەرێمی كوردستان و متمانە و دڵنیاییە بە نێچیرڤان بارزانی، كە ھەر ئەمەش وادەكات ھیوا بە چارەسەركردنی كێشە و ململانێیە ناوخۆییەكان (كوردستان و عێراقی) و پەیڕەوكردنی ستراتیژیی بێلایەنی لەنێو بارودۆخی ئاڵۆزی ناوچەیی و نێودەوڵەتی بەرزتر ببێتەوە، بۆیە ئەم مەراسیمە بە قۆناغی ھەستانەوەی ناوخۆیی و دەرەكی بۆ ھەرێمی كوردستان بە تایبەتی لەرووی دیپلۆماسییەوە دادەندرێت.

وتاری كورتی جەنابی سەرۆك مەسعوود بارزانی، جگە لە دەربڕینی پشتیوانی بۆ بەڕێز نێچیرڤان بارزانی، پەیامیك بوو بۆ لایەنە سیاسییەكانی كوردستانی و لەمەش گرنگتر ھۆشدارییەك بوو بۆ لایەنە عێراقییەكان لە بەغدا، كە ھەوڵ بدەن لەگەڵ ھەرێمی كوردستان بە رێككەوتن و جێبەجێكردنی دەستوور ئاسەوارەكانی ١٦ی ئۆكتۆبەر بسڕدرێنەوە، بە تایبەتی لە ناوچە كوردستانییەكانی دەرەوەی ئیدارەی ھەرێمی كوردستاندا.

لە روانگەیەكی تریشەوە، ئەم رێوڕەسمە و وتاری میوانەكان، سێ خاڵی سەرەكیی بەرجەستە كرد: ١- داننان بە دیموكراسی و دەستاودەستكردنی ئاشتیانەی دەسەڵات بە میكانیزمی ھەڵبژاردن و ئیرادەی خەڵكی كوردستان و سندووقەكانی دەنگدان لە ھەرێمی كوردستان. ٢- ستایشكردنی پێشكەوتن و پەرەسەندنە جۆراوجۆرەكانی ھەرێمی كوردستان. ٣-  كەلتووری پێكەوەژیان و لێبووردەیی لە ھەرێمی كوردستان. ئەمانەش ھەموویان پێگە و ھێزی ھەرێمی كوردستان بەرزتر دەكەنەوە. جگە لەمانەش، وەبیرھێنانەوەی قوربانی و خەباتی كورد و رۆڵی پێشمەرگە و ھەروەھا  ھاوخەباتی و دۆستایەتیی ڕابردووی نێوان سەركردەكانی ئێستای عێراق و  سەركردە كوردەكان، ھەوڵدانێك بوو بۆ سڕینەوەی بارگرژییەكان و چاككردنەوەی ھەڵەكانی ١٦ی ئۆكتۆبەر و دڵنەوایی و دڵنیاییدانەوە بە كورد و ھەرێمی كوردستان بوو. كۆی ئەمانەش، واتایەیەكی گرنگی ھەبوو، ئەویش ئەوە بوو كە ھەموویان (ویستراو و نەویستراو) دانیان بەوەدا نا كە ئەم ئەزموونەی ئێستای ھەریمی كوردستان لە ئەنجامی بەرگری و خەبات و قوربانیی كورد خۆی، بەدەست ھاتووە، نەك لەلایەن ئەوان/بەغداوە ئەو ماف و ئازادییەی ئێستای ھەرێمی كوردستان پێان درابێت.

گوتەكانی بەڕێز نێچرڤان بارزانیش ھەم بۆ ئاستی ناوخۆیی ھەرێمی كوردستان بۆ ھەردوو لایەنی ھاووڵاتیان و لایەنە سیاسییەكان، دڵنیاكەرەوە بوو و ھەمیش بۆ بەغدا و وڵاتانی ھەرێمی و ھاوپەیمانە نێودەوڵەتییەكان بە تایبەتی ئەمەریكا، چونكە پێداگریی بەڕێزیان لەسەر ئاستی ناوخۆ لە ھەوڵدانی سەرۆكی ھەرێمی كوردستان بۆ چەسپاندن و دەستەبەركردنی پێكەوەژیانی ئاشتیانە و یەكڕیزی و تەبایی و كاری ھاوبەش، سەرەڕای بوونی روانگە و جیاوازییە ئەتنی و ئایینییەكان و بیروبۆچوونە سیاسییەكان. ھەروەھا پەیامێك بوو بۆ بەغدا كە عێراقی نوێ بەپێی دەستوور پێویستە پابەند بێت بە جێبەجێكردنی بنەماكانی ئەو پێكەوەژیانە بۆ چارەسەركردنی كێشە و گرفتەكان، ھەر بۆیە چارەنووسی جەنگ و ستەمكاری رژێمی بەعسی لە ھەمبەر گەلی كورد و گەلانی ناوچەكە و تەنانەت عێراق وەبیر بەشداربووان ھێنایەوە بە مەبەستی نیشاندانی بێسوودبوونی سەركوت و ستەمكاری لە ھەمبەر كورد لەلایەن حكوومەتە جۆراوجۆرەكانەوە و پێچەوانەبوونەوەی دەرئەنجام و ئاكام و لێكەوتەكانی لە بەرژەوەندیی خودی عێراق و عێراقییەكان. لەلایەكی تریشەوە بەڕێز نێچیرڤان بارزانی بە پێداگری لەسەر بەرژەوەندیی ھاوبەش و ئایندە و چارەنووسی ھاوبەش، دەرگای بۆ كاری پێكەوەی ھەموو لایەنە سیاسییەكان كردەوە. پێناسەكردنی "پاراستنی ژیان و پێكەوەژیان" بە كرۆكی سەرمایەی عێراق، دیوێكی تری ئەو وتارەیە كە پەیامی روون و ئاشكرای بۆ دەسەڵاتدارانی عێراقی ھەڵگرتبوو. ھەروەھا بەرجەستەكرنەوەی پێوستی و گرنگی بوونی پەیوەندیی بەھێزی ھەرێمی و نێودەوڵەتی بۆ ھەرێمی كوردستان لەسەر بنەمای لێكتێگەیشتن و رێزگرتن و بەرژەوەندی و لە چوارچێوەی یاسای نێودەوڵەتی و داب و دەستووری دیپلۆماسی و سەروەریی ھەر وڵاتێك و پێكھاتە دەستوورییەكان، پەیامێكی ڕوون و ئاشكرای دیپلۆماسی بوو بۆ عێراق (كە پشتیوانیی ھەرێمی و نێودەوڵەتیمان ھەیە) و وڵاتانی دراوسێ (كە ئیمە نابینە مەترسی بۆ ئێوە و ئێوەش پابەند بن بە بنەمای بەرژەوەندیی ھاوبەش و دەستێوەرنەدان لە كاروباری ناوخۆیی ئێمەوە) و دەوڵەتە سەروو ھەرێمییەكان (كە ئێمە لە جەنگی داعش لەبری ھەموو جیھان پارێزەری ئاشتی بووین و لەداھاتووشدا دەبین و بەرژەوەندیی سیاسی و ئابووری و ئاسایشی ھاوبەشمان ھەیە). بۆیە وتاری بەڕێز نێچیرڤان بارزانی بە وتارێكی گشتگیر و فرەڕەھەند لە چوار ئاستی  ناوخۆیی و عێراقی و ھەرێمی و نێودەوڵەتی دادەنرێت.

 ھەروەھا وتەكانی سەرككۆماری عێراق دكتۆر بەرھەم ساڵح و بەرجەستەكردنەوەی رۆڵ و پێگە و كەسایەتیی جەنابی سەرۆك بارزانی وەكوو ھەوڵدان بۆ ھەڵدانەوەی لاپەڕەیەكی نوێ و تەنانەت فەرامۆشكردن و تێپەڕاندنی نیگەرانییەكان لە چۆنیەتیی ھەڵبژاردنیان بە سەرۆككۆمار بە بێ رەزامەندیی پارتی دیموكراتی كوردستان و تەنانەت گرفت لە پەیوەندییەكانی ئەم دواییەی یەكێتیی نشتیمانیی كوردستان لەگەڵ پارتی دیموكراتی كوردستان دەبیندرێت. لێرەوەیە كە ناوەڕۆكی بابەتەكە زیاتر دەسەلمێندرێت كە بەڕێوەچوونی ئەم رێوڕەسمە، ھەڵگری چەندین واتا و پەیام و لێكەوتەی ئەرێنییە بۆ ھەرێمی كوردستان و پێگەی سەرۆكایەتیی ھەرێمی كوردستان بۆ پتەوكردنی پەیوەندییە كوردستانی و عێراقی و ھەرێمی و نێودەوڵەتییەكان.

لە كۆتاییدا دەكرێت ئەم ڕێوڕەسمە پاڵپشتییەكی ناوخۆیی و عێراقی و ھەرێمی و تەنانەت نێودەوڵەتی بێت بۆ كابینەی سەرۆكی حكوومەتی ھەرێمی كوردستان بەڕێز مەسروور بارزانی، كە بڕیار وایە لەلایەن سەرۆكی ھەرێمەوە بۆ پێكهێنانی حكوومەت ڕابسپێردرێت.

 

 




دوایین هەواڵەکان

د. محەمەد قادر: لە چەند ڕۆژی داھاتوو ھاوکارییەکان ڕێکخراوی WHO دەگەنە ھەرێمی کوردستان

MONDAY, 06 JULY 2020 20:07:07

ھەولێر-KDP.info-  گوتەبێژی وەزارەتی تەندروستیی ڕایگەیاند، بەھۆی بەردەوامیی شەپۆلی دووەمی ڤایرۆسی کۆرۆناوە، بە باشیان زانیوە دەربارەی نەخۆشییەکە و چۆنیەتیی ڕووبەڕووبوونەوەی لە قۆناغی ئێستادا پەیوەندی بە ڕێکخراوی تەندروستیی جیھانییەوە بکەن ، دەڵێت، بە خۆشحاڵییەوە ئەوانیش ئامادەیییان دەربڕیوە و لە کۆتاییی ئەم ھەفتەیەدا ھاوکارییە تەندروستییەکان لە ڕێگای شاندێکی ڕێکخراوی تەندروستیی جیھانی WHO دەگەنە ھەرێمی کوردستان و، دەشڵێ، بارودۆخی بڵاوبوونەوەی ڤایرۆسی کۆرۆنا بەردەوامە، پێویستە ھاونیشتمانیان زیاتر خۆیان بپارێزن و ڕێنماییەکانی تەندروستی جێبەجێ بکەن.

 
ھندرێن دۆسکی: خاڵی ناکۆکی نێوان ھەرێم و بەغدا نەماون بۆ گەیشتن بە ڕێککەوتن

MONDAY, 06 JULY 2020 18:07:03

هەولێر -PDK.info-  بڕیارە سبەی شاندی دانوستانکاری حکوومەتی ھەرێمی کوردستان بۆ درێژەدان بە دانوستان لەگەڵ حکوومەتی فیدڕاڵ سەردانی بەغدا بکات و پەرلەمانتارێکی فراکسیۆنی پارتیش پێی وایە، تەنھا ھەندێ گرفتی تەکنیکی ماون و ھەردوولا دەیانەوێ بگەنە ڕێککەوتن.

 

وەزارەتی شارەوانی ١٠% خەرجییەکانی کەم دەکاتەوە

MONDAY, 06 JULY 2020 18:07:46

ھەولێر -KDP.info-  گوتەبێژی وەزارەتی شارەوانی و گەشتوگوزاری حکوومەتی ھەرێمی کوردستان گوتی، لە چوارچێوەی چاکسازی و پێداچوونەوە بە خەرجییەکانی وەزارەتی شارەوانی توانرا ١٠% خەرجییەکان کەم بکرێتەوە بەبێ ئەوەی کاریگەریی لەسەر خزمەتگوزارییەکان ھەبێت.

 

بەرپرسى پەیوەندییەکانى پارتى و بەرپرسى بەرەى تورکمانى تەئکیدیان لە هەماهەنگى و پەیوەندیى نێوانیان کردەوە

MONDAY, 06 JULY 2020 17:07:35

هەولێر -KDP.info-  ئەمڕۆ عەلى حسێن، بەرپرسى مەکتەبى پەیوەندییەکانى کوردستانى و عێراقیى پارتى دیموکراتى کوردستان، بە یاوەریى بەرپرسى دیسکى پارتە تورکمانییەکان و ئەندامانى مەکتەب، سەردانى بەرەى تورکمانیى عێراقییان لە شارى هەولێر کرد و لەلایەن ئایدن مەعرووف، ئەندامى مەکتەبى سیاسى و وەزیرى هەرێم بۆ کاروبارى پێکهاتەکان و هیمداد بیلال، سەرۆکى فراکسیۆنى بەرەى تورکمانى و بەرپرسى هەولێرى بەرەکە پێشوازیی لی کرا.

 

ڕاپۆرتێك له‌سه‌ر ڕه‌وشى ناوچه‌ كوردستانییه‌كانی ده‌ره‌وه‌ى ئیداره‌ى هه‌رێم ئاماده‌ ده‌كرێت

MONDAY, 06 JULY 2020 16:07:15

هەولێر-KDP.info-  بە مەبه‌ستی تاووتوێكردن و ئاماده‌كردنی ڕاپۆرتێك سه‌باره‌ت به ڕه‌وشی ناوچه‌ كوردستانییه‌كانی ده‌ره‌وه‌ى ئیداره‌ى هه‌رێم، ڕۆژی یەکشەممە 2020/7/5، لیژنەی ناوچە کوردستانییەکانی دەرەوەی ئیدارەی ھەرێم له‌ په‌رله‌مانی كوردستان، بە سەرپەشتیی جوان یونس ڕۆژبەیانی، سەرۆکی لیژنەکە و ئامادەبوونی جێگری سەرۆکى لیژنە و بڕیاردەر و ئەندامان و ڕاوێژکارانی لیژنەكه‌ کۆ بووەوە.

 


سه‌رۆك نێچیرڤان بارزانى: كاتى ئه‌وه‌یه‌ بگه‌ینه‌ تێگه‌یشتنێكى هاوبه‌ش و هه‌موو دۆسیه‌كان یه‌كلا بكه‌ینه‌وه‌

بەغدا-KDP.info- سه‌رۆك نێچیرڤان بارزانى له‌گه‌ڵ هه‌رسێ سه‌رۆكایه‌تى و سه‌ركرده‌ و لایه‌نه‌ عێراقییه‌كان، كێشه‌ و به‌رپرسیارییه‌تییه‌كانى به‌ هاوبه‌ش بۆ هه‌موو عێراقییان له‌ قه‌ڵه‌م دا و گوتى: هه‌موومان یه‌ك چاره‌نووسمان هه‌یه‌ و كێشه‌كانى عێراق و هه‌رێمى كوردستان كێشه‌ى هه‌موو عێراقییه‌كانه‌، دووپاتیشى كرده‌وه‌ دواى ئه‌زموونى تاڵى چه‌ندین ساڵى گرفت و كێشه‌ى نێوان هه‌ردوولا، ئیتر ده‌بێ نه‌چینه‌وه‌ سه‌ر ڕابردوو، به‌ڵكوو ئێستا كاتى ئه‌وه‌یه‌ بگه‌ینه‌ تێگه‌یشتنێكى هاوبه‌ش و به‌ ڕێككه‌وتنێكى گشتگیرى جێى ڕه‌زامه‌ندیى هه‌ردوولا كه‌ ئارامى و سه‌قامگیرى، دادپه‌روه‌رى و پێشكه‌وتن بۆ ئێستا و داهاتووى هاوبه‌شمان دابین بكات، كێشه‌كان به‌ یه‌كجارى چاره‌سه‌ر بكه‌ین.

 
© 2020 Kurdistan Democratic Party, KDP