ھەولێر-KDP.info- ئێوارەی ئەمڕۆ پێنجشەممە ٢٠٢٦/١٠/١، بەڕێز نێچیرڤان بارزانی، سەرۆکی ھەرێمی کوردستان، لە بەغدا بەشداریی لە ڕێوڕەسمی کۆتاییھاتنی ئەرکی ھاوپەیمانیی نێودەوڵەتی لە عێراق کرد کە بە ئامادەبوونی بەڕێز عەلی فالح ئەلزەیدی، سەرۆکوەزیرانی عێراقی فیدراڵ و ژمارەیەکی بەرچاو لە بەرپرسانی باڵا و نوێنەرانی نێودەوڵەتی بەڕێوە چوو.
لە ڕێورەسمەکەدا بەڕێز سەرۆکی ھەرێمی کوردستان، وتارێکی پێشکەش کرد، ئەمە دەقەکەیەتی:
بەڕێز جەنابی عەلی فالح ئەلزەیدی
سەرۆکوەزیران و فەرماندەی گشتیی ھێزە چەکدارەکان،
بەڕێز سەرۆکی ئەنجومەنی نوێنەرانی عێراق
ئامادەبووان و میوانانی بەڕێز،
سڵاوی خواتان لێ بێت..
خۆشحاڵم ئەمڕۆ لەم بۆنە نیشتمانییەدا لە بەغدا لەگەڵتانم، لە ساتەوەختێکی ڕاگوزەر و وەرچەرخاندا بۆ وڵاتەکەمان کە ھاوکاتە لەگەڵ کۆتاییھاتنی ئەرکی ھاوپەیمانیی نێودەوڵەتی لە عێراق.
بۆ چەندین دەیە، عێراق بە قۆناغی زۆر سەخت و دژواردا تێپەڕی. کاتێکیش تیرۆریستانی داعش ھێرشیان ھێنایە سەر وڵاتەکەمان، ھەموو عێراقییەکان پێکەوە لە یەک سەنگەردا لە دژی تیرۆر وەستانەوە.
سوپای عێراق، پێشمەرگە، حەشدی شەعبی لەگەڵ تەواوی ھێزە چەکدار و ئەمنییەکان، بە خوێن و قوربانیدانی ھاوبەش بەرگرییان لەم نیشتمانە کرد. لێرەدا، بەوپەڕی ڕێزەوە لە قوربانیدانی ھەموویان دەڕوانین. دروود و سڵاو بۆ گیانی پاکی تەواوی شەھیدان دەنێرین.
لەو قۆناغە سەختەدا، لەسەر داوای حکوومەتی عێراق، ئەمەریکا لەگەڵ ھاوپەیمانیی نێودەوڵەتی و دۆستانمان، لەپاڵ ئێمەدا وەستان و ھاوکارییان کردین. ئێمە، ھەموو عێراقییەکان ئەوەمان لەبیرە و پێزانینمان بۆ پاڵپشتییان ھەیە.
ئەمڕۆش کە بەپێی ڕێککەوتنیان لەگەڵ حکوومەتی فیدراڵ؛ خاکی عێراق جێدەھێڵن، ئێمە ھەرگیز ئەو ھاوکاری و پشتیوانییە لەبیر ناکەین و بۆ ھەمیشە بە ڕێزەوە لێی دەڕوانین، بەڵام پێزانینی ڕاستەقینە دەبێت بەرەو ھەڵگرتنی بەرپرسیاریەتیی نیشتمانی لە عێراق گەشە بکات.
پێوەری سەرکەوتنی پاڵپشتیی نێودەوڵەتی ئەوە نییە تا ھەتایە ھێزی بیانی لێرە بمێنێتەوە، بەڵکوو ئەوەیە کە ئێمەی عێراقی ئەمڕۆ بەتەواوی توانامان ھەبێت بەرپرسیاریەتیی پاراستنی ئاسایش و سەقامگیریی وڵاتەکەمان لەئەستۆ بگرین.
بە کۆتاییھاتنی ئەرکی ھاوپەیمانیی نێودەوڵەتی لە عێراق، ئەمڕۆ دەچینە قۆناغێکی نوێوە، قۆناغی بڕوابەخۆبوون و پشتبەستن بە توانا نیشتمانییەکانمان. چاومان لەوەیە پەیوەندیمان لەگەڵ ئەمەریکا و وڵاتانی ھاوپەیمان، لە پێداویستییەکانی شەڕی دژی تیرۆرەوە، بگوازرێتەوە بۆ ھاوبەشییەکی درێژخایەنی ھاوسەنگ لە بوارەکانی ئەمنی، ئابووری، وەبەرھێنان، وزە، پەروەردە، تەکنەلۆژیا و دیپلۆماسیدا.
ھاوبەشییەک لەسەر بنەمای بەرژەوەندیی ھاوبەش و ڕێزگرتن لە سەروەریی دەوڵەت، بە جۆرێک کە لە خزمەت ھەموو عێراق و تەواوی پێکھاتەکانی و ئارامی و سەقامگیریی ناوچەکەدا بێت.
ئامادەبووانی بەڕێز،
کاتێک ئەمڕۆ باس لە سەروەری دەکەین، دەبێ بە ڕوونی پێناسەی بکەین:
سەروەری، تەنیا کشانەوەی ھێزی سەربازیی بیانی نییە، بەڵکوو بەرپرسیاریەتییەکی نیشتمانییە.
سەروەری واتە دەوڵەت خاوەنی بڕیاری کۆتایی بێت. واتە دەستوور و فیدراڵی جێبەجێ بکرێت و دامەزراوە دەستوورییەکان مەرجەعی ھەمووان بن.
واتە بڕیاری شەڕ و ئاشتی تەنیا لە دەستی دەسەڵاتی شەرعیی دەوڵەتدا بێت.
ھێزی عێراق لە چەکی دەرەوەی دەسەڵاتی دەوڵەت و لە ئاڵۆزی و ناسەقامگیریدا نییە. ھێزی عێراق لەوەدایە بە گفتوگۆ و لێکگەیشتن کێشەکان چارەسەر بکات. لەوەدایە کە لۆژیکی دەوڵەت و دەستوور زاڵ بێت و ھاوسەنگی و مافی ھەموو پێکھاتەکانی بپارێزێت.
بۆیە ئیتر کاتی ئەوە ھاتووە تەواوی کێشە ھەڵپەسێردراوەکانی ناو ماڵی عێراقی، لە پەیوەندییەکانی ھەولێر و بەغداوە تا پرسی چەک و مافی سەرجەم پێکھاتەکان، لەسەر بنەمای دەستوور و بە ئیرادەیەکی نیشتمانیی عێراقییانە چارەسەر بکەین، نەک ڕێگە بدەین ببنە قەیرانی بەردەوام بۆ نەوەکانی داھاتوو.
ئێمە خوازیاری عێراقێکی دەستووریی فیدراڵی، سەقامگیر و خاوەن سەروەریی تەواوین. وڵاتێک کە بێ جیاوازی پارێزەری ژیان و ئاسایشی ھەموو پێکھاتەکان و ھاووڵاتییانی بێت. لەسەر بنەمای بەرژەوەندیی ھاوبەش، پەیوەندییەکی ھاوسەنگی لەگەڵ دراوسێ و دۆستانیدا ھەبێت و نەبێتە گۆڕەپانی ململانێ، بەڵکوو ببێتە چەقی ئاشتی، گفتوگۆ و سەقامگیری بۆ تەواوی ناوچەکە.
ئەو عێراقە بەرپرسیاریەتیی ھاوبەشی ھەموومانە. ئێمەش لە ھەرێمی کوردستان، وەک ھەمیشە ھاوکار و پشتیوان دەبین بۆ ھەر ھەنگاوێک کە سەروەری، ئاسایش و سەقامگیریی عێراق بەھێز بکات. لەگەڵ حکوومەتی فیدراڵی و تەواوی ھێز و پێکھاتەکانی عێراقدا، بە دیالۆگ و لەسەر بنەمای دەستوور کار دەکەین؛ ھاوکات جەخت لەسەر پتەوکردنی ھەماھەنگی و ھاوکاریی نێوان پێشمەرگە، سوپا و تەواوی ھێزە چەکدار و ئەمنییەکان دەکەینەوە.
با ئەم وەرچەرخانە بکەینە دەستپێکی متمانەیەکی پتەوتر لەنێوانماندا؛ دەستپێکی قۆناغێک کە تیایدا عێراق بە یەکڕیزی، سەروەریی یاسا و ھاوبەشیی دەستووریی ھەموو پێکھاتەکانی، بەرز و پارێزراو بێت.
زۆر سوپاستان دەکەم، ھیوای ئێوارەیەکی خۆشتان بۆ دەخوازم.
