ھەولێر-KDP.info- ئێوارەی ئەمڕۆ چوارشەممە ٢٠٢٦/٣/١٨، بەڕێز نێچیرڤان بارزانی، سەرۆکی ھەرێمی کوردستان، پێشوازیی لە بەڕێز ئەرمان تۆپچو، کونسوڵی گشتیی تورکیا لە ھەرێمی کوردستان کرد.
لە کۆبوونەوەیەکدا، دەربارەی دوایین پێشھاتەکانی ناوچەکە و لێکەوتەکانی شەڕ و ئاڵۆزییەکان؛ بیروڕایان گۆڕییەوە. ھەردوولا جەختیان لە گرنگیی برەودانی زیاتر بە ھەوڵە دیپلۆماسییەکان بۆ ڕێگریکردن لە فراوانبوونی زیاتری شەڕ و چارەسەرکردنی ئاشتییانەی کێشەکان کردەوە.
دۆخی عێراق و ھەرێمی کوردستان تەوەرێکی دیکەی کۆبوونەوەکە بوو. لەمبارەیەوە ھەردوولا ھاوڕا بوون کە پێویستە ھەموو ھەوڵێک بدرێت بۆ ئەوەی عێراق و ھەرێمی کوردستان بە ھیچ شێوەیەک لە شەڕ و ئاڵۆزییەکانەوە نەگلێن و لە ھەموو ئاستەکاندا کار بۆ ئەوە بکرێت ئارامی و سەقامگیریی عێراق و ھەرێمی کوردستان پارێزراو بێت.
لە بەشێکی دیکەی کۆبوونەوەکەدا، سەرۆک نێچیرڤان بارزانی سوپاس و پێزانینی بۆ تورکیا دووپات کردەوە بۆ یارمەتیدان و ئەو ئاسانکارییەی لە دەروازەکانی سنوور بۆ ھاتوچۆی گەشتیاران پێشکەش بە ھاووڵاتییانی ھەرێمی کوردستان و عێراق بە گشتی دەکەن.
کاریگەریی شەڕ و ئاڵۆزییەکان بەسەر تورکیاوە، لەگەڵ پەیوەندییەکانی ھەردوولا و پێشبینییەکان بۆ داھاتووی دۆخەکە و ڕووداوەکان، لایەنێکی دیکەی کۆبوونەوەکە بوو.