ھەولێر-KDP. info- مەسروور بارزانی، سەرۆکوەزیرانی هەرێمی کوردستان، لە میانەی بەشداریی لە پرسەی شەهید وڵات تاهیر پەیامێکی توندی ئاراستەی گرووپە لەیاسا دەرچووەکان و حکوومەتی عێراق کرد و ڕایگەیاند، هەرێمی کوردستان نابێتە بەشێک لە ململانێیەکی سەپێنراو.
سەرۆکوەزیران مەسروور بارزانی ڕایگەیاند: چەندین پەیوەندیم لە سەرۆک و سەرکردەکانی جیهانەوە پێگەیشتووە؛ هەمووان پشتیوانیی خۆیان بۆ هەرێمی کوردستان دەربڕیوە و هاوڕاین کە دەبێت یارمەتیی یەکتر بدەین بۆ گەڕانەوەی ئاشتی.
باسی لەوەشکرد: خوێنی شەهیدانمان بەفیڕۆ ناچێت و هەموو هەوڵێک دەدەین بۆ ئەوەی کوردستان بە پارێزراوی بمێنێتەوە.
سەرۆکوەزیران گوتی، نامانەوێت بە زۆر بمانخەنە بەرەیەکەوە و ئەم ڕەفتارە دوژمنکارانەی بەرامبەرمان دەکرێت، لە بیری خەڵکی کوردستان ناچێتەوە.
داوا لە حکوومەتی عێراق دەکەین چیتر پاڵپشتی ئەو گروپە چەکدارانە نەکات و پێویستە سنوورێک بۆ ئەم پەلامارانە دابنرێت.
سەبارەت بە کارەبا سەرۆکوەزیران دڵنیایی دایە هاووڵاتیان و گوتی، کەمبوونەوەی کارەبا دەرئەنجامی شەڕە و دۆخەکە بەرەو ئاساییبوونەوە دەچێت.