ھەولێر -KDP.info- نەقیبی سەندیکای ڕۆژنامەنووسانی کوردستان دەڵێت، پشتگیری تەواو لە ڕاگەیەندراوی حکوومەتی ھەرێمی کوردستان دەکەین کە بۆ کاری میدیایی لەم دۆخە دەریکردووە.
حاکم ئازاد حەمەدەمین، نەقیبی سەندیکای ڕۆژنامەنووسانی کوردستان، بۆ ماڵپەڕی فەرمیی پارتی دیموکراتی کوردستان گوتی "تەواوی پشتگیریی خۆمان بۆ ڕاگەیەندراوەکەی حکوومەتی ھەرێمی کوردستان بە ھەموو ئەو خاڵانەی تێیدا ھاتووە دووپات دەکەینەوە، کە میدیا و زانیاری دەریکردووە، پێشتریش ئێمە وەکو سەندیکا ڕای خۆمان نیشانداوە، پێویستە ڕۆژنامەنووسان جگە لە لە ڕەچاوکردنی ئیتیکی کاری ڕۆژنامەوانی بارودۆخ و ڕەوش و ھەستیاریی ھەرێمی کوردستان لەبەرچاو بگرن، بەتایبەت ڕۆژنامەنووسانی کوردستان."
حاکم ئازاد حەمەدەمین گوتیشی "ئەگەر دیقەت بدەینە ھەموو میدیای جیھانی ڕووداوەکان ڕووماڵ دەکەن و جۆرێک لە ستاندارد ھەیە، پێویستە ڕۆژنامەنووس نەبێتە لۆکیشنێک خزمەت بە دوژمنان بکات، بۆیە داواکارین سەرجەم ڕاگەیاندن و ڕۆژنامەنووسان پابەندی ئەو خاڵانەبن کە حکوومەتی ھەرێمی کوردستان لەپێناو بەرژوەندی گشتی دەریکردووە."
فەرمانگەی میدیا و زانیاریی حکوومەتی ھەرێمی کوردستان، لەپێناو پاراستنی ئاسایشی نیشتمانی و گیانی ھاووڵاتییان، چەند ڕێنماییەکی توندی بۆ میدیاکان دەرکرد.
بڕیارەکان بەکارھێنەرانی سۆشیال میدیاش دەگرێتەوە، بەمەبەستی پاراستنی گیان و سامانی ھاووڵاتییان لەم بارودۆخە ئەمنییە ھەستیارەی هەیە.
فەرمانگەکە جەختی کردووەتەوە، لەکاتی ڕووماڵی ڕووداوە ئەمنییەکان، بەتەواوی قەدەغەیە ڤیدیۆی ڕاستەوخۆی ئاراستەکردنی درۆن و مووشەکەکان بڵاو بکرێتەوە.
ھەروەھا بەتوندی ھۆشداریی داوە، نابێت بەھیچ شێوەیەک شوێنی وردی ھێرشەکان و ئەو ناوچانەی زیانیان بەرکەوتووە لە میدیاکانەوە ئاشکرا بکرێن.
لە بەشێکی دیکەدا، چەند ڕێنماییەکی توند دراوەتە ڕۆژنامەنووسان سەبارەت بە چۆنیەتیی مامەڵەکردن لەگەڵ ئەو ڤیدیۆیانەی لەلایەن ھاووڵاتییانەوە بۆیان دەنێردرێت.
لە کۆتاییشدا، فەرمانگەی میدیا و زانیاری کۆمەڵێک ڕێنمایی دروستی بڵاوکردووەتەوە بۆ چۆنیەتیی بەکارھێنانی تۆڕە کۆمەڵایەتییەکان لەم دۆخە ناھەموارەدا.
بڵند ئیبراھیم