ھەولێر-KDP.info- دەستەی ناوچە کوردستانییەکانی دەرەوەی ئیدارەی هەرێم لەگەڵ نوێنەری سەرجەم حزب و لایەنە سیاسییە کوردستانییەکانی سنووری پارێزگای دیالە و قەزای خانەقین کۆبووەوە، دوای کۆبوونەوەکە، لە کۆنگرەیەکی رۆژنامەوانیدا هەڵوێستی فەرمیی خۆیان بەرامبەر بە گۆڕانکارییە ئیدارییەکانی ناوچەکە راگەیاند.
ئەمڕۆ پێنجشەممە 26ـی شوباتی 2026، فەهمی بورهان، سەرۆکی دەستەی ناوچە کوردستانییەکان رایگەیاند، "ئەو هەوڵانەی بۆ گۆڕینی ناحیەکان بۆ قەزا و دابڕینیان لە خانەقین لە ئارادایە، درێژەپێدەری هەمان ئەو سیاسەتەیە کە پێشتر بۆ تەعریبکردنی ناوچەکە بەکارهاتووە، ئەمە هەنگاوێکی نادەستوورییە و پێچەوانەی بنەماکانی ماددەی 140ـی دەستووری عێراقە."
فەهمی بورهان جەختی کردەوە، حکوومەتی هەرێمی کوردستان و سەرجەم لایەنە سیاسییەکان پشتیوانی خەڵکی خانەقین دەکەن و ڕێگە نادەن بەم شێوەیە دەستکاریی دیمۆگرافیا و نەخشەی ئیداریی ناوچەکە بکرێت، ڕاشیگەیاند، نووسراوێکی فەرمی ئاڕاستەی پەرلەمان و حکوومەتی عێراق و دادگای فیدراڵی دەکەن بۆ تانەدان لەو بڕیارانە.
لە لایەکی ترەوە، نوێنەری لایەنە سیاسییەکانی خانەقین ئاماژەی بەوە کرد، "ئەوانەی ئێستا لە بەغدا و دیالە خەریکی جێبەجێکردنی ئەم بڕیارانەن، دەیانەوێت بە بەرگێکی نوێوە سیاسەتی رژێمی پێشوو دژی کورد جێبەجێ بکەن." هەروەها دەڵێن، کە ئەم گۆڕانکارییانە کاریگەریی خراپیان دەبێت لەسەر پرۆسەی سەرژمێریی داهاتوو و دەیانەوێت ژمارەی کورد لەو ناوچانە کەم بکەنەوە.
لە کۆتایی کۆنگرە رۆژنامەوانییەکەدا، داوا لە سەرجەم وەزیران، پەرلەمانتاران و سەرۆککۆمار کرا کە لە بەغدا وەک یەک دەنگ دژی ئەم ستەمە بوەستنەوە، چونکە مەترسییەکە تەنها لەسەر خانەقین نییە، بەڵکو ئەگەر لە خانەقین سەر بگرێت، ڕەنگە لە داهاتوودا کەرکووک و شنگال و ناوچەکانی تریش بگرێتەوە.