ھەولێر-KDP.info- ئەمڕۆ چوارشەممە، لە ڕێورەسمێکی شکۆداردا و بە ئامادەبوونی لێپرسراوانی حکوومی و حزبی، یادی ٢٥ ساڵەی شەهیدکردنی تێکۆشەری گەورەی گەلەکەمان، فەڕەنسۆ هەریری، لە شاری هەولێر بەرز ڕاگیرا.
مەراسیمەکە لەسەر شەقامی ٦٠ مەتری و لە نزیک مزگەوتی سپی، ڕێک لەو شوێنەی کە تێیدا شەهید فەڕەنسۆ هەریری کرایە ئامانج، بەڕێوەچوو. هەریەک لە بەڕێزان ئومێد خۆشناو، پارێزگاری هەولێر، و زانا مەلا خالید، بەرپرسی لقی ٢ی پارتی دیموکراتی کوردستان، لەگەڵ ژمارەیەک لە کادیران و جەماوەری شارەکە ئامادەی بوون.
لە میانی یادەکەدا، تاجەگوڵینەی ڕێز و وەفا لە شوێنی شەهیدبوونی دانرا و ئامادەبووان بۆ چەند ساتێک بە بێدەنگی وەستان، وەک نیشانەیەک بۆ ڕێزگرتن لە مێژووی پڕ لە خەبات و قوربانیی ئەو سەرکردە نیشتمانپەروەرە.
شەهیدی سەرکردە فەڕەنسۆ هەریری، کە یەکێک بوو لە تێکۆشەرە دیارەکانی بزووتنەوەی ڕزگاریخوازی کوردستان، لە بەرەبەیانی ١٨ی شوباتی ساڵی ٢٠٠١ لە کردەوەیەکی تیرۆریستیی دا شەهید کرا. فەڕەنسۆ هەریری لە تەمەنی خەباتیدا چەندین پۆستی گرنگی حزبی و حکوومی هەبووە، لەوانە ئەندامی کۆمیتەی ناوەندیی پارتی و پارێزگاری هەولێر، و ڕۆڵێکی بەرچاوی هەبوو لە ئاوەدانکردنەوەی پایتەخت و پشتیوانیکردنی وەرزشوانان و لاوان.
ئەم یادە ساڵانە وەک جەختکردنەوە لەسەر ڕێبازی ئاشتی، پێکەوەژیان و خزمەتگوزاری بەڕێوە دەچێت، کە شەهید فەڕەنسۆ هەریری یەکێک بوو لە داینەمۆ سەرەکییەکانی ئەو پەیامە لە هەرێمی کوردستاندا.
