ھەولێر-KDP.info- جێگری سەرۆکی ئەنجوومەنی نوێنەرانی عێراق پڕۆسەی ئەمڕۆی ھەڵبژاردنی سوپاسالاری عێراق بە نادەستووری و ھەروەھا گوماناوی وەسف کرد و رایگەیاند، لە دژی بڕیارەکە ھەموو ڕێکارە یاسایی و دەستوورییەکان دەگرنەبەر، لەوانەش پەنابردن بۆ دادگا.
دەقی بەیاننامەکەی فەرھاد ئەمین ئەترووشی جێگری سەرۆکی ئەنجوومەنی نوێنەران:-
عێراق بە بارودۆخێکی سەخت و زۆر ئاڵۆزدا تێدەپەڕێت، ھەروەھا بارودۆخی ناوچەیی و نێودەوڵەتیش بە ھەمانشێوە، سەرۆکی ئەنجوومەنی نوێنەران ھەنگاوێکی نا کە دیمەنە سیاسییەکە ئاڵۆزتر دەکات و چەندین پرسیار دەوروژێنێت، ئەویش لە ڕێگەی پەلەکردنی گوماناوی لە دەنگدان لەسەر ھەندێک پلەی تایبەت.
شایانی باسە دەستەی سەرۆکایەتی ئەنجوومەنی نوێنەران پێش بەڕێوەچوونی کۆبوونەوەی ئەمڕۆ سێشەممە، چەندین کۆبوونەوەی ئەنجام دا و تێیاندا ڕێککەوتن کرا لەسەر بڕگەکانی کارنامەی کۆبوونەوەکە، کە دەنگدان لەسەر ھەموارکردنەوەی پەیڕەوی ناوخۆ بۆ یەکخستنی ژمارەیەک لە لێژنەکان و ناونانیان و ئەرک و پسپۆڕییەکانیان لەخۆگرتبوو، جگە لە بڕگەی گەنگەشەی گشتی، بەڵام بەداخێکی زۆرەوە ئەوەی ڕووی دا لە زیادکردنی بڕگەی تر بوو لە بەرنامەی کار کە ڕێککەوتنی لەسەر نەکرابوو، ھەروەھا خستنەڕووی ئەم بابەتە بەم شێوازە لە ئەنجوومەنی نوێنەران و پەلەکردن لە دەنگدان لەسەر پۆستە ھەستیارەکانی دەوڵەت کە یەکێکیان پۆستی سەرۆکی سوپاسالاری بوو، گومانێکی گەورە لای ئێمە و لای پێکھاتە و لایەنەکانی دیکە و ھاوبەشانی پرۆسەی سیاسی دروست دەکات.
ئەوەی ئەمڕۆ ڕووی دا سەرپێچییەکی ئاشکرای ماددەی نۆیەمی دەستوور و ماددەی (٣٧/ دووەم)ی پەیڕەوی ناوخۆیە، ئەمەش بە پێشێلکردنی شەراکەتی نیشتمانی و ھاوسەنگی و تەوافوقی سیاسی دادەنرێت و کارێکی تەواو قبووڵنەکراوە.
لەلایەن خۆمانەوە، ئەم دەنگدانە ھیچ شوێنەوارێکی یاسایی و کارگێڕی لێ ناکەوێتەوە، ھەموو ڕێکارە یاسایی و دەستوورییەکان دەگرینەبەر، لەوانەش پەنابردن بۆ دادگا.