هەولێر-KDP.info- ڕۆژی دووشەممە ١٦ی ٢ی ٢٠٢٦، بە ئامادەبوونی د.ھێمن ھەورامی ئەندامی مەکتەبی سیاسیی و د.سالار عوسمان، بەرپرسی بەشی ڕۆشنبیری و ڕاگەیاندن و ئومێد خۆشناو، پارێزگاری ھەولێر و ژمارەیەک لە ئەندامانی کۆمیتەی ناوەندیی پ.د.ک و نووسەر و ڕۆشنبیران و ئەکادیمیست و ڕۆژنامەڤان و بەرپرسانی حزبی و حکوومی، ڕێوڕەسمی دابەشکردنی شەشەمین کتێبی بازنەی گفتوگۆ بە ناونیشانی (جینالۆجیای ناسنامە لەناو ھێزە نەرمەکانی نەتەوەدا) بەڕێوەچوو.
د. سالار عوسمان، بەرپرسی بەشی ڕۆشنبیری و ڕاگەیاندنی پ.د.ک، وتەیەکی پێشکەشکرد و ئاماژەی بەوەدا، بازنەی گفتوگۆ، ئەو چالاکییەی کە مانگانە دەکرێت، تێکڕای ئەو گفتوگۆیانەی کە لەو بازنەیە ماوەی سێ ساڵ زیاترە دەکرێت، دواتر چالاکییەکی شەش مانگی بەڕێوەدەچێت، کە ئێستا لە خزمەتتانداین. کۆکردنەوەی ھەموو ئەو بابەت و مژار و ڕوانین و ھزر و تێگەیشتنە جیاوازە سیاسی و کولتووریانەی لە کۆی گفتوگۆکاندا دەکرێت. دواتر لە توێی کتێبدا بە دوو زمانی گرنگ، زمانی شیرینی کوردی و زمانی عەرەبی کۆدەکرێتەوە، بە دیاری پێشکەش بە بژاردەیەک لە بیرکەرەوەکانی کۆمەڵگەی کوردی دەکرێت.
ھەروەھا بەرپرسی بەشی ڕۆشنبیری و ڕاگەیاندن لە باسی دۆخی ئێستای ناوچەکەدا گوتی: بە لێکگرێدانی قۆناغی ئێستای ناوچەکە، قۆناغی ئێستای ئاڵنگارییەکان، قۆناغی ئێستای ھەموو ئەو گرژییانەی کە ھەیە، ئەو چاوەڕوانییانەی کە ھەیە، ڕۆڵی پارتی دیموکراتی کوردستان، جەنابی سەرۆک بارزانی، ڕۆڵی دامەزراوەکانی ھەرێمی کوردستان بەگشتی و ھەموو تێگەیشتنە جیاوازەکان بۆ بنچینەی چارەسەر دەتوانین باشتر بەرپرسیارێتییەکانی ئەم قۆناغە وە ئەستۆ بگرین، کە ئەم پەروەردەیەش بۆ ڕێبازی بارزانی و پارتی دیموکراتی کوردستان و ڕێنماییەکانی جەنابی سەرۆک بارزانی دەگەڕێتەوە کە بەردەوام فێرمان دەکات و ھانمان دەدات کە ھەمووان ببینین و دوورترین کاراکتەری سیاسی لە کوردستان بە نزیک بزانین، چونکە پارتی ئەو چەترە کۆکەرەوەیە کە خەسڵەتی نیشتمانی و نەتەوەیی و کۆکەرەوەیی بووە بە درێژایی مێژوو. بەرچنەی چارەسەرییەکانی ئەم قۆناغەی ئێستاش ئەوەی لێ دەخوێندرێتەوە.
نمایشکردنی فیلمێکی دۆکیومێنتاری لەبارەی پڕۆژەکە بڕگەیەکی دیکەی ڕێوڕەسمەکە بوو و، تیاییدا ھەنگاوەکانی بازنەی گفتوگۆ تا ئامادەکردنی کتێبی (جینالۆجیای ناسنامە لەناو ھێزە نەرمەکانی نەتەوەدا) نمایش کرا، لەگەڵ ئەوەشدا سەرنج و دیدگای چەندین کەسایەتیی ئەکادیمی و نووسەر و ڕۆشنبیر لە دۆکیۆمێنتارییەکەدا خرایە ڕوو.
پانێڵەکە (ڤیان مەحموود زامدار) بەڕێوەیبرد، تیایدا نووسەر و سیاسەتمەداری دیاری کوردستان (د. کاوە مەحموود) سکرتێری پێشووی حیزبی شیوعی کوردستان، باسی لە جینالۆجیای ناسنامە کرد، ھەروەھا بە وردی باسی لە مۆدێرنیتەی کوردستانی کرد، ھەروەھا سەر لەنوێ پێناسەکردنەوەی چەمکی نەتەوە و چەندین بابەتی دیکەی ئەم بوارە بە قووڵی لە قسەکانی د.کاوە مەحموود ڕەنگی دایەوە.
دواتریش لە کەشێکی مەعریفیدا، دەرگەی گفتوگۆ کرایەوە، میوانان بۆچوون و دیدگا و پرسیارەکانی خۆیان ئاراستەی پانێلیست کرد و ئەویش وەڵامی دید و سەرنجە جیاوازەکانی دایەوە.
پاشان سوپاسنامە و ڕێزلێنان پێشکەش بە ژمارەیەکی بەرچاو لەو ئەکادیمیست و نووسەر و ڕۆشنبیرانە کرا کە بەشێک بوون لە ئامادەکردنی کتێبەکە لە ئەڵقەکانی بازنەی گفتوگۆدا، سەرنج و پڕۆژەکانیان خستووەتە ڕوو، ئێستا لەم کتێبەدا دید و سەرنجەکانیان کۆکراوەتەوە و کەوتە بەر دیدی خوێنەران.
لە کۆتایی ڕێوڕەسمەکەدا، کتێبی (جینالۆجیای ناسنامە لەناو ھێزە نەرمەکانی نەتەوەدا) پێشکەش بە میوانان و ئامادەبووانی ڕێوڕەسمەکە کرا.
