هەولێر-KDP.info- سیاسەتمەدارێکی کوردستان دەڵێ، پێویستە هەموو لایەک پشتیوانی لە سەرۆک بارزانی بکەن بۆ ڕێبەرایەتیکردنی کورد لەم قۆناغە هەستیارەدا و جەخت دەکاتەوە کە ڕۆڵی مێژوویی و خەمخۆریی بەردەوامی سەرۆک بارزانی ، بووەتە هەوێنی متمانەیەکی گەورەی نەتەوەیی.
ئازاد جندیانی، سیاسەتمەداری کوردستان، لە لێدوانێکی تایبەتدا بۆ ماڵپەڕی فەرمیی پارتی دیموکراتی کوردستان ڕایگەیاند: "ڕۆڵگێڕانی سەرۆک بارزانی لە دەسپێکی ئەوەی پێی ئەووترێ پڕۆسەی ئاشتی لە تورکیا و لە ڕووداوەکانی ڕۆژئاوای کوردستان، پێگەی جەنابیانی وەک مەرجەعێکی باڵای نەتەوەیی پتر چەسپاندووە. بۆیە ئەو متمانە گەورەیەی هەموو پارچەکان بە سەرۆک بارزانییان هەیە، دەرەنجامی ئەو خەمخۆرییە بەردەوامەیە کە بۆ پرسی کورد هەیەتی."
جندیانی ئاماژەی بەوەش کرد، کە پێویستە پرسی مەرجەعییەتی نەتەوەیی لە ململانێی تەسکی حزبی دوور بخرێتەوە: "پێویستە هەموو لایەک پشتیوانی لە سەرۆک بارزانی بکەن بۆ ڕێبەرایەتیکردنی کورد لەم قۆناغە هەستیارەدا ، کە لە ڕابردوو و ئێستاشدا بە کردەیی سەلماندی کە دەتوانێت هەمووان لەدەوری یەکتر کۆبکاتەوە، کە ئەمەش گەورەترین پێویستیی ئێستای کوردە."
ئەو سیاسەتمەدارە لە کۆتاییدا جەختی کردەوە کە بوونی مەرجەعێکی وەک سەرۆک بارزانی، گرەنتییە بۆ دەربازبوونی کورد لە تەنگژەکان و پاراستنی دەستکەوتەکان، و گوتی: "ئەم پێگەیە لە داهاتوویەکی نزیکدا زیاتر ڕەنگ دەداتەوە و دەبێتە کلیلی گەیشتن بە ئامانج و ستراتیژە نەتەوەییەکان، بە سەربەخۆیشەوە“.
قائید میرۆ