میونشن-KDP.info- بە بەشداری نێچیرڤان بارزانی سەرۆكی هەرێمی كوردستان، ئەمڕۆ هەینی 62ـەمین كۆنفرانسی ئاسایشی میونشن لە وڵاتی ئەڵمانیا دەست پێ دەكات.
بڕیارە ئەمڕۆ هەینی لە ڕۆژی كرانەوەی كۆنفرانسەكەدا، زۆربەی سەركردەكانی وڵاتانی ئەوروپا و جیهان ئامادەبن، نێچیرڤان بارزانی سەرۆكی هەرێمی كوردستان لەگەڵ دەیان سەركردەی دیكەی جیهان، یەكێك دەبێت لە میوانە سەرەكییەكانی كۆنفرانسەكە.
كۆنفرانسی ئاسایشی میونشن كە لە ساڵی 1963ـەوە بەڕێوەدەچێت، ئەمڕۆ هەینی دەست پێ دەكات و تا ڕۆژی یەكشەممە 15ی ئەم مانگە بەردەوام دەبێت.
لە دوو ڕۆژی داهاتووی كۆنفرانسەكەدا، نێچیرڤان بارزانی سەرۆكی هەرێمی كوردستان ژمارەیەك دیدار و كۆبوونەوەی گرنگ لەگەڵ بەرپرسە باڵاكانی جیهان ئەنجام دەدات.
بڕیارە لە كۆنفرانسی ئەمساڵی ئاسایشی میونشن 50 سەرۆك و سەرۆك وەزیران و دەیان وەزیری بەرگریی و ناوخۆ و شارەزا و پسپۆڕانی بواری ئاسایش ئامادە دەبن كە گفتوگۆی سەرەكییان لەبارەی پرسەکانی ئاسایش و سیاسەتی دەرەوە و دیارترین ئاستەنگە ئەمنی و ستراتیژییەکان لە جیهاندا دەبێت.
بۆ ئەوەی کۆنفرانسی ئەمساڵی ئاسایشی میونشن لە كەشێكی هێمن و ئارام بەڕێوەبچێت، حكوومەتی ئەڵمانیا 5 هەزار پۆلیسی و هێزی ئەمنی دیاری كردووە پارێزگاری لە مێوانانی كۆنفرانس بكەن.