هەولێر-KDP.info- ئەمڕۆ پێنجشەممە، ٥ـی شوباتی ٢٠٢٦، بە ئامادەبوونی سەرۆک بارزانی و بە بەشداریی ٨٠٠ پزیشک و پسپۆڕی ناوخۆیی و نێودەوڵەتی، ١١ـەمین کۆنگرەی تەندروستیی میزۆپۆتامیا لە ھەولێر دەستیپێکرد، سەرۆک مەسعود بارزانی لە کۆنفرانسی میزۆپۆتامیا باسی دۆخی ڕۆژئاوای کوردستانی کرد و گوتی، "ترسی من ئەوە بوو ببێتە شەڕی کورد و عەرەب کە کارەساتی لێدەکەوتەوە".
بەشێکی قسەکانی سەرۆک بارزانی لە کۆنفرانسی میزۆپۆتامیا:
- دەمەوێت بڵێم، دڵ و دەرگای ھەولێر ھەموو کاتێک بۆ ئیوەی پزیشکان و ئەم جۆرە چالاکییانە کراوەیە. ژمارەیەکی زۆری پزیشکان لە ھەر چوار پارچەی کوردستانەوە ئەمڕۆ لێرەن، ئەمە جێی ئومێد و شانازییە. ئەم جۆرە چالاکییانە زۆر بە قیمەتن. گۆڕینەوەی ئەو زانست و ئەزموونە، خزمەتێکی گەورە بە گەلەکەمان دەکات.
- ئەگەر دەرفەت بڕەخسێت بۆ تاکی کورد، تاکی کورد کەمتر نییە لە خەڵکی تر. پرۆفیسۆر و زانای زۆر گەورە ھەڵکوتوون و ئێمە شانازییان پێوە دەکەین.
- خەریک بوو کارەساتێکی گەورە لە ڕۆژئاوای کوردستان ڕووبدات. ترسی گەورەی من ئەوە بوو، ببێتە شەڕی کورد و عەرەب. بە درێژایی مێژوو، کورد دەستپێشخەری ھیچ شەڕێکی نەکردووە، بەڵکوو شەڕەکەی لە دژی زۆردار بووە، نەک لە دژی میللەت.
- ئەوەی پێمان کرا بۆ رۆژئاوای کوردستان کردمان و پێیەوە سەربەرزین.
- ھەلومەرجی ئەمجارە جیاواز بوو لەگەڵ ساڵی ٢٠١٤، ئەمجارە پێویستی بەوە بوو، ئاگرەکە بکوژێتەوە. سوپاس بۆ خوا شەڕەکە نەبووە شەڕی کورد و عەرەب، شتی ناخۆش ڕوویداوە، بەڵام دەکرا شتی گەورەتر رووبدات.
- سوپاسی خەڵکی ھەرێمی کوردستان و دەزگای خێرخوازیی بارزانی و ھەموو ئەو رێکخراو و کەسایەتی و میدیانە دەکەم کە کۆمەک و ھاوکارییان بۆ خوشک و برایانمان لە رۆژئاوای کوردستان کۆکردەوە.
- من ئومێدەوارم ئەو یەکێتییەی لەسەر ئاستی نەتەوەیی بینیمان، ببێتە بنەمایەک بۆ ھەموو رووداوێکی داھاتوو. ئێمە نابێت بیر لە شەڕ بکەینەوە، بەڵام لە ھەمان کاتیشدا، زوڵمی زۆردارانیش قبووڵ ناکەین.
- سەبارەت بە پرۆسەی ئاشتی لە تورکیا، لە یەکەم رۆژەوە ئێمە پشتیوانیمان لە پرۆسەکە کردووە، ئومێدارین بگاتە ئەنجامێک کە خێری ھەموو لایەکی تێدا بێت.
- ھەوڵی چارەسەرکردنی گیروگرفتەکانی بەردەم پێکھێانی حکوومەتی ھەرێمی کوردستان دەدەین. ئەوەی پێشمان بکرێت بۆ برادەرانمان لە بەغدا بۆ پێکھێنانی حکوومەتی نوێ، ئامادەین پێشکەشی بکەین. بۆ ئەوەی زوو لەم قەیرانە دەربچین، ھەم لە ھەرێمی کوردستان و ھەم لە عێراق؛ بەڵام گرفت زۆرن.
- دۆخی ناوچەکە ئاڵۆز بووە؛ ھیوادارم وڵاتان بە دیالۆگ کێشەکانیان چارەسەر بکەن و شەڕ لە نێوان ھیچ لایەکدا روونەدات، چونکە شەڕ لە بەرژەوەندیی ھیچ لایەکدا نییە و زیان بە ھەمووان دەگەیەنێت.