سلێمانی-KDP.info- یاریدەدەری بەرپرسی مەکتەبی ڕێکخستنی پارێزگای سلێمانی-هەڵەبجە-ڕاپەڕینی پارتی دیموکراتی کوردستان ڕایدەگەیەنێت، کە لەسەر ڕێنوێنییەکانی سەرۆک بارزانی، ئۆرگان و کادیرانی پارتی زیاتر لە هەمیشە چوونەتە ناو جەماوەر و ئامانجی سەرەکیشیان خزمەتکردنی هاووڵاتییانە.
ساناو فەرەیدوون جوانڕۆیی، یاریدەدەری بەرپرسی مەکتەبی ڕێکخستنی پارێزگای سلێمانی-هەڵەبجە-ڕاپەڕین، لە لێدوانێکی تایبەتدا بۆ ماڵپەڕی فەرمیی پارتی دیموکراتی کوردستان گوتی، ''ئەگەر بگەڕێینەوە بۆ بنەماکانی پارتی، دەبینین هەمیشە جەخت لەوە کراوەتەوە کە پێویستە بەرپرس و کادیران لە ناو خەڵکدا بن. سەرۆک بارزانی هەمیشە ڕێنوێنی کردووین کە دەبێت بەردەوام لەناوجەماوەر و لەناوخەڵکدابین و داواکارییەکانی خەڵک لە ئەولەویەتی کارەکانمان بێت، بەتایبەتی دوای کۆنگرەی ١٤، هەڤاڵانمان ئەکتیڤتر و ڕژدترن لە جێبەجێکردنی ئەم ئەرکە نیشتمانی و نەتەوەییەدا.
ساناو فەرەیدوون جوانڕۆیی ئاماژەی بەوەش کرد کە کابینەی نۆیەم بە سەرۆکایەتیی مەسروور بارزانی، سەرەڕای هەموو قەیرانە دارایی و تەندروستی و سیاسییەکان، توانیویەتی خزمەتگوزاریی بگەیەنێتە زۆربەی ناوچەکانی کوردستان. گوتیشی، ''پڕۆژەکانی حکوومەت و هەڵوێستە نەتەوەییەکانی پارتی لە هەڵبژاردنی ڕابردوودا ڕەنگدانەوەی باشیان هەبوو و هاووڵاتییان گەیشتنە ئەو بڕوایەی کە تەنها پارتی دەتوانێت لە کاتی تەنگانەدا پارێزەری دەستکەوتەکان بێت و لە کاتی ئاشتیدا پڕۆژەی خزمەتگوزاریی پێشکەش بکات.
لە کۆتایی لێدوانەکەیدا، یاریدەدەری بەرپرسی مەکتەبی ڕێکخستنی پارێزگای سلێمانی-هەڵەبجە-ڕاپەڕین، دووپاتی کردەوە کە وەکو پارتی پابەندین بە ئەو بەڵێنانەی کە بە خەڵکمان داوە و لەسەر ڕێبازی بارزانی بەردەوام دەبین لە هەوڵەکانمان بۆ دابینکردنی ژیانێکی سەربەرزانە و ئایندەیەکی گەشتر بۆ هەموو کوردستانیان.
قائید میرۆ