ھەولێر-KDP.info- پارێزگاری هەولێر ڕایدەگەیەنێت، گۆڕانكارییە ئیدارییەكان كاریگەریی ئەرێنییان لەسەر ڕایكردنی كاروباری هاووڵاتیان دروست كردووە و جەختیش دەكاتەوە كە پڕۆسەی نوێبوونەوە لە دامەزراوەكاندا بەپێی پێویست بەردەوام دەبێت.
پەیوەست بە گۆڕانكارییە ئیدارییەكان و كاریگەرییە ئەرێنیەکانی لەسەر ڕایكردنی كاروباری هاووڵاتیان، ئومێد خۆشناو، پارێزگاری هەولێر، تایبەت بۆ ماڵپەڕی فەرمیی پارتی دیموكراتی كوردستان دوا و گوتی، "لە ماوەی ڕابردوودا زنجیرەیەک گۆڕانكاریی ئیداری لە سنووری پارێزگای هەولێر بەڕێوەچوون، ئەم هەنگاوانە پێشتریش بوونیان هەبووە و لە داهاتووشدا بەپێی پێویستیی ئیداری بەردەوام دەبن، چونكە گۆڕانكاری نوێگەری لە كاروباری حكوومەتدا دروست دەكات و دەبێتە هۆی نوێبوونەوەی فەرمانگەكان."
پارێزگاری هەولێر ئاماژەی بەوەش كرد كە ئەم گۆڕانكارییانە كاریگەریی بەرچاویان هەبووە، چونكە بەشێكیان لەسەر بنەمای خواستی هاووڵاتیان بووە. گوتیشی، "مەبەست لە هەر گۆڕانكارییەک، تەنها خزمەتكردنی زیاتری هاووڵاتیان و بەرەوپێشبردنی شێوازی پێشكەشكردنی خزمەتگوزارییەكانە."
لە كۆتایی لێدوانەكەیدا، ئومێد خۆشناو جەختی لە دیدگای حكوومەتی هەرێم كردەوە و ڕایگەیاند، "حكوومەتی هەرێمی كوردستان لەسەر بنەمای بەدامەزراوەییكردن بەڕێوە دەچێت. ئێمە دەمانەوێت گۆڕانكارییەكان لەسەر بنەمای زانستی و لێهاتوویی كەسانی ئیداری بن، چونكە پێمانوایە هەر هەنگاوێک بە ئاراستەی دامەزراوەییكردنی سیستەمی ئیداری، دەبێتە هۆكاری سەرەكی بۆ بەهێزكردنی فەرمانگە و دەزگا كارگێڕییەكان."
قائید میرۆ