زاخۆ-KDP.info- پێش ٥٤ ساڵ لەمەوبەر مەلا عەبدوڵڵا غەرزی سەردانی ھەرێمی کوردستان دەکات دوای سەردانەکەش لەسەر فەرمانی بارزانی نەمر، ئیدریس بارزانی جوانەمەرگ گرنگی بە مەلا عەبدوڵڵا غەرزی داوە و نامەیەکی بۆ ساڵح یوسف نوسیووە و تێیدا داوای کردووە گرنگی بە مەلا عەبدوڵڵا بدرێت و مافی پەنابەرایەتی بۆ وەربگرن کە ھاتووە بۆ ھەرێمی کوردستان بۆ لای بارزانی نەمر، ئێستاش دکتۆر فاخر حەسەن پەرتوکێکی لەسەر بەرھەمەکانی نوسیووە و لەسەر ئەرکی سەرۆکی ھەرێمی کوردستان چاپدەکرێت.
پەیوەست بە نووسنی پەرتوکێک لە بارەی بەرھەمەکانییەوە، دکتۆر فاخر حەسەن گوللی، نووسەر، لە لێدوانێکی تایبەتدا بۆ ماڵپەڕی فەرمیی پارتی دیموکراتی کوردستان سەبارەت بە مەلا عەبدوڵڵا غەرزی گوتی، “پێش ٥٤ ساڵ مەلا عەبدوڵڵا غەرزی سەردانی ھەرێمی کوردستان دەکات کە خۆی بەئەسل خەڵکی ڕۆژئاوای کوردستانە و سەردانی بارزانی نەمر دەکات و ئەوکات لە ١٨-٩-١٩٧١ ئیدریس بارزانی نامەیەکی بۆ دەنووسێت بۆ شەھید سەیدا ساڵح یوسف بۆ ئەوەی ھاوکاری بکەن و مافی پەنابەراتی بۆ وەربگرن لە حکوومەتی ئەوکاتی عێراق کە کاتی دانوستان بوو لەنێوان ھەرێمی کوردستان و حکوومەتی ئەوکاتی عێراق، بەڵام ئێستا من دوای ٥٤ ساڵ دیراسەی بەرھەمەکانی ئەوم کردووە و بەرھەمەکانی دەکرێتە پەرتووک، کە بەرھەمی زۆری شیعری ھەیە و ئەوکات کاک ئیدریس گرنگی پێدا ئێستاش کوڕی ئەو سەرۆکی ھەرێمی کوردستان نێچیرڤان بارزانی گرنگی پێدەدات و لەسەر ئەرکی خۆی ئەو پەرتووکە چاپدەکات، بۆیە بەرھەمەکەی مەلا عەبدوڵڵامان کۆکردۆتەوە، چونکە لە ڕۆژئاوای کوردستان بەھۆی ھەڵوێستە نەتەوەیەکانی زۆر ناخۆشیان بۆ دروست کردبوو.
دکتۆر فاخر حەسەن گوللی گوتیشی، دیوانێکی باسی مێژووی کورد و کوردستان دەکات و دیوانێکیشی باسی بارزانیەكان دەکات، کە کەسایەتیەکی زۆر گرنگ بوو و زۆریش گرێدراو بوو بە بارزانی نەمر و کەم دیوانی شیعری ھەبووە باسی بارزانی نەمری نەکردبێت و دیوانی گوڵستانی سەعدی ھەیە لەوێ سەعدی شیرازی سەردانی شیرازی کردووە و باسی بارزانی کردووە، بۆیە کەسێکی زۆر موخلس بووە بۆ بارزانی، ھەر بۆیە ئێمە دیوانەکانمان ھەموو کۆکردۆتەوە و تەواوبووە و لەسەر ئەرکی سەرۆکی ھەرێمی کوردستان بە شێوەزاری کرمانجی و لاتینی چاپی دەکەین، کە پەرتووکەکە شەش بەرگەو بۆ ھەر بەرگێک قامووسێکمان بۆ دروست کردووە، بۆیە زۆر بەوردی کارمان لەسەر کردووە و لێکۆڵینەوەمان لەسەرکردووە و ژیاننامەی نووسراوە و دیوانەکانمان ھەمووی کۆکردۆتەوە و بڕیارە لەماوەی مانگێکی دیکە تەواو بێت و لە مەڕاسیمێکی تایبەتدا بڵاو بکرێتەوە.
پرۆفیسۆری یاریدەدەر دکتۆر فاخر حەسەن گوللی خاوەن ٦١ پەرتووکی چاپکراوە و زیاتر لە ٢٠ پەرتووکی چاپ نەکراوی ھەیە و لە پێشانگای نێودەوڵەتی کتێب لە زاخۆ وەکو نووسەری زۆرترین کتێب لە مێژووی زاخۆ لەلایەن ناوەندی زاخۆ بۆ ڕۆشنبیری و ڕاگەیاندن ڕێزی لێگیرا.
بڵند ئیبراھیم