ھەولێر-KDP.info- ئەمڕۆ دووشەممە ١٥ـی کانوونی یەکەمی ٢٠٢٥، لە بارەگاى مەکتەبى سیاسى پارتى دیموکراتى کوردستان لە پیرمام فازڵ میرانى بەرپرسى دەستەى کارگێڕى مەکتەبى سیاسى پێشوازى لە (محمد کاظم ال صادق) باڵیۆزى کۆمارى ئیسلامى ئێران لە عێراقى فیدراڵ و شاندى یاوەرى کرد.
لە دانیشتنێکدا کە ئازاد بەروارى و محموود محهمهد ئەندامانى دەستەى کارگێڕى مەکتەبى سیاسى و زاگرۆس فتاح ئەندامى مەکتەبى سیاسى ئامادەى بوون، فازڵ میرانى وێڕاى زۆر بەگەرمى بەخێرهێنانى شاندى میوان تیشکى خستە سەر ڕەوشى ئەمڕۆى عێراقى فیدراڵ بەگشتى و هەرێمى کوردستان بەتایبەتى و دووپاتى کردهوه کە پەیوەندییەکانى نێوان حکوومەتى کۆمارى ئیسلامى ئێران و حکوومەتى هەرێمى کوردستان و گەلى کوردستان و گەلى ئێران مێژوویین و لە ئاستى هەرە بەرزی لە قەڵەم دا.
میرانى ئاماژەى بەوەدا "ناوچەکە بە بارودۆخێکى هەستیار تێدەپەڕێت و ئەرکى هەموو لایەکە بە هۆشیارى و تێگەیشتن و لۆژیک مامەڵە لەگەڵ ڕووداوەکان بکات."
هەروەها فازڵ میرانى گوتی "کۆمارى ئیسلامى ئێران پاڵپشتى گەلى کوردستان بووە، هەر لە شۆڕشى ئەیلوول و گوڵانى پێشکەوتنخواز و دواى سەرهەڵدانى ساڵى ١٩٩١، حکوومەت و گەلى ئێران پاڵپشتى سەرکردایەتى و گەلى کوردستان بووە و جێگاى ڕێز و تەقدیره لاى سەرکردایەتى سیاسى کوردستان و گەلى کوردستان."
لەلاى خۆیەوە (محمد کاظم ئال صادق) باڵیۆزى کۆمارى ئیسلامى ئێران لە عێراقی فیدراڵ بەناوى خۆى و شاندەکەیەوە زۆر سوپاسى مەکتەبى سیاسى پارتى دیموکراتى کوردستانى کرد بۆ ئەو پێشوازیە گەرمەى کە لێیان کرا و ڕەخساندنى ئەم دیدارە.
ههر له كۆبوونهوهكهدا ئاغاى محمد کاظم ئال صادق گوتی "پەیوەندیی بەهێزی نێوان گەلى ئێران و گەلى کوردستان و حکوومەتى ئیسلامى ئێران و حکوومەتى هەرێمى کوردستان مێژینەیە و لە بەرژەوەندى هەردوولادایە."
هەروەها ئاغاى محمد کاظم ئال صادق پیرۆزبایى لە سەرکردایەتى پارتى دیموکراتى کوردستان کرد بەبۆنەى سەرکەوتنى لە هەڵبژاردنەکانى پەرلەمانى عێراق و پەسەندکردنى ئەنجامەکان لەلایەن دادگاى فیدراڵى عێراق و سەرکەوتنى گەورەى پارتى دیموکراتى کوردستان لەم هەڵبژاردنەدا و هیواى خواست دواى پەسەندکردنى ئەنجامەکان لایەنە عێراقییەکان دەست بە پێکهێنانى حکوومەتى نوێى فیدراڵى عێراق بکرێت.
هەروەها باڵیۆزى کۆمارى ئیسلامى ئێران خۆشحاڵى خۆى بە سەردانى هەولێر دەربڕى و هیواى خواست هەرێمى کوردستان لە هەموو ڕوویەکەوە هەر لە گەشەسەندندابێت.