دهۆک-KDP.info- ئێوارەی ئەمڕۆ پێنجشەممە ٢٠٢٥/١٠/٢٣ بەڕێز نێچیرڤان بارزانی، لە دھۆک، لە چوارچێوەی بانگەشەی ھەڵبژاردنی ئەنجوومەنی نوێنەرانی عێراقدا، لەگەڵ ژمارەیەکی زۆری مامۆستایان و سەرپەرشتیارانی پەروەردەیی، ڕێکخراوەکانی قوتابیان و لاوان و ئافرەتان و کۆمەڵە و سەندیکا پیشەیییەکان و کادیرانی پارتی لە سنووری پارێزگای دھۆک کۆبووەوە.

بەڕێزیان لە وتەیەکدا باسی لە گرنگی ھەڵبژاردنەکان و ڕۆڵی ڕێکخستنەکانی پارتی لەسەرخستنی لیستی ژمارە ٢٧٥ی پارتی دیموکراتی کوردستان کرد و جەختی لەوە کردەوە کە پارتی کار دەکات بۆ ئەوەی قۆناغی داھاتوو لە عێراق، قۆناغی جێبەجێکردنی دەستوور بێت. 

ئەمەی خوارەوە دەقی وتەکەی بەڕێز نێچیرڤان بارزانیە:

ھەڤالێت ھێژا:

مامۆستا و سەرپەرشتیارێت پەروەردەیی، 

مامۆستایێت زانکویێ، 

سەندیکا و کۆمەڵە و 

ڕیکخراویێت پیشەیی،

کادرێت ماندینەناس و تێکۆشەرێت پارتا دیموکراتا کوردستانێ،

سەرپەرشت و بریکارێت پارتی کو بێگومان ئەڤە زۆر زۆر د گرنگن ل بنگەھێت دەنگدانێ،

قوتابی و لاوان و ئافرەتان، 

وەرزشڤانان، بێگومان وەرزش من ژی ڤەدگریت و یانەیێت وەرزشی،

ھون ھەمو بخێرھاتن سەر چاڤا..

ھوین ھەمی لایەک گەلەک بخێر بێن، ب ڕاستی گەلەک یێ خۆشحالم کو ئەڤرۆ ل دھۆکا ڕەنگین‌، ل بەھدینا ئەم جارەکا دی دگەھینە ئێک دگەل جەماوەرێ خۆشتڤیێ دھۆک و سێمێلا عەزیز، ھون ھەمی لایەک بخێر ھاتن سەر چاڤا.

بەھدینا ب ڕەنگەکێ گشتی، بەھدینا ئەو چیایێ بلند، یێ ھەرگاڤ ل ھەمی نەخۆشییا و ل زەحمەتییا، ھەرگاڤ ل پشت پارتی ڕاوەستایە و بەردەوام بێئومێدی دایە نەیارێت پارتی و بەھدینا یا دگەل پارتی مایەڤە و دێ مینیت.

دھۆکا ڕەنگینە و ھێزا پارتییە، خۆشتڤییا مە ھەمیایە، بەھدینا و دھۆک و خۆشتەڤیا جەنابێ سەرۆک بارزانییە ژی. ب ڕاستی ڤێ سەردانا مە بۆ دھۆکێ خۆشییا مە یا زێدەتر بووی، ئەم گەلەک د خۆشحالین ب وان پێنگاڤێت کو نۆکە ھەی ل گوندێن ڤێ دەڤەرێ، ب ڕەنگەکێ گشتی ئاڤەدانیێ جارەکا دی دەستپێکریەڤە و دەنگێ تەقەی نەمایە و نەخۆشی نەمایە. ھیڤیدارین ئەڤە یا بەردوام بیت و گوندێت مە ئاڤەدان ببن و خۆشی ھەر ھەبێت بۆ ڤێ دەڤەرێ و بۆ ڤی وەلاتی.

ھەڤالینە، جارەکا دی ئەم لێرە یێت کۆم بووی، دا بەحسێ بابەتەکێ گرنگ بکەین ئەو ژی بابەتێ ھەڵبژاردنا پەرلەمانێ عێراقێ یە کو ب ڕاستی ئەڤ ھەڵبژاردنە، ھەڵبژاردنەکا گرنگە بۆ پارتی، بۆ کوردستانێ، بۆ پاشەڕۆژا مللەتێ مە.

بەری کو وە ببینم من گۆت ئەز دێ داخوازەکی ل ھەوە کەم، بەلێ بەری ئەز داخوازا خۆ بکەم، وە بخۆ یێ بلند کری، من گۆت دا ئەز بێژمە وە: پارتی بەرەف یەک ملیۆن دەنگ. ئەرێ ئێک ملیۆن، بەلێ، بەلێ، درستە.

ھەڤاڵینە..

ھون نوێنەرێت ھەمی جڤاکێنە، ژبەر ھندێ ژی ھون ڕاستییا جڤاکێ دزانن کا چەوانە، پێویستی یێت جڤاکێ ھون دزانن، خەون و ئومێدێت جڤاکێ ژی ھون دزانن، چونکی ڕۆژانە کارێ وە دگەل جڤاکێیە، ژبەر ھندێ ھەڤالێت ھێژا کاریگەرییا ھەوە ب تایبەتی یا ھەوە لسەر جڤاکێ، کارگەرییەکا زۆر یا گرنگە. ھون داینەمۆیا جڤاکا کوردستانێنە و وەکی ھەمی جارا بەری نھا ژی ھون کلیلا سەرکەفتنا پارتینە ل بەھدینا. 

وەختێ ئەم بەحسێ سەرکەفتنێ دکەین ل بەھدینا، وەختێ ئەم بەحسێ سەرکەفتنا پارتی دکەین، ئەم بەحسێ سەرکەفتنا کوردستانێ دکەین، ئەگەر پارتی یا ب ھێز بێت، کوردستان یا ب ھێزە، دڤێت ئەڤە بمینیت.

ھەڤالینە، براینە، عەزیزینە..

پارتی ب ھەبوونا ھەوە، ب دڵسۆزییا ھەوە و ب ماندیبوونا ھەوە، کاروانەکێ خەباتێ یێ دەستپێکری و یا پشتڕاستە کو ئەڤ کاروانێ خەباتێ ب ھیممەتا خودێ و ب حەول و قوەتێت خودێ و ب پشتەڤانییا ھەوە دێ یا بەردەوام بیت. ھەوە یەک تشت سەلماند ھەڤالینە، ئێک خال زۆرا گرنگە کو ھەوە سەلماند و بەری نھا ژی وە یا سەلماندی و نھا و بۆ پاشەڕۆژێ ژی مادەم ھون خودانێت پارتینە، باوەرییا وە ھەبیت پارتی دێ یا سەرکەفتی بیت، چونکی ھون خودانێت ڤێ حزبێنە.

لبەر ھندێ ھەڤالینە سۆزا مە چییە؟ سۆزا مە ئێک تشتە، سۆزا مە ئەوە ڕۆژا ١١ێ ھەیڤێ پێکڤە ئەم ھەمی بچینە سەر سندۆقێت دەنگدانێ و دەنگێ بدەینە لیستا ٢٧٥ یا پارتا دیموکراتا کوردستانێ یا کو دێ خزمەتا ھەوە کەت.

ھەڤالینە.. 

دا ئەز بەحسێ خالەکێ بکەم، ئەڤ ھەلبژاردنە بۆچی د گرنگن؟ مە زۆر ھەلبژاردن یێت کری، بەس گرنگییا ڤان ھەلبژاردنا چییە؟

ھەڤالینە، دا ئەز تشتەکێ بۆ ھەوە بێژم، ھون ھند دگەرمن پێویست ناکەت، ئەز بێژم ئەز بچم باشترە. ھەوە ھند ئەز پشتڕاست کرم، ئەز یێ دئاخڤم، ئێک ملیۆن دەنگ یێت بلند دبن د دەستێت وەدا.

دەرەفت ھەیە بەحسێ گرنگییا ھەلبژاردنا بکەم؟ ھەڤالینە دا بەحس بکەین و دەرفەتێ بدەن، بۆچی پێدڤیە پارتی ل بەغدا یا بھێز بیت؟ ئەگەر چنە؟

ساڵا ٢٠٠٣ وەختێ ڕژێما عێراقێ ڕووخیای، پارتی ڕۆلەکێ بنگەھین ھەبوو د ڤێ پرسێدا، ساڵا ٢٠٠٥ دەستوورێ ھەمیشەیی یێ عێراقێ ھاتە نڤیسین، ھندەک مافێت مە یێت پێدڤی د دەستوورێ عێراقێدا ھاتن جێگیرکرن. دەستکەفتەکا مەزن بوو و جھێ سەربلندییەکا مەزن بوو. پارتی و ب تایبەتی ئەز بێژم پێداگرییا سەرۆکێ پارتی، بوو ئەگەرا ھندێ بەشەکێ زۆر یێ مافێت کوردستانییا، ئەڤ خەلکێ ل کوردستانێ دژیت، ب ھەمی پێکھاتاڤە، ھاتە جێگیرکرن د دەستوورێ عێراقێدا. ئەڤە پێنگاڤەکا زۆر یا گرنگ بوو. پشتی ھنگی عێراق کەفتە قۆناغا شەڕی ناڤخۆ و ئاریشێت ناڤخۆ و شەڕێ داعش. شەڕێ داعش ل بیرا وەیە، ئەو قۆناغ و تا نھا و پشتی شەڕێ داعش، نۆکە ب ڕاستی قۆناغەکا نوو یا ل عێراقێ دەستپێکری. 

ھەڤالینە، ئەڤ قۆناغە بۆ ھەرێما کوردستانێ قۆناغەکا گەلەک یا گرنگە؟ بۆچی یا گرنگە؟ ئەم ناڤێ وێ دێ دانێین قۆناغا جێبەجێکرنا دەستوورێ ھەمیشەیی یێ عێراقێ. دەستوورێ ھەمیشەیی یێ عێراقێ، بۆ مە ل ھەرێما کوردستانێ گەلەک یێ گرنگە بھێتە جێبەجێکرن. ئەڤ ئاریشێت کو د ناڤبەرا ھەرێما کوردستانێ و عێراقێدا ھەی، ئەنجامێ ھندێیە کو دەستوور یێ ھاتیە ئیھمالکرن. جارێ لسەر مووچەی، مە ئاریشە یێت ھەی، لسەر ماددەیا ١٤٠ مە ئاریشە یێت ھەی. ئەڤە ھەمی ئەنجامێ ھندێیە چونکی دەستوور وەکی خۆ ناھێتە جیبجیکردن، ئەڤ قۆناغا پشتی ڤان ھەلبژاردنا، دێ ناڤێ وێ دانێین قۆناغا جێبەجێکرنا دەستوورێ عێراقێ.

لبەر ھندێ ھەڤالینە من دڤێت ئەز لێرە ب زەلالی باخڤم. ئەڤ قۆناغا دەستپێکرنا جیبجیکرنا دەستوورێ عێراقێ، گەلەک و گەلەک ل وێ قۆناغێ گرنگترە ئەوا کو دەستوور تێدا ھاتییە نڤیسین. باشە کی دێ بەڕەڤانیێ ل ڤان تشتانە کەت؟ ئەو ھێزا کو دێ بەڕەڤانیێ ل ڤان دەستکەفتا کەت پارتییە. کا دێ بەرسڤا ڤێ پرسیارا من بدەن. پارتی دێ چەوا یا ب ھێز بیت ل بەغدا؟ 

ھەڤالینە، ئەڤ قۆناغە، ئەڤ قۆناغا جیبجیکرنا دەستوورێ یا گرنگە، بۆ کوردستانێ یا گرنگە. ئەگەر مە بڤێت کوردستانەکا ب ھێز مە ھەبیت. سۆزا مە و سۆزا وە ڕۆژا یازدێ ھەیڤێ، پێویستە ئەم سۆزا خۆ بۆ خوینا شەھیدێت خۆ و خەباتا پێشمەرگێت خۆ کو ئەڤرۆ ئەو تشتێ کو مە ھەی لێرە ئەم ھۆسا ب سەربلندی ئێکدو دبینین، ب ڕاستی ماندیبوونا پێشمەرگەێت مە یێت قەھرەمان و خوینا وان شەھیدایە یێت سەرێ خۆ دانای. پێویستە ئەم ڕۆژا دەنگدانێ زۆر بھێزڤە بەرەڤ سندۆقێت دەنگدانێ بچین، مە ئەڤ داخوازە یا ژ خەلکێ خۆ ھەی ل دھۆکێ.

ھەڤالینە،

ئەگەر ئەم بەرێ خۆ بدەینە پارتی. پارتی ناسناما دۆزا کوردا و گەلی کوردستانێ یە ب ھەمی پێکھاتێت خۆڤە. پارتی ساڵا ١٩٤٦ ھاتە دامەزراندن وەکی ھیڤییەکێ بۆ کوردستانێ و بۆ کوردایەتییێ ھاتە دامەزراندن. د سەردەمەکێدا ھاتە دامەزراندن کو کورد و کوردستان د ڕەوشەکا گەلەک یا خرابدا بوون. وێ ڕۆژی پارتی ھاتە دامەزراندن، کورد و گەلی کوردستانێ د وی وەختیدا بێ چارە و بێ ھیڤی و ئومێد مابوون. 

پارتی ھاتە دامەزراندن و ھیڤی و ئومێد جارەکا دی بۆ کوردستانێ ڤەگەڕاندن. ئەنجامێ خەباتا پارتی ل ساڵا ١٩٥٨ و ١٩٦١، ناڤێ کوردا کەفتە د دەستوور و یاسا یێت عێراقێدا. پارتی ساڵا ١٩٦١ێ ڕێبەراتییا مەزنترین شۆڕەشا کوردایەتیێ کر. ساڵا ١٩٧٠ ئەو دەسکەفتێن کو پارتی بەڵگەیێ فەرمییە و دان ب مافێت گەلێ کورد و کوردستانێدا دنێت، لەسەر دەستێ پارتی ھاتە ئەنجامدان. پارتی ئەڤ تشتە وەکی شانازییا خۆ یا دیرۆکی دھێلیتەڤە. ئەو پارتی بوو ئەو دەسکەفت چێکری.

ساڵا ١٩٩١ێ دیسان پارتی ڕۆلەکێ سەرەکی ھەبوو د ڕێکخستن و سەرئێخستنا سەرھەڵدانیدا. پارتی ھێزا سەرەکی یا دانانا سیستمێ دیموکراسی بوو ل عیراقێ و ژبیر نەکەن کۆ ل سالا ١٩٩١ێ سەرۆکێ پارتی ئێکەم کەس بوو داخواز کرییە مەسەلێن مە یێن ناڤخۆ ل کوردستانێ، ب ڕێکا سندوقێن ھەڵبژاردنێ، بھێنە ئێکلاییکرن. واتە داھێنەر و بەرێ بناغەیێ دیموکراسییەتێ ل کوردستانێ، پارتی دیموکراتی کوردستان بوویە. بلا ئەڤە ل بیرا مە بیت. ئەڤە دەستکەفتەکێ مەزن بوو بۆ مە.

ھەڤالینە، 

ئەرکێ پارتی خزمەتا کوردستانێیە ب ھەموو پێکھاتەیانڤە. ئەڤە ئەرکەکە مە بخۆ دانایە و ئەم سەربلندین ب ڤێ چەندێ. بیرا وە دھێت شەڕێ داعش ل سالا ٢٠١٤ێ، خەلکێ وە ل دەڤەرا بەھدینا چ کر بۆ ئەو خەلکێ پێدڤی ب وە بووی؟ وە دەرگەھێن خۆ بۆ ڤەکرن، وە مزگەفتێن خۆ بۆ ڤەکرن، وە مالێن خۆ بۆ ڤەکرن و وە قوتابخانێن خۆ بۆ ڤەکرن. ئەڤ تابلۆیێ پێکڤەژیانا ھەموو گەلان ل کوردستانێ، جھێ سەربەرزی و شانازییا مللەتێ مەیە بۆ ھەتا ھەتا و جھێ شانازییا پارتیە ھەتا بمینیت.

پارتی ئاسایش و ئارامی ل کوردستانێ جێگیر کر. پارتی خزمەت و ئاڤەدانی ئینایە کوردستانێ. ئەم نابێژین کێموکاسی نینە، ئەم نابێژین ئاریشە نینە، ئەم دبێژین ھەنە، بەس بەرێ خۆ بدەنە دەستکەفتێن پارتی. ئەگەر وە بڤێت ببینن پارتی چییە؟ پارتی واتە ئاڤەدانی، پارتی واتە ئاسایش، پارتی واتە سەقامگیری، پارتی واتە خزمەگوزاری.

ئەڤرۆ ژی ئەگەر تەماشەی دەستکەفتێن پارتی بکەین. خەرمانەکا مەزن ل ئاڤەدانیێ و ڕێیان و ئاڤاکرنا خەستەخانەیان ھاتینە کرن. ھەروەسا دووپات دکەم ئایا کێماسی نەمانە؟ بەلێ کێماسی ماینە! ھەر تشتەک یێ درستە؟ نەخێر ھەر تشتەک یێ درست نییە. بەس ئەم د پشتراستین کاروانێ ڤێ ئاڤەدانیێ یێ بەری نۆکە یێ دەستپێکری و نۆکە و د ئایندەدا ژی ب ھیمەت و پشتەڤانییا وە دێ بەردەوام بیت و دێ کوردستانێ ژ ڤێ قۆناغێ گەھینتە قوناغەکا گەلەک باشتر ب ھیڤیا وە ھەمییا.

ھەڤالێن ھێژا،

ڕێنماییا جەنابێ سەرۆک بارزانی بۆ مە، بەردەوام دوو تشتن، "بەرەڤانی ل ولاتی خۆ و ئاڤەدانی. لایەکێ ئەم بەرەڤانێی دکەین و لایەکێ ژی ئاڤەدانیێ".

دا ئەم وەک کورد و خەلکێ ڤێ دەڤەرێ پرسیارەکێ بکەین؟ ئایا مەرج و پیڤان چنە کۆ مرۆڤ دەنگێ خۆ بدەتە حزبەکێ؟ مرۆڤ کۆ ھزرا خۆ بکەت و ل خۆ بپرسیت: ئەز بۆچی دەنگێ خوە بدەمە ڤێ حزبێ؟ ب باوەریا من دێ ھزرا گەلەک تشتا کەت. دێ ھزرێ کەت کا ئەڤ حزڤە چییە و دیرۆکا وێ چییە؟ ڤێ حزبێ بۆ کوردستانێ و مللەتێ کورد و بۆ کوردستانییان چ کرییە؟ دەستکەفتێن وێ چ بووینە؟ ئیدارا وێ یا چاوایە؟ ئەرێ بەرسڤا ڤان ھەموو پرسیاران چ حزبەکە؟

بێگومان پارتییە. ھەر پارتییە دشێت بەرسڤا خەلکی بدەتەڤە و بێژیت "ئەزم پارتیمە، ئەم ھەموونە".

ئەڤ ئەنجامێن مە بدەستڤە ژی ئینای، ژ ئەنجامێ بەردەوامییا پشتەڤانییا وە ھەموویانە. بەس بۆ بەرسڤا ڤان پرسیارا، کا کێ ئاڤەدانی کر؟ کێ سەقامگیری دروست کر؟ کێ کوردستان ژ قۆناغەکێ برە قۆناغەکا دی؟ بەرسڤ: "پارتی" یا یەک ملیون دەنگ!

د ڕۆژێن بەرتەنگ و تاریدا، کێ ھیڤی دا خەلکی؟ کی دێ شێت سوبەھییەکا باشتر بدەتە ڤی مللەتی؟ کی دێ شێت ئایندەیەکا باشتر بدەتە ڤی میللەتی؟ ھەڤالێن ھێژا، ھەر کەسەک و ھەر دەنگدەرەک داخازا بەرسڤا ڤا پرسیارا بکەت، پێدڤییە ھوین بێژنێ کەرەمکەن، ئەڤە دیرۆکا مە. کەرەمکەن ئەڤە بەڵگەنامەیا مەیە بۆ ئاڤەدانییا کوردستانێ.

ھەڤالان، بێگومان دەمێ کار بێتە کرن، دێ کێموکاسی ژی ھەبن. بەلێ وەک ھەموو جاران، بھەڤرا دێ وان کێماسییا ژی چارەسەر کەین. ئەڤ ئاریشێن مە دگەل بەغدا ژی ھەین، دێ چارەسەر بن. من بەری نھا ژی گۆت: مەسەلا مووچەی، نابیت ببیتە منەتەک لسەر سەرێ مە، یان لسەر سەرێ وە. دڤێت مووچەخۆرێن ھەرێما کوردستانێ وەکی مووچەخۆرێن عێراقێ، پێدڤییە مووچەیێ وان بدەن. نھا ئەزێ کەیفخۆشم کو دبینم پێنگاڤێن باش بەرەڤ چارەسەرکرنا ڤێ ئاریشێ ھاتینە ھاڤێتن و ئەڤە ژی کارەکێ زۆرێ باشە.

ھەڤالان، 

ھوین نوێنەرێن ڕاستەقینە یێن جڤاکێنە و داخوازا من ئەڤرۆ ژ وە، ئەم ھەموو ب ھەڤرا ژ دل و ب گەرمی ڕۆژا ١١-١١-٢٠٢٥ بچینە سەر سندوقێن دەنگدانێ و دەنگێ خوە بدەینە لیستا ٢٧٥ یا پارتی دیموکراتی کوردستان.

پارتی ب ھەوە یا پشتڕاست و پشتگەرمە و ژ بیر نەکەن کو پارتی حزبا خەون و ھیڤییێن کوردستانێیە. بانگەشەکا ئارام و تەنا لدویف ئاست و ناڤ و پێگەھێ پارتی بکەن. خۆ نەئیننە ئاستەکێ نزم. بەرسڤا ئاخڤتنێت کەسێ ژی نەدەن، چونکی  ژبەر ئێک ئەگەر، ئەو ژی "پارتی حزبا حساباتێت بچویک نییە، پارتی حزبا ئارمانجێت مەزنێت گەلێ کوردستانێیە".

پارتی یا مەزنە وەکی دیرۆکا خۆ، وەکی دەستکەفتێت خۆ. پارتی یا مەزنە وەکی ھیڤی و ئومێدێت کورد و کوردستانێ. پارتی یا مەزنە وەکی سەرۆکێ خۆ. پارتی و گەلێ کوردستانی ب ڕێبەرییا سەرۆک بارزانی، ھەر دێ بەردەوام بن ژ کاروانێ خەباتێ و ھیچ دەمەکێ ئەوا د شیاندا بیت، خەمساریێ نەکەت ژ خزمەتکرنا ڤی مللەتی.

وەکی ھەر جار، ب ڕاستی دڤێت بێژم کو من پەیڤەک نینە سوپاسییا ھەموو مللەتێ کورد بکەم، ئەوێن کو لپشت پارتی ڕاوەستایی و بتایبەتی د ھەلبژاردنێن بەری نۆکەدا، وە سەرێ مە یێ بلند کری و وە سەرێ پارتی یێ بلند کری. ئەز باوەرم ڤێ جارێ ژی وەکو ھەموو جاران ھوین ناھێلن حزبا وە بشکێت.

دێ حزبا خۆ سەرئێخن؟

دێ کەینە چەند دەنگ؟

ئەم دێ دەنگێن خوە بۆچی دەینە پارتی؟" بۆ ھندێیە داکو پارتی ل بەغدا یا بھێز بیت دا کوردستانەکا بھێز مە ھەبیت".

ھەڤالان سویندا مە ب خودایێ مەزنە، پشتەڤانییا مە ژی ب خودایێ مەزنە. چونکی مە گۆتییە و دێ بێژین: کوردستان پێدڤییە بمینیت، قەوارە و دەسھەلاتا ھەرێما کوردستانێ پێدڤییە بمینیت. داکو بمینیت پێدڤییە پارتی یا بھێز بیت دا ئەڤ دەستکەفتە بەرەڤ پیشڤە بچن".

گەلەک سپاس..