دھۆک-KDP.info- دوای کردنەوەی ڕێگەی جووتسایدی لالش - شێخان لەلایەن سەرۆکوەزیرانی ھەرێمی کوردستانەوە، ڕاوێژکارێکی سەرۆکوەزیرانی ھەرێمی کوردستان بۆ کاروباری ئێزدییەکان دەڵێت، ڕێگەی شێخان بۆ پەرستگەی لالش، ڕێگەیەکی تەسک و قەرەباڵغ بوو و زۆر زەحمەتیش بوو، بەڵام دوای ئەوەی مەسروور بارزانی سەردانی پەرستگەی پیرۆزی لالشی کرد، بڕیاری دا ڕێگەی شێخان بۆ لالش بکاتە جووتساید.

ڕێککەوتی ٢١-٠٩-٢٠٢٤، مەسروور بارزانی، سەرۆکی حکوومەتی ھەرێمی کوردستان، لە ڕێوڕەسمێکدا بەردی بناغەی جووتسایدی شێخان- لالشی لە سنووری پارێزگای دھۆک دانا، ھاوکات لە ڕێککەوتی ٢٠-٠٩-٢٠٢٥، ڕێگەی جووتسایدی لالش - شێخان بە ئامادەبوونی مەسروور بارزانی کرایەوە.

لەو بارەیەشەوە، ھەرمان میرزا بەگ، ڕاوێژکاری سەرۆکوەزیرانی ھەرێمی کوردستان، تایبەت بۆ ماڵپەڕی فەرمیی پارتی  دیموكراتی كوردستان دوا و گوتی، "لە ٢١ـی مانگی ئەیلوولی ساڵی ڕابردوو، مەسروور بارزانی، سەرۆکی حکوومەتی ھەرێمی کوردستان بەردی بناغەی بۆ ڕێگەکەی دانا و زیاتر لە ٢٦ ملیار دیناری لێ خەرج کرا، پڕۆژەکە درێژییەکەی نزیکەی ٤ کیلۆمەترە و لەلایەن کۆمپانیای نۆرسلایتەوە دروست کراوە، ھاوکات پڕۆژەکە دوو مانگ پێش کاتی خۆی تەواو کرا.

هەرمان میرزا بەگ، گرینگیی ئەم پڕۆژەیە باس دەکات و دەڵێت، ساڵانە لە جەژنەکانماندا قەرەباڵغییەکی گەورەی ھاتوچۆ ھەبوو، خەڵک چەند کاتژمێرێک لەناو قەرەباڵغییەکەدا دەمانەوە، ھەروەھا ئاستەنگ لە بەردەم ھاتوچۆی ھاووڵاتیان لە ناوچەکەدا ھەبوو، ئەگەری ڕووداوی ھاتوچۆ و قوربانیی مرۆیی زۆر بوو، بەڵام ئێستا ڕێگەکە فراوانە و ئەو کاتەی کە پێویستە بۆ گەیشتن بە زیارەتکاران کەم دەبێتەوە، ئەمەش بەرھەمی کابینەی نۆیەمە.

ناوبراو ھەروەھا ئاماژەی بەوەش کرد كە حکوومەتی ھەرێمی کوردستان بە سەرۆکایەتیی مەسروور بارزانی، خزمەتێکی بێوێنە پێشکەش بە پێکھاتەی ئێزدیان دەکات، هەر لە ھاوکاریکردنی ڕزگاربووانی دەستی داعش، کردنەوەی ناوەندێکی دەروونی، پڕۆژەی خزمەتگوزاری لە ناوچە ئێزدییەکان،  نۆژەنکردنەوەی شوێنە ئایینییەکانی پەرستگەی لالش، کۆمەڵگە، گوندەکان، ھاوکاریکردنی خوێندکار و گەنجانی ئێزدی.

دڵگەش باعەدری