ھەولێر-KDP.info- وەزیری گواستنەوەی حکوومەتی ھەرێمی کوردستان رایدەگەیەنێت، دیزاینێکی تازە و سەردەمیانە بۆ فڕۆکەخانەی نێودەوڵەتیی دھۆک ئامادە کراوە و بڕیارە لەگەڵ کۆمپانیایەکی نێودەوڵەتیی ناسراو بە قۆناغ لە داھاتوویەکی نزیکدا دەست بە دروستکردنی بکەین.
ئانۆ جەوھەر، وەزیری گواستنەوەی حکوومەتی ھەرێمی کوردستان، تایبهت بە ماڵپەڕی فەرمیی پارتی دیموکراتی کوردستانی ڕاگەیاند، فڕۆکەخانەی نێودەوڵەتیی دھۆک پێش زیاتر لە ١٠ ساڵ دیزاینێکی بۆ ئامادە کرابوو و ئەو دیزاینە بۆ ئێستای فڕۆکەخانەکان پێویست بوو گۆڕانکاریی تێدا بکرێت بەھۆی پێشکەوتنەکانەوە، کە زۆرێک لەو وڵاتانەی فڕۆکەخانەشیان ھەبوو، فڕۆکەخانەی تازەیان دروست کرد، بۆیە فڕۆکەخانە و شێوەی دروستکردنیان ساڵ دوای ساڵ دەگۆڕدرێت.
هەر سەبارەت بە دیزاینی فڕۆکەخانەکە، وەزیری گواستنەوەی حکوومەتی ھەرێمی کوردستان باس لەوە دەکات، لە ساڵی ٢٠٢٣دا ئێمە دیزاینێکی تازەمان بۆ فڕۆکەخانەی نێودەوڵەتیی دھۆک ئامادە کرد و ئێستاش لەگەڵ کۆمپانیایەکی نێودەوڵەتیی ناسراو سەرقاڵی بابەتی شێوازی دروستکردنی فڕۆکەخانەکەین و لە داھاتوویەکی نزیکدا کار دەکەین بۆ ئەوەی بە قۆناغ دەست بە دروستکردنی فڕۆکەخانەکە بکرێت و دوای تەواوبوونیشی بکەوێتە خزمەت ھاووڵاتیانی خۆشەویستەوە.
بڵند ئیبراھیم