هەڵەبجە-KDP.info- هەنگاوەكانی پڕۆژەی ڕووناكی لە كوردستان خێران و 4 ملیۆن هاووڵاتی و 115 هەزار شوێنی بازرگانی کارەبای 24 كاتژمێرییان پێ گەیشتووە، هاووڵاتیان دڵخۆشن و سوپاسی سەرۆكی حكوومەت دەكەن و دەڵێن، ئیدی ژینگە پاك دەبێتەوە و دەنگی مۆلیدە لە كۆڵانەكان نامێنێت.
مامۆستا ئەنوەر هەورامی، په‌یوه‌ست به پڕۆژه‌ی كاره‌بای 14 كاتژمێر بە ماڵپەڕی فەرمیی پارتی دیموكراتی كوردستانی ڕاگەیاند، "من وەك هاووڵاتییەك دەستخۆشیم بۆ جەنابی سەرۆك بارزانی هەیە، كە سەرۆكوەزیران مەسروور بارزانی ڕاسپارد كارەبای 24 كاتژمێری بۆ هەڵەبجە پێشبخات و وەک یەكەم پارێزگای كوردستان و عێراق ببێتە خاوەنی كارەبای 24 كاتژمێری، بەڕاستی كارێكی جوانە و پێمان دەڵێ حكوومەت پەرۆشی خزمەتكردنی هەڵەبجەییەكانە.
دایە حەمدییە بەكر، لەبارەی كارەبای 24 كاتژمێرییەوە، بۆ ماڵپەڕی فەرمیی پارتی دیموكراتی كوردستان گوتی، "سەرۆکوەزیران مەسروور بارزانی، خه‌مخۆر و دڵسۆزی گەلەكەیەتی، بۆیە سوپاسی دەكەین بۆ كۆتاییهێنان بە قەیرانی كارەبا و ئێستا ئێمە بووینەتە خاوەنی كارەبای 24 كاتژمێری، بەڕاستی كارێكی باشە، چونکە مۆلیدە ژینگەی وڵاتی پیس دەكرد و ژاوەژاوی هەبوو، کە ئێمە 2 ئەمپێر كارەبامان هەبوو و جگە لەوەی نرخەکەی گران بوو، نەشماندەتوانی وەك پێویست پێداویستییەكانمانی پێ دابگیرسێنین، بۆیە پڕۆژەی ڕووناكی زۆر دڵخۆشی كردووین.
لە چوارچێوەی پڕۆژەی ڕووناكی، ئێستا 4 ملیۆن هاووڵاتی و 115 شوێنی بازرگانی سوودمەندن لە كارەبای 24 كاتژمێری، بڕیارە تا كۆتایی ساڵی 2026یش كوردستان بە گشتی ببێتە خاوەنی كارەبای 24 كاتژمێری.
عەرەب محەمەد، هاووڵاتییەكی تری سوودمەندی كارەبای 24 كاتژمێری، لای خۆیەوە بە ماڵپەڕی فەرمیی پارتی دیموكراتی كوردستانی ڕاگەیاند، دەمەوێت بڵێم كارەبای 24 كاتژمێری جێگای شانازییە و ئەوە دوو هەنگاوی گرینگی سەرۆك بارزانی بوون بۆ هەڵەبجە، یەكەم لە بەغداوە هەڵەبجەی كردە پارێزگا، دووەمیش وەك یەكەم پارێزگای سەر ئاستی عێراق و كوردستان كردینیە خاوەنی كارەبای 24 كاتژمێری.
دەشڵێ، من کە ساڵانێكی زۆر پێشمەرگە بووم بۆ ئازادی و خۆشبەختیی گەلەكەم، پێموایە كارەبای 24 كاتژمێری هەنگاوێكی گرینگی حكوومەتەكەمانە بۆ گەلەكەی، ئێمە چاوەڕێ زیاتریش لە حكوومەتی خۆمان دەكەین.
عەزیز ڕەسووڵ