هه‌ولێر-KDP.info- گوتەبێژی وەزارەتی دادی حکوومەتی ھەرێمی کوردستان رایدەگەیەنێت، پڕۆژەی نیشتیمانیی ستراتیژیەتی بەھێزکردنی سەروەریی یاسا و چەسپاندنی دادپەروەری بۆ پێنج ساڵی داھاتوو ڕادەگەیەندرێت و ئامانج لێی جێبەجێکردنی بەندەکانی دەستووری عێراقە، کە کلیلی چارەکردنی کێشەکانی نێوان ھەولێر و بەغدایە.

گوتەبێژی وەزارەتی دادی حکوومەتی ھەرێمی کوردستان، نەریمان تالب، بە ماڵپەڕی فەرمیی پارتی دیموکراتی کوردستانی ڕاگەیاند، لە سەرەتای مانگی حەوتی ئەمساڵدا بریکاری وەزارەتی دادی حکوومەتی ھەرێمی کوردستان و جێگری دووەمی سەرۆکی تیمی نیشتیمانی لە بەغدا بەشدارییان لە کۆنفرانسی ڕاگەیاندنی ستراتیژی بەھێزکردنی سەروەریی یاسا و چەسپاندنی دادپەروەری بۆ ساڵی ٢٠٢٥ تا ٢٠٢٩دا کرد، کە ئەم ستراتیژیەتە بەرھەمی کاری ھاوبەشی  نوێنەرانی دەزگا و لایەنە پەیوەندیدارەکانە، کە لە ماوەی ساڵانی ڕابردوو ناویان ھاتووە لە فەرمانی دیوانی ژمارە ٧٠ی ساڵی ٢٠٢٤، کە دووپاتکردنەوە لە سەروەریی یاسا، ھیچ مانایەکی نامێنێت ئەگەر دەستوور سەروەریی نەبێت و بەندەکانی دەستوور بە تەواوی جێبەجێ نەکرێن، کە کلیلی چارەسەری کێشەکانی نێوان ھەرێمی کوردستان و بەغدایە.

گوتەبێژی وەزارەتی دادی حکوومەتی ھەرێمی کوردستان ڕوونیشی دەکاتەوە، ڕێکخراوی لێکۆڵەر پاڵپشتە بۆ سەروەریی یاسا  و خاوەن دەستپێشخەریی پڕۆژەکە بووە لەگەڵ ڕێکخراوی نێودەوڵەتیی NPAی نەرویجی، کە پاڵپشتی دارایی پڕۆژەکە بووە، بۆیە پلانی جێبەجێکردنی پڕۆژەکە ئامادە دەکرێت و لەسەر ئاستی حکوومەتی عێراق و ھەرێمی کوردستان بەندەکانی ناوەڕۆکی ستراتیژیەتەکە بۆ پێنج ساڵی داھاتوو دەبێت.

نەریمان تالب، هەروەها ئاماژەی بۆ ئەوەش کرد، ھەر لە مانگی حەوتی ئەمساڵدا وەزیر و بریکاری وەزیری دادی حکوومەتی ھەرێمی کوردستان بەھۆی پاڵپشتیی رێکخراوی لێکۆڵەر بۆ پاڵپشتیکردنی سەروەریی یاسا و رێکخراوی NPAی نەرویجی لە کاتی نووسینەوە و دانانی ستراتیژیەتی نیشتیمانی بۆ بەھێزکردنی سەروەریی یاسا و چەسپاندنی دادپەروەری ئامادە بوون، چونکە ڕۆڵێکی گرنگیان ھەبوو لە شوێنکردنەوە و چەسپاندنی سەروەریی یاسا و چەسپاندنی دادپەروەری لە کاتی داڕشتن و ئامادەکردن و نووسینەوە و ڕاگەیاندنی ستراتیژیەتەکە، کە بریتی بوو لە جێبەجێکردن و چەسپاندن و پاراستنی دەستووری عێراق و جێبەجێکردنی ماددەکان و سازشنەکردنی لەسەر مافە دەستوورییەکانی ھەرێمی کوردستان لە دەستووری عێراقدا، کە وەزارەتی داد دووپاتی کردەوە ئەو بنەمایانە کە داواکاریی ئێمە بوون، ببنە بابەتی سەرەکیی ستراتیژیەتەکە، کە پێشتر لە رەشنووسەکەدا جێی نەکرابووەوە.

ناوبراو دەشڵێت، بۆ ئه‌و مه‌به‌سته‌ش تیمی نیشتیمانیی ستراتیژیەتی بەھێزکردنی سەروەریی یاسا و چەسپاندنی دادپەروەری لەگەڵ وەزیری ناوخۆی حکوومەتی ھەرێمی کوردستان دوایین ھەنگاوەکانی پلانی ستراتیژیەتی نیشتیمانییان تاوتوێ کرد و وەزیری ناوخۆی حکوومەتی ھەرێمی کوردستانیش پشتگیریی خۆی بۆ ئەو ستراتیژیەتە دووپات کردەوە دوای ئەوەی پڕۆژەکە لەلایەن ئەنجوومەنی وەزیرانی ھەرێمی کوردستانەوە پەسند دەکرێت.

بڵند ئیبراھیم