ھەولێر-KDP.info- گوتەبێژی پارتی دیموکراتی کوردستان لە کۆنگرەیەکی ڕۆژنامەوانیدا باسی لە دواین پێشهاتەکان و پێکهێنانی کابینەی نوێی حکوومەتی هەرێمی کوردستان و بارودۆخی سلێمانی و پەیوەندییەکانی نێوان هەولێر و بەغدا كرد.
مەحموود محەمەد، ئەندامانى دەستەى کارگێر و گوتەبێژی پارتی دیموکراتی کوردستان گوتی، "شاندی هاوبەشی یەکێتی و پارتی لەسەر پرەنسیپەکانی پێکهێنانی حکوومەت گەیشتوونەتە ڕێککەوتن و دابەشکردنی پۆستەکانیش تا ڕادەیەکی زۆر یەکلایی بوونه‌تەوە. ئاماژەشی دا، بڕیارە لە چەند ڕۆژی داهاتوودا کۆبوونەوەی تر بکرێت و چاوەڕوان دەکرێت لە مانگی داهاتوودا، پەرلەمانی کوردستان سەرۆکایەتییەکەی هەڵبژێرێت و دەست بە کارەکانی بکات.
سەبارەت بە بارودۆخی سلێمانی، مەحموود محەممەد جەختی لەوە کردەوە کە پێویستە ڕێگە نەدرێت ئەو بارودۆخە ببێتە هۆی نیگەرانی خەڵک. گوتیشی، "خەڵکی سلێمانی شایەنی ئەوە نین چیتر بەم شێوەیە نیگەران بکرێن. داواشی کرد کە کێشەکان چارەسەر بکرێن و یاسا سەروەر بێت.
لە وەڵامی پرسیارێکدا دەربارەی ئەوەی کە ئایا پێکهێنانی کابینەی نوێی حکوومەت دەکەوێتە پێش یان دوای هەڵبژاردنەکانی عێراق، گوتەبێژی پارتی ئەوەی خستە ڕوو، ئەگەر سەرۆکایەتی پەرلەمان پێکبهێنرێت، ئەوا پرۆسەکانی دیکە بەپێی کات و ڕێکاری یاسایی خۆیان بەڕێوە دەچن.
لەبارەی پەیوەندییەکانی نێوان هەرێمی کوردستان و بەغدا، مەحموود محەممەد ڕەخنەی لە سیاسەتەکانی بەغدا گرت بەرانبەر بە خەڵکی کوردستان و گوتی، "ئەوەی بەغدا بەرانبەر خەڵکی کوردستان دەیکات، برسیکردنی خەڵک و فشارخستنەسەرە، ئەگەر نە ڕێککەوتنی باش لە نێوان حکوومەتی هەرێمی کوردستان و حکوومەتی عێراق کراوە، جەختیشی کردەوە پێویستە کێشە هەڵپەسێردراوەکان لە ڕێگەی دیالۆگ و بەپێی دەستوور چارەسەر بکرێن، نەک بە بیانوو هێنانەوە بۆ دواخستنی چارەسەر.
گوتەبێژی پارتی دیموکراتی کوردستان دووپاتی کردەوە کە پارتی دیموکراتی کوردستان لە خەمی خەڵک و مووچەخۆران و پاراستنی دەستکەوتەکانی هەرێمی کوردستانه و بڕیارمان ئەوەیە کە حکوومەتی عێراق دەبێت بەپێی دەستوور کێشەکان چارەسەر بکات.