دھۆک-KDP.info- جێگری پارێزگاری دھۆک دەڵێ، بڕیار دراوە لە سنووری پارێزگای دھۆک بە شێوەیەکی گشتی ئەو پڕۆژانەی تەواو نەکراون و پێویستن، تەواو بکرێن و بکەونە خزمەت ھاووڵاتیانی خۆشەویستی سنووری پارێزگای دھۆک.
ماجید سەید ساڵح، جێگری پارێزگاری دھۆک، بە ماڵپەڕی فەرمیی پارتی دیموکراتی کوردستانی ڕاگەیاند، کۆبوونەوەیەکی فراوان لە پارێزگای دھۆک بە بەشداریی بەرپرسانی یەکە ئیدارییەکانی سنوورەکە ئەنجام درا و بڕیار دراوە بەپێی ھەڵسەنگاندنی قەزا و ناحیەکان ئەو پڕۆژانەی پەیوەندییان بە خەڵکی سنووری پارێزگاکەوە ھەیە، پێویستە کارکردن تێیاندا دەست پێبکاتەوە و تەواو بکرێن.
جێگری پارێزگاری دھۆک گوتیشی، ئەو پڕۆژانە زیاتر پەیوەندییان بە خەڵکەوە ھەیە، کە لە ھەر شوێنێک وەستاون قایمقامی قەزاکان یاخود بەڕێوەبەرەکان ھەڵسەنگاندنیان بۆ دەکەن و دەست بە تەواوکردنیان دەکرێت، کە ئەوان دیاری دەکەن کامە پڕۆژە زیاتر پێویستە بۆ سنوورەکەیان، چونکە لە ھەندێک ناوچە پڕۆژە ھەن بڕیار دراوە کارکردن تێیاندا دەست پێبکاتەوە و تەواو بکرێن، ئەمەش لە پێناو ئەوەی خزمەتی زیاتری خەڵکی خۆمان بکرێت و پڕۆژەکان تەواو بکرێن و بکەونە خزمەت ھاووڵاتیانەوە، بۆیە ئەمە بڕیارێکی گرنگە و لە ھەر ناوچەیەک ھەر پڕۆژەیەک پێویستە و پەیوەندیی ڕاستەوخۆی بە ژیانی خەڵکەوە ھەیە، کارکردن تێیاندا دەست پێدەکاتەوە و تەواو دەکرێن.
بڵند ئیبراھیم