هه‌ولێر -KDP.info- گوته‌بێژی یه‌كێتی زانایان ئاماژه‌ی بۆ ئه‌وه‌كرد، "مامه‌ڵه‌كردن به زه‌وی فه‌رمانبه‌ران كێشه‌ی تێدا نیه، بەو مەرجەی پارچه زه‌ویه‌كه ده‌رچووبێت و ژماره و نه‌خشه‌ی دیاربێت."
د. عه‌بدوڵڵا شێركاوه‌یی، گوته‌بێژی یه‌كێتی زانایانی ئاینی كوردستان، تایبەت به ماڵپه‌ڕی فه‌رمیی پارتی دیموكراتی كوردستانی ڕاگه‌یاند، "مامه‌ڵەكردن به زه‌وی فه‌رمانبه‌ران، ئه‌وه‌ی ئێستا له‌لایه‌ن حكوومه‌تی هه‌رێمی كوردستانەوە دابه‌ش ده‌كرێت دوو جۆره، ئه‌و زه‌ویانه‌ی دابه‌شكراون و ژماره‌ی پارچه زه‌ویه‌كه دیاره و نه‌خشه‌ی ئاماده‌یه ئه‌وه له‌ڕووی شه‌رعیه‌وه هیچ كێشه‌ی له‌سه‌ر نیه و دەکرێت مامه‌ڵەی پێوه بكەن.
بەڵام ئه‌و فه‌رمانبه‌رانه‌ی فۆڕمیان پێشكه‌ش كردووه و هێشتا ناویان نه‌گه‌ڕاوه‌ته‌وه، واته ژماره‌ی زه‌وی نیه و له‌سه‌ر نه‌خشه‌ش هیچ زه‌ویه‌كیان بۆ دیاری نەکراوە، له‌ڕووی شه‌رعییەوە دروست نییه کڕین و فرۆشتنی پێوه بكرێت، چونكه ئه‌گه‌ر شتێك وجودی نه‌بێت و نادیار بێت مامه‌ڵه‌ی پێوه ناكرێت."
له‌باره‌ی ده‌ركردنی فتوا له بارەی پرسی زه‌وی فه‌رمانبه‌ران د. عه‌بدوڵڵا شێركاوه‌یی گوتی، "بابه‌ته‌كه له‌ڕووی شه‌رعیه‌وه ڕوونە، به‌ڵام ئەگەر له‌گه‌ڵ پرۆسه‌ی دابه‌شكردنی زه‌وی شتێکی نائاسایی هاتە پێشەوە و پێویستی بە فەتوا هەبوو، ئەو کات ئەنجوومەنی باڵای فەتوا قسەی خۆی دەبێت."
به‌پێی دواین ئاماری وه‌زاره‌تی شاره‌وانی و گه‌شتوگوزار تا ئێستا نزیكه‌ی 480 هه‌زار فه‌رمانبه‌ر، پێشمه‌رگه و خانه‌نشین ڕه‌زامه‌ندی وه‌رگرتنی زه‌وییان هەیە، به‌پێی به‌دواداچوونی ماڵپه‌ڕی فه‌رمیی پارتی دیموكراتی كوردستان، تا ئێستا زۆرترین پارچه زه‌وی له هه‌ولێر و ده‌وروبه‌ری دابه‌ش كراوه كه نزیكه‌ی 30 هه‌زار پارچه زه‌ویه، بڕیاره له حه‌فته‌ی داهاتووش له هه‌ولێر و سلێمانی زه‌وی به‌سه‌ر ژماره‌یه‌كی دیكه‌ی فه‌رمانبه‌ر دابه‌ش بكرێت."
قائید میرۆ