هەولێر-KDP.info- پارێزگاری هەولێر ڕایگەیاند، لە ماوەى شەش مانگى ڕابردوودا لەسەر ئاستى هەرێمى کوردستان، لەلایەن بەڕێوەبەرایەتیى پۆلیسى پارێزگای هەولێرەوە، زۆرترین داواکراو لە ڕێگەى سیستمى بەدواداچوون و دەستگیرکردنى تۆمەتباران، کە ژمارەیان (702 تۆمەتبار)ە، دەستگیر کراون.
ئومێد خۆشناو، پارێزگای هەولێر، بۆ ماڵپەڕی فەرمیی پارتی دیموکراتی کوردستان، وێڕاى خستنەڕووی ئەو ئامارە، دەستخۆشی لە بەڕێوەبەر و ئەفسەران و کارمەندانی بەڕێوەبەرایەتیی پۆلیسى پارێزگای هەولێر بە گشتى کرد لە بەرامبەر ڕاپەڕاندنى ئەرک و کارەکانیان و ڕوونیشی کردەوە: "جارێکى تر جەخت لەسەر گرنگیی ڕۆڵی پۆلیس دەکەینەوە لە بەرقەرارکردنی یاسا و پاراستنی سەر و ماڵ و گیانی هاووڵاتیان، هەروەها ڕۆڵیان لە جێبەجێکردن و بەرقەراکردنى یاسا، بەرزنر دەنرخێنین و هیوای سەرکەوتنی زیاتریان بۆ دەخوازین".
ئومێد خۆشناو هەروەها ڕوونی کردەوە: "وەکو پارێزگاى هەولێر، هاوشاریانی خۆشەویستی شارەکەمان دڵنیا دەکەینەوە بە پشتبەستن بە توانا و چاوکراوەیی و لێهاتوویى هێزەکانى ئاسایش و پۆلیس و ناوخۆ، شەو و ڕۆژمان خستووەتە سەر یەک بۆ پاراستنی ئارامى و ئاسایشی شار و سەلامەتی و پارێزگاریکردن لە سەر و ماڵ و گیانى هاووڵاتیان".
ئومێد بابان