ھەولێر -KDP.info- سەرۆكی گشتی یەكێتی هاوردە و هەناردنكارانی كوردستان دەڵێت، "پێوەندییە بازرگانییەكان بەردەوامن، دەوڵەتانی عەرەبی تا بەرهەمی كشتوكاڵی كوردستان هەبێت بەرهەمی وڵاتانی تر هاوردەی بازاڕەكانیان ناكەن.
ئۆفیسی كۆمپانیای ئۆتۆمبێل لە كوردستان لە زیادبوون دایە، بەتایبەت وڵاتی چین، ئەوروپا و ئەمریكا."

شێخ مستەفا شێخ عەبدولڕەحمان سەرۆكی گشتی یەكێتیی هەناردە و هاوردنكارانی كوردستان، لە لێدوانێكی تایبەت بە ماڵپەڕی فەرمیی پارتی دیموكراتی كوردستانی ڕاگەیاند "هاوردەكاران پەیوەندییە بازرگانییەكانیان لەگەڵ دەوڵەتان بەردەوامە، پەیوەندی بازرگانی لەگەڵ دەوڵەتە دراوسێكان، یەكەم توركیا و دووەم ئێران، کە كاڵایان لێوە هاوردەدەكرێت بەتایبەتی خواردەمەنییەكان بەردەوامە."
مستەفا عەبدوڵا گوتیشی "لەگەڵ دەوڵەتی چین پەیوەندی بازرگانی پەرەپێدراوە، هەموو جۆرەكانی كاڵا لەو وڵاتەوە هاوردە دەكرێت، ئێستا نۆ براندی ئۆتۆمبێل ئۆفیسیان لە عێراق و كوردستان كردووەتەوە، هەموو جۆرەكانی ئۆتۆمبێل هاوردە دەكرێن، تەنانەت پارچەی یەدەگیان بۆ هاوردە دەكرێت تاكو ئۆتۆمبێلەكانیان ڕەواج پەیدا بکات، لە وڵاتی ئەمریكا و ئەوروپاش ئۆتۆمبێل بەردەوام هاوردە دەكرێن."
لە بابەتی هەناردەی كوردستان بۆ وڵاتان گوتی "ماوەی چەند ساڵێكە لە بواری كشتوكاڵدا تواندراوە بەشێك لە بەرهەمە كشتوكاڵییەكان هەناردەی دەرەوەی وڵات بكرێت، کە حكوومەت لەم کابینەیەوە دەستی پێكردووە، جێگای دڵخۆشیە حكوومەت گرنگی زیاتری پێبدات و سیستەمێكی باش دابڕێژێت تا بەرهەمەكان بە زوویی بنێردرێنە بازاڕەكانی دەرەوە، بەشێك لە كارخانەكانیش بەشێك لە بەرهەمەكانیان دەنێرێنە دەرەوەی وڵات، بۆیە بۆ زیادکردنی بەرهەم پێویستمان بە دامەزراندنی كارخانەی زیاتر هەیە".
هەنار بۆ بەریتانیا هەناردەكراوە، بەتاتە هەناردەی دەوڵەتی سعودییە، ئیماڕات و قەتەر كراوە، سێو و چەند جۆرێكی ترێ هەناردەی دەوڵەتانی ئەورپایی و عەرەبی كراون، لە بازاڕەكان زۆر داواكارییان لەسەرە، دەوڵەتانی عەرەبی تاوەکو بەرهەمی باغداری و كشتوكاڵی كوردستان هەبێت وەری بگرن بەرهەمی وڵاتانی تر وەرناگرن."
دەشڵێت،"بەرهەمهێنانی چیمەنتۆ و شیش، %100 بەشی ناوخۆمان هەیە و هەناردەی بازاڕەكانی پارێزگاكانی عێراقیشی دەكەین. بەرهەمی شیرەمەنیش داواکاری 50%ی بازاڕەكانی كوردستان دابین دەکات و هەناردەی بازاڕی عێراقیش دەكرێت، كوردستان لە وڵاتێكی بەكاربەرەوە زایاتر بەرەو وڵاتێكی بەرهەمهێنەر هەنگاوی ناوە."

عەزیز ڕەسووڵ