ھەولێر-KDP.info- وەزیری کارەبای حکوومەتی ھەرێمی کوردستان، ھاووڵاتیان دڵنیا دەکاتەوە کە ھەر پڕۆژە و کارێک، ئیرادە و ویستی سەرۆکی حکوومەتی ھەرێمی کوردستانی لەسەر بێت و بۆ خزمەتی ھاووڵاتیان بێت، سەردەکەوێت. دەشڵێ، لە ئێستادا ئەوانەی سوودمەند بوون لە پڕۆژەی ڕووناکی، ڕاستییەکە لای ئەوانە.

لە دیدارێکی تایبەتدا بۆ گۆڤاری گوڵان، کەمال محەممەد ساڵح، وەزیری کارەبای حکوومەتی ھەرێمی کوردستان، لەبارەی پڕۆژەی ڕووناکی و کارەبای ٢٤ کاتژمێرییەوە گوتی، من وەکو وەزیری کارەبا لە دەستپێکی دەستبەکاربوونم لەم وەزارەتە دەمزانی بۆ ڕێگرتن لە کەوتنەوەی کێشە و قەیرانی کارەبا لە بەردەم چ تەحەددییەکی گەورەداین، ھەڵبەتە چارەسەری کێشەیەکیش کە زیاتر لە ٣٠ ساڵە ھەیە، وا ئاسان نییە، تەحەددا و ئاستەنگی لەبەردەمدایە، بەڵام ھاووڵاتیان دڵنیا دەکەمەوە ھەر پڕۆژە و کارێک، ئیرادە و ویستی سەرۆکوەزیرانی ھەرێمی کوردستانی لەسەر بێت و بۆ خزمەتی ھاووڵاتیان بێت، ئەوا سەردەکەوێت.

کەمال محەممەد گوتیشی، دابینکردنی کارەبای ٢٤ کاتژمێری لە ھەرێمێکدا کارێکی وا ئاسان نەبوو، کە بوودجە لەلایەن بەغداوە بڕدرابوو و گرفتی مووچەخۆرانی ھەرێم سەریھەڵدا، ھاوکات زۆر لایەنی سیاسی دژایەتیی بونیادنان و پەرەپێدانی ژێرخانی وزە و سووتەمەنی لە ھەرێمی کوردستان دەکەن، ئەو سووتەمەنییەی بۆ بەگەڕخستنی یەکەکانی بەرھەمھێنانی وێستگە غازییەکان زۆر گرنگە، بەتایبەتی لەگەڵ ھەڵکشانی ژمارەی ھاوبەشانی کارەبا بۆ (یەک ملیۆن و ٩٣١ ھەزار و ٦٤٨) ھاوبەش، کە تەنیا لەم کابینەیەدا (٤٨٣ ھەزار و ٣٥٩ ) ھاوبەشی نوێی کارەبا زیاد بوون، ئەم ژمارەیەش لە زیادبووندایە و تادێت ژمارەی ھاوبەشانی کارەبا لە دوو ملیۆن ھاوبەش نزیک دەبێتەوە.

وەزیری کارەبا باسی ئاستەنگەکانی بەردەم پڕۆژەی ڕووناکی دەکات و دەڵێ، پڕۆژەی ڕووناکی لە سەرەتای دەستپێکردنی گەورەترین ئاستەنگ بڵاوکردنەوەی پڕوپاگەندە و ھەواڵی درۆ و ناڕاست بوو بۆ مەرامی سیاسی، تەنانەت ھانی ھاووڵاتیان دەدرا کە کرێی کارەبا نەدەن، لە کاتێکدا کرێی کارەباکانیان زۆر کەم بووەتەوە بەراورد بە پێشوو، لە کاتێکدا دەبووایە بەرپرسانە مامەڵە لەگەڵ پڕۆژەیەکی خزمەتگوزاری بۆ ھاووڵاتیان بکرێت و وەکو پرسێکی نیشتمانی و خزمەتگوزاری و خەمخۆری بۆ ھاووڵاتیان مامەڵەی لەگەڵ بکرێت، بەڵام سوپاس بۆ خودا بەسەر ھەموو ئەمانەدا سەرکەوتین و لە ئێستادا ئەوانەی سوودمەندن لە پڕۆژەکە، ڕاستییەکە لای ئەوانە کە چەند سوودمەندن لەم پڕۆژەیە و کارەکانیان چۆن ڕێک خراوەتەوە".

کەمال محەممەد گوتیشی، دابینکردنی کارەبای ٢٤ کاتژمێری و ئاوی خواردنەوەی پاک بۆ ھاووڵاتیان دیدگا و بڕیاری دەوڵەتمەدار مەسروور بارزانی سەرۆکی حکوومەتی ھەرێمی کوردستانە بۆ ھاووڵاتیان، ئەمە ئەو وەرچەرخانەیە کە ھاووڵاتیانی عێراق و وڵاتانی دراوسێ و جیھانی پێی سەرسام بوون، کە وێڕای ئەو ھەموو قەیران و ئاستەنگە دروستکراوەی بەردەم کابینەکە، تەنیا لە ماوەی پێنج ساڵدا بەڵێنەکانی کردە کردار و بە پڕۆژە و کارە گەورەکان وەڵامی نەیارانی دایەوە.

وەزیری کارەبای حکوومەتی ھەرێمی کوردستان ھاووڵاتیان دڵنیا دەکاتەوە و دەڵێ، بەسەر ھەموو ئاستەنگ و گرفتەکاندا سەردەکەوین و کابینەی نۆیەم دەبێتە ئەو کابینەیەی بە تەواوی کۆتایی بە کێشەی کارەبا دەھێنێت، تەنیا سەبر و کاتێکی کەممان دەوێت، تاوەکو ئەم قۆناغە تێپەڕێنین.