هه‌ولێر-KDP.info- شاخەوان عەبدوڵڵا، جێگری سەرۆکی پەرلەمانی عێراق دەڵێت،  ناوی ئەو کەسانەمان لایە کە بەرپرسن لە هێرشە درۆنییەکانی سەر هەرێمی کوردستان، دەشڵێت: پێویستە حکوومەتی عێراق لێپرسینەوە لەو هێرشکارانە بکات.

شەممە 2ـی ئابی 2025، شاخەوان عەبدوڵڵا، جێگری سەرۆکی پەرلەمانی عێراق لە کۆنفرانسێکی ڕۆژنامەوانیدا گوتی، "حکوومەتی هەرێمی کوردستان بە فەرمی حکوومەتی عێراقی ئاگەدارکردووەتەوە لەوەی، ئامادەیی هەیە نەوتی هەرێمی کوردستان ڕادەستی سۆمۆ بکات، ڕایگەیاند، "لەگەڵ باڵیۆزخانەی ئەمەریکا کۆبوونەوەتەوە و ئەوان پێیان وایە نابێت حکوومەتی عێراق درێژە بە کێشەکانی مووچەبدات، هاوکات فشارێک هەیە بۆ ئەوەی پەلە بکرێت لە هەناردەکردنەوەی نەوت.

لەبارەی ناردنی مووچەی مانگی شەش، جێگری سەرۆکی پەرلەمانی عێراق گوتی، "ڕێکارەکان لەلای ئێمە تەواو بووە، ئەوەی ماوەتەوە لەلای حکوومەتی عێراقە، من پێم وایە کێشەی نەناردنی مووچە سیاسییە نەک تەکنیکی، ئەوەتا مووچەی مانگی پێنجیان بەبێ بڕیاری دادگەی فیدراڵ نارد،  لەکاتێکدا سەرەتا بیانوویان ئەوەبوو کە دەیان گووت دەبێت بڕیارەکە لەلایەن دادگای فیدراڵییەوە پێمان بگات پاشان مووچە خەرج دەکەین، بەڵام واش نەبوو.

هەروەها لەبارەی ڕازیبوونی حکوومەتی عێراق بەو بڕە نەوتەی کە دیاریکراوە، گووتی، "حکوومەتی عێراق خۆیان بەدواداچوونیان بۆ کێڵگە نەوتییەکانی سەر بە هەرێمی کوردستان کردووە و ئێستا بەرهەمهێنانی نەوتی لەلای حکوءومەتی عێراق دیار و ئاشکرایە و دەزانن لە ئێستادا چەند بەرمیل نەوت لە کێڵگەکان بەرهەمدێت.

سەبارەت بە هێرشە درۆنییەکانی سەر هەرێمی کوردستانیش، شاخەوان عەبدوڵڵا گوتی، "حکوومەتی عێراق دەزانێت کێ هێرشەکانی کردووە، بۆیە پێویستە سزای ئەوان بدەن، نەوەک سزای خەڵکی کوردستان، ئێمە ناوەکانمان لایە، دەزانین چ گرووپێکن، لەماوەی 4 ڕۆژدا لە 14ـی مانگ تاکوو 18ـی مانگ، 14 درۆن ئاڕاستەی هەرێمی کوردستان کراون، دەڵێت: ئێستا چەند بەرهەم هەیە، هێندە نەوتە ڕادەست دەکرێت، کاتێک کێڵگەکان کەوتنەوە کار و بەرهەمەکان زیاد بوون، بەرهەمی زیاتر ڕادەست دەکرێت.

ئاماژەی بەوە کرد، لە بوودجەی 2026، گۆڕانکاری لە بەشی هەرێمی کوردستان دروست دەبێت، پێویستە مووچەی مانگی شەش خەرج بکرێت، لێژنەکان کاری خۆیان کردووە و حکوومەتی هەرێمی کوردستان ئامادەیی خۆیان نیشانداوە بۆ ڕادەستکردنی نەوت.

سەبارەت بە پرۆژە یاسای شەهیدان و زیندانیانی سیاسی، لە پەرلەمانی عێراق، شاخەوان عەبدوڵڵا، جێگری سەرۆکی پەرلەمانی عێراق گوتی، "نا‌هێڵین ئەو پرۆژە یاسایە تێپەڕێت، تاکوو کەسوکاری ئەنفالکراوان و شەهیدانی هەڵەبجە نەبنە بەشێک لە پرۆژەکە. 

بڵند ئیبراهیم