شێخان-KDP.info-  بەرپرسی لقی ٢٠ی پارتی دیموکراتی کوردستان لە شێخان گوتی "ئەمڕۆ لە مەراسیمێکی شایستەدا کورسی کەمئەندامان بەسەر زیاتر لە ٣٠٠ کەمئەندامی سنووری قەزای شێخان دابەشکرا، ھاوکاریش دەدرێتە ٦٠ کچ و کوڕ کە ھاوسەرگیری دەکەن، ئاھەنگی ھاوسەرگیرییان بۆ سز دەدرێت و ھەر یەکێکیشیان ١٠ملیۆن دیناریان پێدەدەین." 

ساڵح حەیدەر، بەرپرسی لقی ٢٠ی پارتی دیموکراتی کوردستان لە شێخان، بە ماڵپەڕی فەرمیی پارتی دیموکراتی کوردستانی ڕاگەیاند "لەسەر فەرمانی سەرۆک بارزانی و بە ڕاسپاردەی فەرماندە مەنسور بارزانی کە پێش ماوەیەک کۆبوونەوەیەکی بە ئێمەکرد، باسی لەوە کرد، چەند کەمئەندام لە سنوورەکەمان ھەیە و پێویستیان بە کورسی کەمئەندامی ھەیە، ناوەکانمان بۆ ڕەوانە بکەن، ئێمە لەڕێگەی چاودێری کۆمەڵایەتی و ئۆرگانەکانی خۆمان ناوەکانمان کۆکردەوە، زیاتر لە ٣٠٠ کەمئەندام بوون، پێش دوو ڕۆژ ٢٤٥ کورسی کارەبایی، کە نرخی ھەر یەکێک ھەزار دۆلارە، لەگەڵ ٥٠ کورسی دیکەی کەمئەندامان، لە سنووری ئێمە دوور لە ئینتیمای حزبی و ئایینی ٣٣٥ کورسی لە مەراسیمێکدا بۆ کەمئەندامان دابەشکران." 

ساڵح حەیدەر گوتیشی "پاریش ٣٢٤ کورسی دیکەی کارەبایی بەسەر کەمئەندامان دابەش کران، کۆی گشتی ٦٣٥ کورسی بەسەر کەمئەندامان دابەش کراوە، ئەمەش وەکو گرنگیدان و ھاوکاریکردن بۆ کەم ئەندامان  کە سەرۆک بارزانی لە خەمی ھەموو تاکێک دایە، بەتایبەت کەمئەندامان." 

دەشڵێت "جگە لەوە ھاوکاری دەدرێتە ٦٠ کچ وکوڕ، ھەر یەکەیان ١٠ملیۆن دیناریان پێدەدرێت، پێنج ملیۆن دیناریان پێدراوە، لەکاتی ڕێکخستنی ئاھەنگ لە ١٦ی ئاب، خەرجی ئاهەنگی ھاوسەرگیری و پێنج ملیۆن دینارەکەی دیکەیان پێدەدرێت.

بەپێی ڕێنمایی ئەو جارە کوڕ و کچی شەھیدانی تێدا نەبوو، ئەوەش ساڵانە بەردەوام دەبێت، بۆ ھیچ مەبەستێک نییە، تەنیا سەرۆک بارزانی دەیەوێت ھاوکاری گەنجان و کەمئەندامان بکات." 

بڵند ئیبراھیم