ئاکرێ -KDP.info- بەڕێوەبەری ڕێگاوبانی ئاکرێ ئاشکرای کرد "لە ھەردوو قەزای ئاکرێ و بەردەڕەش ٥٠ پڕۆژەی ڕێگای گوندەکان بە گوژمەی چوار ملیار و ٥٠٠ملیۆن دینار جێبەجێ دەکرێت. 

ئەندازیار موحسن میرانی، بەڕێوەبەری ڕێگاوبانی ئاکرێ، بە ماڵپەڕی فەرمیی پارتی دیموکراتی کوردستانی ڕاگەیاند "لە ھەردوو قەزای ئاکرێ و بەردەڕەش حکوومەتی ھەرێمی کوردستان گرنگی زۆری بە پڕۆژەی ڕێگاوبانی گوندەکان داوە، ئێستا نزیکەی ٥٠ ڕێگا بۆ گوندەکان لە دروستکردن، قیڕتاوکردن و نوژەنکردنەوە بە گوژمەی ٤ملیار و ٥٠٠ملیۆن دینار کاریان تێدا دەکرێت، لەوانە نوژەنکردنەوەی ڕێگای بەردەڕەش بۆ کەلەک، ئۆڤەر پاسی سیگردک، ڕێگای گوندی مەموزین، لە ناوچەی نەھلە لە دینارتە ڕێگای ١٨ گوند دروست دەکرێت و نوژەن دەکرێنەوە، لە بجیل ڕێگای ١٤گوند دروست دەکرێن و نوژەندەکرێنەوە، لە گردەسێنیش ڕێگای ١٣ گوند دروست دەکرێن و نوژەن دەکرێنەوە." 

ئەندازیار موحسن میرانی گوتیشی "لە قەزای بەردەڕەش ٢٦ پڕۆژە لە جێبەجێکردندان، ٦٠%ی کارەکانیان تەواو بووە و ٤٠%یشی کاری تێدا دەکرێت، وەکو نوژەنکردنەوەی گوندی خراپ سەعدون، گرکەچوو، گرێگا، بەردەسۆر، گەویلان بۆت، گربەدەوی نوێ، خواروک، دالەڕێ، ڕێگای چەمە، دووسەرە بۆ تربەسپی، بەردەڕەش بۆ بشیریان قۆناغی یەکەم، گوندی کانی ھەسپان، دووسەرە و قادسیە، ھەندێ پڕۆژەی دیکەش بە گوژمەی ملیارێک و ٨٠٠ملیۆن دینار کاریان لەسەر دەکرێت." 

بڵند ئیبراھیم