ھەولێر-KDP.info- پارتی چاکسازی تورکمان ڕاگەیاندراوێکی سەبارەت بە هێرشە درۆنیەکانی بۆ سەر کێلگە نەوتیەکانی ھەرێمی کوردستان بڵاوکردەوە ڕایدەگەیەنن، بە ئامانجگرتنی کوردستان ھەوڵێکی ڕوونە بۆ لاوازکردنی قەوارەی هەرێمی کوردستان، بۆیە داوا دەکەین حکوومەتی عێراق سنوورێک بۆ ئەم ھێرشانە دابنیت و کۆتاییان پێبھێنیت.
دەقی ڕاگەیاندراوەکەی پارتی چاکسازی تورکمان.
ھاووڵاتیانی خۆشەویستی ھەرێمی کوردستان
حکوومەتی ھەرێمی کوردستان ھەموو ئەرکەکانی خۆی جێبەجێکردووە بەرامبەر بە حکوومەتی فیدڕاڵی عێراق لە پێناوی دەستبەرکردنی مافە شایستە داراییەکانی ھەرێمی کوردستان، بەڵام جێگای داخە بە ئامانجگرتنی کوردستان ھەوڵێکی ڕوونە بۆ لاوازکردنی قەوارەی کوردستان، و بەردەوامی ئەم ھێرشانە بۆ سەر کێلگە نەوتیەکانی سنووری ھەرێمی کوردستان ئاماژەیەکی ڕوونە کە بەرنامەیەکی داڕێژراوە بۆ لاوازکردنی قەوارەی کوردستان، ئەم جۆرە ھێرشانە پێشیلکردنیکی بنەماکانی پاراستنی ئاسایشی ناوخۆیە.
بۆیە وەک پارتی چاکسازی تورکمان داوا دەکەین حکوومەتی عێراق پێویستە سنوورێک بۆ ئەم ھێرشانە دابنیت و کۆتاییان پێبھێنیت چونکە کاریگەری خراپ دروست دەکات لەسەر ئابووری و سامانی سروشتی عێراق و ھەرێمی کوردستان.
لە کاتێکدا گفتوگوکان بەردەوامە لە نێوان بەغدا و حکوومەتی ھەرێمی کوردستان پەیوەست بە دەستپیکردنەوەی ھەناردەکردنی نەوت بۆ چارەسەرکردنی پرسی مووچەی فەرمانبەران و ھیواخوازین بە زووترین کات لایەنی پەیوەندیدار بەرپرسانە مامەڵە لەگەڵ ئەم دۆخە نەخوازراوە بکات بۆ پاراستنی ئەمن و ئاسایشی عێراق و ھەرێمی کوردستان.
عبدالقادر بازرگان
سەرۆکی پارتی چاکسازی تورکمان
١٧ی تەممووز ٢٠٢٥