ھەولێر-KDP.info- وەزیری تەندروستیی حکوومەتی ھەرێمی کوردستان دەڵێ، بەھۆی ئەو ئامادەکاری و رێکارانەی ھەر زوو گرتوومانەتە بەر، توانراوە نەخۆشیی تای خوێنبەربوون لە ھەرێمی کوردستان کۆنتڕۆڵ بکرێت، چونکە ئێمە ساڵانە پێش ھاتنی وەرزی گەرما دوو ھەنگاوی پێویست دەنێین.
د. سامان بەرزنجی، وەزیری تەندروستیی حکوومەتی ھەرێمی کوردستان، تایبەت بە ماڵپەڕی فەرمیی پارتی دیموکراتی کوردستانی ڕاگەیاند، ئێمە ساڵانە ئامادەکاریی تەواو دەکەین لە کۆتایی زستان و سەرەتای ھاتنی وەرزی بەھار، تاوەکو پێش ئەوەی بگەینە وەرزی گەرما رێکارەکان بگرینە بەر، ئەوانیش دوو جۆرن، بەشێکی پەیوەندی بە وەزارەتی کشتوکاڵەوە ھەیە بە خۆپارێزی وەکو ڕشاندنی ئاژەڵ و شوێنی ئاژەڵەکان و بەشێکیشی پەیوەندی بە ئێمەوە ھەیە ئەویش ھۆشیارکردنەوە و ئامادەکردنی تاقیگە و پشکنینی شوێنەکانە، بۆ ئەوەی پێش تەشەنەکردنی نەخۆشییەکە، حاڵەتەکان دەستنیشان و چارەسەر بکەین و بڵاو نەبێتەوە.
بەرزنجی گوتیشی، لە ھەرێمی کوردستان نەخۆشییە گوازراوەکان لە ژێر کۆنتڕۆڵدان، بە تایبەت تای خوێنبەربوون، کە لە ھەرێمی کوردستان بەراورد بە پارێزگاکانی عێراق ژمارەی حاڵەتەکان زۆر زۆر کەمترە و زۆریش لە ژێر کۆنترۆڵدایە و ڕێژەی مردنیش زۆر کەمە، ئەویش بەھۆی زوو دەستنیشانکردنی حاڵەتەکان و چارەسەرکردنیان، ئەمەش خزمەت بە نەخۆشەکان دەکات و وادەکات ڕێژەی مردن کەم بێت، بۆیە ئێستا دۆخەکە لە ژێر کۆنتڕۆڵدایە.
وەزیری تەندروستی دەشڵێت، تیمەکانی ئێمە بەردەوام لە ئامادەباشیدا دەبن و لە ھەموو ھەرێمی کوردستان ئامادەکاریی باش کراوە و پێویستە ھاووڵاتیانیش تا بتوانن خۆیان بپارێزن بۆ ئەوەی ئەو نەخۆشییە بڵاو نەبێتەوە و کاریگەری لەسەر ھاووڵاتیان نەبێت، بۆیە ئێمەش ئەوەی پێویستە ئەنجاممان داوە و ئێستا نەخۆشیی تای خوێنبەربوون لە ھەرێمی کوردستان لە ژێر کۆنتڕۆڵدایە و ڕێگرییەکی باش کراوە ئەو نەخۆشییە لە ھەرێمی کوردستان تەشەنە نەکات.
بڵند ئیبراھیم