ھەولێر-KDP.info- پێش ١١ ساڵ و لە ڕۆژێکی وەکو ئەمڕۆ مووسڵ کەوتە دەست تیرۆریستانی داعش و داگیر کرا، سوپاسالاری پێشووی عێراقیش دەڵێت  "بەھۆی ئەوەی عێراق وانەی لەو ڕۆژە وەرنەگرتووە، ئێستاش ھەمان مەترسی لەسەر عێراق ھەیە، چونکە پێوستە عێراق سەقامگیر بێت و ھیچ جیاوازی لەنێوان پێکھاتەکان نەکرێت، ئەگەر نا مەترسی ھەیە ئەوەی ئەوکات ڕوویدا ئێستاش دووبارە بێتەوە."

بابەکر زێباری، سوپاسالاری پێشووی عێراق و ڕاوێژکاری سەربازی سەرۆکی ھەرێمی کوردستان، تایبەت بە ماڵپەڕی فەرمیی پارتی دیموکراتی کوردستانی ڕاگەیاند "ئەو کاتەی داعش بۆ مووسڵ هات و ئەو شارە کەوتە دەست داعش، ھۆکارەکەی ناسەقامگیری عێراق بوو، کێشە لەنێوان پێکھاتەکان ھەبوو، بە تایبەت سوننە و شیعە، تەعدا لە سوننەکان دەکرا، داعش ئەوکاتیش ھەر لە ناوخۆی عێراق و لە عێراقییەکان دروست بوو، بۆیە ئەو تەعداکردنە وایکرد داعش دروست بێت و مەترسی لەسەر عێراق دروست بکات و مووسڵ لەدەست ھێزەکانی ئەوکاتی عێراق کۆنتڕۆڵ بکەن و ئەو مەترسییە گەورەیە لەسەر مووسڵ بەتایبەت و عێراق بەگشتی دروست بێت، بۆیە ھەرکاتێک جیاوازی لەنێوان پێکھاتەکان بکرێت و دادپەروەری نەبێت مەترسی لەسەر عێراق دروست دەبێت."
بابەکر زێباری گوتیشی "ئێستاش عێراق وانەی لەو ڕۆژە وەرنەگرتووە کە داعش مووسڵی کۆنتڕۆڵ کرد و مەترسیەکی گەورەی لەسەر ھەموو عێراق دروستکرد، بۆیە پێویستە وانە لەو ڕۆژە وەرگرن و جیاوازی لەنێوان پێکھاتەکان دروست نەکەن و دادپەروەری ھەبێت بۆ ئەوەی ئەو مەترسیەی ھەبوو دووبارە نەبێتەوە، چونکە دەبینین داعش ھیچ کات نەیتوانیوە زەفەر بە هەرێمی کوردستان ببات و مەترسی لەسەر دروست بکات، بەھۆی ئەوەی وەکو عێراق لە ھەرێمی کوردستان ناکۆکی نیە، بۆیە ئێستاش ئەگەر عێراق بەخۆیدا نەچێتەوە و ئەو جیاوازی و نادادییەی ھەیە چارەی نەکات، مەترسی دووبارەبوونەوەی دۆخی پێش ١١ ساڵ لە ئارادایە، بۆیە پێویستە ڕێز لە ھەموو پێکھاتەکانی عێراق بگیرێت و دادپەروەری ھەبێت بۆ ئەوەی سەقامگیری لە عێراق بەرپا ببێت."
لای خۆشیەوە، عیسمەت ڕەجەب، یاریدەدەری بەرپرسی مەکتەبی ڕێکخستنی پارتی دیموکراتی کوردستان لە مووسڵ و بەرپرسی لقی ١٤ی پارتی دیموکراتی کوردستان، بە ماڵپەڕی فەرمیی پارتی دیموکراتی کوردستانی ڕاگەیاند "ئەوکات لاوازی ھێزە عێراقیەکان وایکرد داعش بێتە مووسڵ و دەست بەسەر ئەوشارە دابگرێت، بەھۆی ئەوەی ناکۆکی لەنێوان پێکھاتەکان ھەبوو و جیاوازی زۆر لەنێوان پێکھاتەکان دەکرا، ئەمەش وایکرد داعش بێت و بە ماوەیەکی کەم دەست بەسەر مووسڵدا بگرێت و کارەسات بنێتەوە، بەڵام ھەرێمی کوردستان و ھێزی پێشمەرگە زۆر بەھێز بوون، دەرگایان بۆ خەڵکی مووسڵ کردەوە و بوونە فریادڕەسی خەڵکی مووسڵ بۆ ئەوەی نەکەونە دەست داعش و ڕزگاریان کردن."
عیسمەت ڕەجەب جەختیشی کردەوە "ھێزی پێشمەرگە ڕۆڵێکی گەورەیان لە ڕزگارکردنی مووسڵ لەدەستی داعش و لەناوبردنی داعش هەبوو، ئێستاش پارتی دیموکراتی کوردستان لە مووسڵ ڕۆڵێکی گەورەی ھەیە لە بنیاتنانەوە و ئاوەدانکردنەوەی مووسڵ، چونکە پارتی دیموکراتی کوردستان لە مووسڵ خەمی ھەموو پێکھاتەکانیەتی بەبێ جیاوازی، دەیەوێت خزمەتی ھەموو پێکھاتەکانیش بکرێت و مووسڵ ئاوەدان بکرێتەوە و لەدەستی ئەو گرووپە چەکدارانەش دەربھێندرێت و ھێزی فەرمیی و ناوخۆیی لە مووسڵ مەلەفی ئەمنی بگرنە دەست، بۆ ئەوەی چیتر مەترسی لەسەر مووسڵ دروست نەبێت، ئەگەر نا مەترسی پێش ١١ ساڵ لەسەر مووسڵ ھەر بەردەوام دەبێت و پێویستە عێراق ئەوە بەجدی وەربگرێت."

بڵند ئیبراھیم