دھۆک-KDP.info- بەڕێوەبەری گشتی کشتوکاڵی پارێزگای دھۆک ڕایگەیاند "ئێستا وەرزی پێگەیشتنی بەرھەمی کشتوکاڵە، بە تایبەت ھەڵکەندنی پەتاتە، بۆیە زیاتر لە ٢٠ھەزار ھەلی کار بۆ خەڵکی پارێزگای دھۆک رەخساوە." 

ئەحمەد جەمیل، بەڕێوەبەری گشتی کشتوکاڵی دھۆک، بە ماڵپەڕی فەرمیی پارتی دیموکراتی کوردستانی ڕاگەیاند "ئەم کاینەیەی حکوومەتی ھەرێمی کوردستان، گرنگی زۆری بە کەرتی کشتوکاڵ داوە، بە جۆرێک ساڵ بە ساڵ بەرھەمی زیاتری کشتوکاڵ دەچێندرێت، چونکە بەرھەمەکانیان لە ناوخۆ و عێراق و دەرەوەش ساخ دەبێتەوە، ھەر بۆیە جووتیاران بەرھەمی زیاتر دەچێنن، ئەمەش بووەتە ھۆی ئەوەی ھەلی کاری زۆر بۆ خەڵک بڕەخسێت، ئێستا وەرزی پێگەیشتنی بەرھەمی کشتوکاڵییە، بە تایبەت ھەڵکەندنی بەرھەمی پەتاتە، بۆیە زیاتر لە ٢٠ھەزار ھەلی کار بۆ خەڵک ڕەخساوە، ساڵانە لەم وەرزە ھەلی کار بەو ڕێژەیە بۆ خەڵک دەڕەخسێت، ئەمەش زۆر گرنگە بۆ خەڵکی ئێمە، بە تایبەت ئەوانەی بێکارن سود لەو ھەلی کارە وەردەگرن." 

ئەحمەد جەمیل گوتیشی "لە پارێزگای دھۆک هەموو جۆرە بەرھەمێکی کشتوکاڵی دەچێندرێت و لە پێداویستی ناوخۆش زۆر زیاترە، بۆیە ئێستا پەسەند بە جووتیاران دەدرێت بەرھەمەکانیان بۆ خوار و ناوەڕاستی عێراق ببەن، بۆ دەرەوەش ھەناردە دەکرێت، جووتیاریش کە دەبینێت بەرھەمی ساخ دەبێتەوە ساڵی دواتر بەرھەمی زیاتر دەچێنێت، چونکە پێشتر خەڵک بەھۆی ساخنەبوونەوەی بەرھەمەکانی کەمتر کاری کشتوکاڵی دەکرد، بەڵام ئێستا بەرهەمهێنان لە کەرتی کشتوکاڵی بەردەوام لە زیادبوون دایە." 

دەشڵێت "ئەمساڵ لە سنووری پارێزگای دھۆک زیاتر لە ٤٨ھەزار دۆنم پەتاتە چێندراوە، بەرھەمی دەگاتە ٦٠٠ھەزار تەن، ١٢٧ کۆگای ساردکەرەوەش ھەن، ئەگەر بەرھەمەکانیش نەفرۆشن لە کۆگاکان ھەڵدەگیرێن، و ئێمەش بۆ دروستکردنی ساردکەرەوە ئاسانکاری تەواو بۆ جووتیاران دەکەین." 

بڵند ئیبراھیم