ھەولێر-KDP.info- سیاسەتمەدارێکی كورد باس لەوە دەکات، سیاسەتی حەكیمانە لە حكومڕانی كوردستان پەیڕەو كراوە، هەروەها هەرێمی کوردستان ڕۆڵی گرنگی هەیە لە ئاشتی لە باكووری كوردستان، هاوکات پابەندبووە بە دووركەوتنەوە لە ئاژاوەكانی ڕۆژهەڵاتی ناوەڕاست و پاراستنی سەربەخۆیی، بڕیاردان و ڕێزلێگیراویشە لەلایەن دەوڵەتانی ناوچەكە و جیهان. 

مەحموود حەفید زادە، سیاسەتمەداری كورد، لە لێدوانێکی تایبەتدا بە ماڵپەڕی فەرمیی پارتی دیموكراتی كوردستانی ڕاگەیاند: "كەسایەتی سەرۆك بارزانی لەلای دۆست و دوژمن واپێناسە كراوە، سەرۆكێكی ئاشتیخوازە و بەردەوام بڕوای بە گفتوگۆ هەیە، پیادەی دۆزی ڕەوای گەلەكەی كردووە، لەهەر چوارپارچەی كوردستان تاكە ئومێدی گەلی كوردە و متمانەیان پێیەتی، هاوکات سەرۆك بارزانی ڕۆڵی گرنگی هەبووە لە پڕۆسەی ئاشتیی و چارەسەركردنی كێشەی كورد، وەفدێكی باڵای كورد لە باكوور هاتنە باشووری كوردستان و ڕێنمایی پێدان کە چۆن لەگەڵ دەرفەتەکان هەنگاوبنێن".

مەحموود حەفید زادە دەشڵێ: "كورد سەلماندی بۆ دەوڵەتانی جیهان و ناوچەكە، هەرێمی كوردستان نەك هەڕەشە نییە لەسەر دراوسێكانی بەڵكو فاكتەرێكە بۆ سەقامگیری زیاتر و پێكەوەژیان، لەگەڵ دەوڵەتی ئێران چەندین دەروازەی سنوورییمان پێكەوە هەیە، پەیوەندی هەرێمی کوردستان لەگەڵ ئێران گرنگە، جەنابی سەرۆكی هەرێمی كوردستان كەسایەتێكی خۆشەویستە لەسەر ئاستی هەرێمی و ناوچەیی، سیاسەتی نەرموو و گفتوگۆ پەیڕەو دەكات، لە ئێران لە ئاستێكی باڵادا پێشوازی گەورەی لێكرا، ئەوەش بەرهەمی سیاسەتەكەیەتی".

ئەو سیاسەتمەدارە جەختیش دەکاتەوە لەوەی کە پێگەی كوردستان فۆكسی لەسەرەو گرنگە لای دەوڵەتان، ئێستا بەرژەوەندییەكانی دەوڵەتانی زلهێز، لەگەڵ كوردستان هاوتەریب ڕێككەوتوون، ئەوەش بۆ بینای داهاتوو گرنگە، سەرۆكوەزیران مەسروور بارزانی ڕووبەڕووی تەحەدیاتی گەورە بوویەوە، لە گوشاری سیاسی و ئابووری كە كەوتەسەر حكوومەت، لە چوارچێوەی ڕیفۆرم و چاكسازی، تەرکیزی خستەسەر پڕۆژەی ستراتیژی، ئەوەش وایكرد سەرنجی دەوڵەتانی زلهێز ڕابكێشێت بەتایبەت ئەمەریكا، دڵنیای داوە بە دەوڵەتانی جیهانی و ئیقلیمی هەرێم لە گەشەكردن ناوەستێت، سەردانی فەرمیی بۆ ئەمەریكا لەو ئاستە بەرزەدا ئەنجامی كاركردنی حكومڕانییەكی پێشككەوتووە".

حەفید زادە دەشڵێت، كورد لەناوچەكە باش توانی هاوسەنگی بپارێزێت، هەوڵێكی زۆر لە ئارادابوو، كوردستان تێوەبگلێندرێ لەو ململانێ و كێشانەی هەبوو لە ڕۆژهەڵاتی ناوەڕاست، بەڵام سیاسەتی حەكیمانەی سەرۆك بارزانی و سەرۆكایەتی هەرێم و حكوومەت، بە متمانە بوون بەخۆ نەڕۆشتە ناو ململانێكان و كوردستان بە سیاسەتێكی سەربەخۆیانە، بە هەموو لایەكی وت هەرێمی كوردستان فاكتەری ئەمن و ئاسایشە، تێوە نەگلێت لە ڕووداوەكان و ئاسایشی كوردستانی پاراست".

 عەزیز ڕەسووڵ