مووسڵ-KDP.info- یاریدەدەری تازەی بەرپرسی مەکتەبی رێکخستنی نەینەوای پارتی دیموکراتی کوردستان ڕایدەگەیەنێت، گۆڕانکارییەکانی پارتی لە ناوخۆی حیزب بۆ ئەم قۆناغە زۆر گرنگن، بە تایبەت بەرەو ھەڵبژاردن دەچین، بۆیە ئەمە وا دەکات رێکخستنەکانی پارتی زیاتر بەھێز بن و ھەفتەی داھاتووش ئەوانەی فەرمانیان دەرچووە، بە فەرمی دەستبەکار دەبن.
عیسمەت رەجەب، کە وەکو یاریدەدەری بەرپرسی مەکتەبی رێکخستنی نەینەوا دیاری کراوە، بە ماڵپەڕی فەرمیی پارتی دیموکراتی کوردستانی ڕاگەیاند، ئەم گۆڕانکاریانەی پارتی دیموکراتی کوردستان لەناو حیزب دەستی پێکردووە، دوای ئەوە دێن کە لە کۆنگرەدا بڕیار درا بۆ بووژانەوەی حیزب و بەھێزکردنی ئاستی حیزب لەناو جەماوەردا، گۆڕانکاریش زۆر ئاسایین و ئەمەش لێپێچینەوە نییە لە ھیچ بەرپرسێک و ھێنانەپێشەوەی کەسانێک، بەڵکوو بۆ بەھێزکردنی کاری حیزبایەتی و رێکخستنەکانی حیزبە، بۆیە ئەوانەی تازە ھاتوون دەست بە کاری خۆیان دەکەن و ئەوانەی گواستراویشنەتەوە ئەوانیش کاری خۆیان دەکەن، بۆیە گۆڕانکاریکردن لەم قۆناغەدا لەناو حیزب زۆر گرنگە و جارێکی دیکە وا دەکات ئەوانەی تازە دانراون بە گوڕوتینێکی باشتر و بەھێزتر کاری حیزبایەتی و خزمەتی خەڵک و جەماوەری خۆمان بکەن لە ھەموو ناوچەکان بەبێ جیاوازی.
رەجەب گوتیشی، ئەوانەی لەم قۆناغەدا فەرمانی گۆڕانکاری و دانانیان دەرچووە، ھەفتەی داھاتوو بە فەرمی دەست بە کاری خۆیان دەکەن، بۆیە گۆڕانکارییەکانیش بەردەوام دەبن بەپێی دۆخەکە و پێویستیی ناوچەکان، ھەر بۆیە ئەم گۆڕانکاریانە زۆر گرنگن بۆ حیزب، بە تایبەت ئێستا ئێمە بەرەو ھەڵبژاردنی پەرلەمانی عێراقیش دەچین پێویستە باشتر خۆمان ئامادە بکەین و کاری باشتر بکەین بۆ ئەوەی لە سەرکەوتنەکان بەردەوام بین، کە پارتی ھەمیشە سەرکەوتنی گەورەی بەدەست ھێناوە و چاوەڕێی سەرکەوتنی گەورەتریش دەکەین، بۆیە پارتی ھەر ھەنگاوێک بنێت، بۆ زیاتر خزمەتکردن و بەھێزکردنی رێکخستنەکانیەتی و ئێمەش ئەوەی لە تواناماندا بێت خزمەت دەکەین و لە ئاست ئەو بەرپرسیارەتییەدا دەبین کە پارتی بە ئێمەی سپاردووە.
بڵند ئیبراھیم