ھەولێر-KDP.info- سەرۆکی دەستەی وەبەرھێنانی ھەرێمی کوردستان دەڵێت، سەردانی سەرۆکی حکوومەتی ھەرێمی کوردستان بۆ وڵاتی قەتەر زۆر گرنگ بوو، چونکە حکوومەت و کۆمپانیاکانی قەتەر دەیانەوێت بێن لە ھەرێمی کوردستان لە چەندین بواردا کار بکەن و ئێمەش ھەموو دەرفەتەکانی کارمان پێشکەشکردوون.
دکتۆر محەممەد شوکری، سەرۆکی دەستەی وەبەرھێنان لە ھەرێمی کوردستان، لە لێدوانێکیدا بە ماڵپەڕی فەرمیی پارتی دیموکراتی کوردستانی ڕاگەیاند، سەردانی سەرۆکی حکوومەتی ھەرێمی کوردستان بۆ وڵاتی قەتەر زۆر گرنگ بوو لەڕووی سیاسی و ئابووری، لەبەر ئەوەی دیدارەکانی سەرۆکی حکوومەت لەگەڵ حکوومەت و سەرۆکوەزیران و کۆمپانیاکان و لایەنی پەیوەندیداری پەیوەست بە ئابووری و کەرتی تایبەت ئەنجامی باشی ھەبوو، بۆیە ئومێدەوارین دەرفەتی زۆری کارکردن ھەبێت لەداھاتوو لە ھەرێمی کوردستان بەتایبەت لە بواری ژێرخانی ئابووری و وزە و گەشتیاری و کشتوکاڵ و پیشەسازی، ھاوکات سەرۆکی حکوومەت بۆیانی ڕوونکردەوە ھەرێمی کوردستان بواری زۆر باشی بۆ کارکردن ھەیە.
سەرۆکی دەستەی وەبەرھێنان گوتیشی، چاوەڕێ دەکەین ئەنجامی ئەو سەردانە ببێتە کڕدار و دەرفەتی وەبەرھێنان بۆ کۆمپانیا قەتەریەکان بڕەخسێنین و بێن لە ھەرێمی کوردستان کار بکەن و ئێمەش ھەموو دەرفەتی کارمان پێشکەشیان کردووە و چاوەڕێ دەکەین بێن کار بکەن، ھەروەھا لەداھاتوو لەگەڵ حکوومەت و کۆمپانیا قەتەریەکان کاری باش و ھاوبەش دەکەین، بۆیە سەردانی سەرۆکی حکوومەتی ھەرێمی کوردستان بۆ وڵاتی قەتەر زۆر باش و بەرھەمدار بوو.
بڵند ئیبراھیم