پاریس-KDP.info- نوێنەری حکوومەتی ھەرێمی کوردستان لە پاریس دەڵێت، بڕیارە ئەمڕۆ بەشێوەیەکی فەرمیی لە پاریسی پایتەختی فەرەنسا یادی نەورۆز بکرێتەوە بە بەشداری بەرپرسانی ھەرێمی کوردستان و فەرەنسا و چەندین چالاکی جۆراوجۆری کوردەواریش ئەنجامدەدرێن.
عەلی دۆڵەمەری، نوێنەری حکوومەتی ھەرێمی کوردستان لە فەرەنسا، لە لێدوانێکیدا بە ماڵپەڕی فەرمیی پارتی دیموکراتی کوردستانی ڕاگەیاند: شاندێکی پارێزگای ھەولێر بەسەرۆکایەتی پارێزگاری ھەولێر ھاتوون بۆ پاریس و ئەمڕۆ لەگەڵ سەرۆکی شارەوانی پاریس کۆبوونەوەیان ھەیە و دواتریش بەشداری لەیادی نەورۆز لە پاریس دەکەن کە بڕیارە ئێوارەی ئەمڕۆ ئەو یادە بکرێتەوە کە ئێمە بەھاوکاری شارەوانی پاریس ئەو یادە بۆ دیبلۆماتکار و بەرپرسانی ھەرێم و فەرەنسا ڕێکدەخرێت لە کاتژمێر ٨ تاوەکو ١٠ی شەو بەردەوام دەبێت.
دۆڵەمەری گوتیشی، لەو یادەدا خواردنی کوردەواری پێشکەش دەکرێت و جلی کوردەواری لەبەردەکرێت و بەشێک لەمێژووی نەورۆز و کوردستان پێشاندەدرێت و سەرۆکی شارەوانی و بەشێک لە پەرلەمانتارانیش وتاریان دەبێت، بۆیە دەمانەوێت لەو یادە باسی مێژووی نەورۆز و ھەرێمی کوردستان بۆ گەلی فەرەنسا بکەین.
ناوبراو دەشڵێت، پەیوەندی ھەرێمی کوردستان و فەرەنسا زۆر باشە ھەم لەڕووی سیاسی و ھەمیش لەڕووی ئابووری، چونکە پەیوەندی نێوان ھەرێمی کوردستان و فەرەنسا پەیوەندیەکی مێژووییە.
بڵند ئیبراھیم