بەغدا-KDP.info- جێگری سەرۆکی لیژنەی ئاسایش و بەرگری لە پەرلەمانی عێراق ڕایگەیاند، لە چوارچێوەی وەرگرتنەوەی پۆستەکانی خۆی لە سوپای عێراق، کورد پۆستی فەرماندەی فیرقەی ٢١ی پیادەی عێراقی وەرگرتەوە و لەم ھەفتەیە دەستبەکار دەبێت.

سەگڤان سندی، جێگری سەرۆکی لیژنەی ئاسایش و بەرگری لە پەرلەمانی عێراق، لە لێدوانێکدا بە ماڵپەڕی فەرمیی پارتی دیموکراتی کوردستانی ڕاگەیاند: لە چوارچێوەی وەرگرتنەوەی پشکی کورد لە سوپای عێراق، فەرماندەی فیرقەی ٢١ی پیادەی عێراق دراوەتەوە بە کورد و فەرماندەی فیرقەکەش لیوا حەماد دزەیی بۆ ئەو پۆستە دیاریکراوە، کە خۆی بەرپرسی ھێزەکانی پاسەوانی سنوور بوو، بۆیە ئەوە پۆستێکی گرنگە و پشکی کوردە وەرمانگرتەوە، چونکە پشکی کورد لە پۆستەکانی فیرقە پێویستە پێنج فەرماندەی فیرقە کورد بێت.

جێگری سەرۆکی لیژنەی ئاسایش و بەرگری جەختیش دەکاتەوە، بەپێی ئەو پلانەی دانراوە کورد سەرجەم پۆستەکانی پشکی خۆی لە سوپای عێراق وەردەگرێتەوە، چونکە لە سەردەمێک ئەو پۆستانە لە دەستی کورد نەمان بەھۆی بارودۆخێکی سیاسی بوو، ئێستا کاتی ئەوە ھاتووە بە قۆناغ کورد سەرجەم پۆستەکانی خۆی لە عێراق لە سلکی سەربازی وەردەگرێتەوە، چونکە دەستوور پشکی کوردی دیاریکردووە و عێراق ناتوانێت ڕێگری بکات و سەرجەم پۆستەکان وەردەگرینەوە.

سندی باس لەوەش دەکات، فەرماندەی تازەی فیرقەی ٢١ی پیادەی عێراق دەرچووە و لەم ھەفتەیە دەست بەکاردەبێت و کورد ئەو پۆستەش وەردەگرێتەوە، کە پێشتر پۆستی ئەمنیداری گشتی وەزارەتی بەرگری عێراقیشی وەرگرت.

بڵند ئیبراھیم