ھەولێر-KDP.info- وەزیری دەرەوەی عێراق، ھۆشداریی ئەگەری جەنگێکی نوێ لە ناوچەکە دەدات و دەڵێت: ئەگەر جەنگ لە ناوچەکە ڕووبدات، بەمانای ئارامی و ئاسایش لە ناوچەکە بوونی نامێنێت، ئەوەش کاریگەریی لەسەر ئارامی و ئاسایشی جیھان دەکات.
ئەمڕۆ شەممە، ٣ی ئابی ٢٠٢٤، فوئاد حوسێن، وەزیری دەرەوەی عێراق ڕایگەیاند: زۆرینەی نەوەکانی عێراق، بەدەست جەنگەوە ناڵاندوویانە، ئێمە دژی ھەموو جەنگێک دەوەستینەوە، چونکە ھەڕەشەکان لە ڕۆژھەڵاتی ناوەڕاست دێنە پێشەوە و بەرەو جەنگ دەچن.
ئەوەشی خستەڕوو: ئەگەر جەنگ لە ناوچەکە ڕووبدات، بەمانای وایە ئارامی و ئاسایش لە ناوچەکە نامێنێت، ئەوەش کاریگەری لەسەر ئارامی و ئاسایشی جیھان دروست دەکات، چونکە ناوچەکە پڕ مەترسییە و لە ژێر ئاگردایە.
وەزیری دەرەوەی عێراق پێی وایە دەبێت ھەموو لایەک کار بۆ دوورخستنەوەی جەنگ بکەن و دەڵێت: حکوومەتی عێراق ھەوڵ بۆ ئەوە دەدات، ئاگری جەنگ دوور بخاتەوە، ناوچەکەش پێویستی بە ھەوڵی ھەمەلایەنە ھەیە کە ئەگەر جەنگ ڕوو بدات، زۆرینەی وڵاتان دەگرێتەوە.