شارەزایەکی ھەڵبژاردن پێی وایە، ھەردوو سیستەمی ئەلیکترۆنی و دەستی بۆ ژماردنی دەنگەکان لە ھەڵبژاردنی داھاتووی پەرلەمانی کوردستان جێبەجێ بکرێن، دەشڵێ: کۆمسیۆنی باڵای ھەڵبژاردنەکانی عێراق ئامادەکاری کردووە بۆ بەڕێوەبردنی ئەو پرۆسەیە.
ئارام برادۆستی، شارەزای ھەڵبژاردن بە ماڵپەڕی فەرمیی پارتی دیموکراتی کوردستانی ڕاگەیاند: کۆمسیۆنی ھەڵبژاردنەکانی عێراق ئامادەکاری بۆ بەڕێوەچوونی ھەڵبژاردنی ھەرێمی کوردستان دەستپێکردووە و نوێکردنەوەی تۆماری دەنگدەران کۆتایی ھاتووە و ژمارەیەکی بەرچاوی دەنگدەریش بەشداری پرۆسەکەیان کردووە، زۆربەی ئەوانەی بەشدارییان کردووە کارتی دەنگدانیان بۆ دەردەکرێت.
لەبارەی تەواوبوونی ماوەی کۆمسیۆنی ھەڵبژاردنەکانی عێراق لە سەرەتای ساڵی ئایندە، ئەو شارەزایەی ھەڵبژاردن گوتی: سێ ڕێگا هەیە بۆ چارەکردنی پرسی تەواوبوونی ماوەی کۆمسیۆنی ڕاپرسی و ھەڵبژاردنەکانی عێراق، یان دەبێت ماوەکەی درێژبکرێتەوە بۆ ماوەی سێ ھەتا شەش مانگ، یان کۆمەڵێک دادوەری دیکە بێنن، یانیش دەنگۆیەک ھەیە دادوەر ھەر نەمێنن ئەوەیش پێویستی بە ھەموارکردنەوەی یاسایە.
ئارام برادۆستی ئاماژەی بۆ ئەوەکرد: بە گوێرەی یاسای ھەڵبژاردنی عێراق پرۆسەی جیاکردنەوەی دەنگەکان ھەم بە سیستەمی دەستی دەکرێت ھەمیش بە ئەلیکترۆنی، بەڵام بڕیاری کۆمسیۆن بۆ جیاکردنەوەی دەنگەکانی ھەڵبژاردنی ھەرێمی کوردستان دەرچووە و ئاماژەی بە ژماردنی دەست نەکردووە تەنیا دەڵێ، بە سیستەمی ئەلیکترۆنی دەنگەکان جیا دەکرێنەوە، ئەگەر بێت و ھەردوو سیستەمی ئەلیکترۆنی و دەستی بەکاربێت بۆ جیاکردنەوە و ژماردنی دەنگەکان گومان لەسەر پرۆسەکە ناھێڵێ، لەبەر ئەوەی سیستەمی ئەلیکترۆنیش لایەنی سلبی ھەیە و لە ھەڵبژاردنی ساڵی ٢٠١٨ بینیمان بەشێوەی ئەلیکترۆنی ئەنجامدرا و دەستوەردان ھەبوو، ئەنجامەکان وەک خۆی نەبوون، باشتر وایە ھەردوو سیستەم جێبەجێ بکرێن.
قائید میرۆ