Kurdî  ■  كوردی  ■  عربي
SAT, 4 FEB 2023 07:50 Erbil, GMT +3
Partiya Demokrat a Kurdistanê
Nûbûn  .  Dadperwerî  .  Bihevrejiyan
 

Bîrhatinek bi helkefta oxira Idrîs Barzanî
| KDP.info


Parlemanter: Jiyan Tahir Zêwey

Ji rewişt û tîtalên herciwan ên ku hinek ji rêberên miletan pê dibin hêma û sembol û mînakên serkirdeyên xuştevî û serkeftî di nava miletê xwe de, dilsozî, paqijî û xemxwarina wan e li himberî miletê xwe. Mînakeke herî serkeftî ji bo vê yekê Kak Idrîs Barzanî bû ku xwedî rewişteke bilind û kesayetiyeke dilsoz bû û hertim alîkar û piştgirê xelkê xwe bû, nexasim ji bo şoreşgêr û xebatkar û koçberan, ku ti carî kêmasî nedikir. Ez dixwazim wek mînak vê bîrhatina taybet a malbata xwe bêjim:

- Em wek bi hezaran malbatên Kurd piştî şikestina sala 1975ê koçberî Îranê bûn û li bajarê Tebrîzê bicîh bûn. Şoreşgêr û xwedî bawerî bo rêbaza pîroz di destpêka koçberiyê de û di germahiya bêhêvîbûnê de li hicetekê digeriyan ku dilê xwe pê xweş bikin û baweriyekê ji xwe re çêbikin ku şoreş dê berdewam be. Rojnameyeke Îranî di wan rojan de gotarek li ser bizava Kurdî û Barzaniyê nemir ligel wêneyekî wî belav kiribû. Bavê min (Tahir Zêwey) û komek Kurdên ku koçber bibûn li Tebrîzê li cihekî kom bibûn û tevî ku nizanîbûn wê rojnameyê bi çi şêweyî behsa şoreşê û Barzaniyê nemir kiriye, lê dîsa jî bi dîtina wêneyê bavê ruhî yê neteweya Kurdî gelekî dilxweş bibûn û bi hêvî û omêd digotin rêbaza wî dê berdewam be.

Lê mixabin her wek çawa caş û xwefiroş di dîroka Kurdan e egerên sereke yên şikestin û bêhêvîbûna gelê me û serkeftina dijmin bûne, di wê rojê de jî Kurdek di nava wê komê de hebû ku beriya sala 1975ê çûbû Îranê û baş zimanê Farisî hîn bibû. Wî li şûna ku ji bo hevalên xwe behs bike ka di rojnameyê de çi li ser şoreşê û Barzaniyê nemir hatiye gotin, sivkatî bi kêfxweşiya bavê min û hevalê wî kiriye û gotiye: “Vêca çi ye, her kesek pereyan bide rojnameyê dê wêneyê wî belav bike. Barzanî û şoreşa wî jî bi tenê bûn sedema malwêranî û koçberiya we. Keyfa xwe neynin. Çi şoreş nema..”

Vê gotina wî zilamî di nava koma hevalên bavê min de, ku piraniya wan pêşmergeyên Şoreşa Îlonê û mirîdê rêbaza Barzanî bûn, hêrseke mezin li cem bavê min çêkir û di cih de lê da û ew birîndar kir. Rabû wî zilamî çû li cem Hikûmeta Îranê gilî kir û ji wan re got, Tahir Zêwey sîxwirê Amerîka ye û ji ber ku min bi xerabî behsa Amerîka kir, li min da û ez birîndar kirim.

Lewma Hikûmeta Îranê, bê ku xeberekê bide me, bavê min girtibû û dayika min hizir dikir ku ew bi şev li mala hevalekî maye û nizanîbû çi bi serê wî hatiye. Hevalên rehmetiyê bavê min bê ku ji dayika min re bêjin, bilez xwe gihandibûn rehmetî Kak Idrîs û behsa mesela bavê min jê re kiribûn. Piştî 2 rojan bavê min hat berdan û vegeriya malê. Dayka min digot ew gelekî westiya bû û gelekî hatibû eşkencekirin û serçav û gelek cihên laşê wî birîndar bûn. Dayka min nizanîbû mesele çi ye heya ku hevalên wî hatin serdana wî û silavên rehmetî Kak Idrîs gihand wî û diyariya Kak Idrîs pêşkêşî bavê min kirin. Hingî dayka min nas kir ku hevjînê wê bi giliyê xwefiroşan û ji bo tawanek nekirî hatibû girtin û hewl û bizavên Kak Idrîsê Canemerg di 48 saetan de hatibû azadkirin.

Kak Idrîs rêberek û şagirtekî rêbaza Barzanî ya pîroz bû, herwek cenabê lêvegera Kurdan Serok Mesûd Barzanî jî di yadaşta xwe de bi vî awayî behsa wî dike û dibêje: “Ew xemxwirê hejaran û lêqewmiyan bû û mînak û sembola rewişt bilindî bû û mînaka dilsozî û paqijî û rastiyê bû.”

Hezar silav li giyanî paqij ê Kak Idrîsê herdem sax û li giyanê hemû şehîdên riya azadiyê û serkarwanê wan Barzaniyê nemir bin. Giyanê wan şad, gorên wan pirnûr û rêbaza wan berdewam be.

 




Nûçeyên din

ştevaniya parastina asayîş û seqamgîriya Kurdistanê dikin

THURSDAY, 02 FEBRUARY 2023 15:02:01

Hewlêr-KDP.info- Serokwezîrê Herêma Kurdistanê Mesrûr Barzanî îro ligel Balyozê Brîtanya yê li Iraqê Mark Bryson-Richardson civiya û bi hev re çareserkirina kêşeyên navbera Herêma Kurdistanê û Hikûmeta Federal a Iraqê gotûbêj kirin.

 
Serok Barzanî bo Balyozê Brîtanya: Berjewendiya gelê Kurdistanê di ser hemû berjewendiyeke din re ye

THURSDAY, 02 FEBRUARY 2023 15:02:07

Selaheddîn-KDP.info- Serok Mesûd Barzanî îro Pêncşema 02.02.2023 li Selaheddîn pêşwazî li Mike Bryson Richardson Balyozê Brîtanya li Iraqê kir.

 
Nêçîrvan Barzanî pêşwazî li Konsulê Giştî yê Amerîkayê kir

WEDNESDAY, 01 FEBRUARY 2023 16:02:19

Hewlêr-KDP.info- Nêçîrvan Barzanî Serokê Herêma Kurdistanê, roja çarşemê 01.02.2023 ê li bajarê Hewlêrê, pêşwaziya birêz Irvin Hicks Jr Konsulê Giştî yê Amerîkayê yê Herêma Kurdistanê kir.

 
Nêçîrvan Barzanî û Balyozê Brîtanyayê civiyan

WEDNESDAY, 01 FEBRUARY 2023 16:02:44

Hewlêr-KDP.info- Nêçîrvan Barzanî Serokê Herêma Kurdistanê, roja çarşemê 01.02.2023 li bajarê Hewlêrê, digel birêz Mark Bryson Richardson Balyozê Brîtanya yê Iraqê civiya.

 
Mesrûr Barzanî taceke gulan li ser monomênta şehîdên 1ê Sibatê danî

WEDNESDAY, 01 FEBRUARY 2023 12:02:06

Hewlêr-KDP.info- Serokwezîr Mesrûr Barzanî îro çarşemê 01.02.2023an li bajarê Hewlêrê di merasîma yadkirina şehîdên 1ê Sibatê de taceke gulan li ser monomênta şehîdên 1ê Sibatê danî.

 


 
© 2023 Kurdistan Democratic Party, KDP

Contact