Kurdî  ■  كوردی  ■  عربي
THU, 30 MAR 2023 05:36 Erbil, GMT +3
Partiya Dîmukrat a Kurdistanê
Azadî  .  Dîmukrasî  .  Dadperwerî
 

Mesrûr Barzanî: Armanca me bihêztirkirina pêgeha jinan e di nava hikûmetê de
| KDP.info


Hewlêr-KDP.info- Serokwezîrê Herêma Kurdistanê Mesrûr Barzanî li Hewlêrê di merasîma bîranîna 8ê Adarê, Roja Cîhanî ya Jinan de gotarek pêşkêş kir û ragihand, “em piştgiriya xwe ya bênavber ji bo mafên jinan û rola wan a aktîf di hemû warên jiyanê û civakê de, bi taybetî di saziyên hikûmetê de dubare dikin.”

Gotara Serokwezîr Mesrûr Barzanî:

“Bi boneya Roja Cîhanî ya Jinan, germtirîn pîrozbahiyên xwe pêşkêşî jinên Kurdistan, Iraq û cîhanê dikim. Hêvîdar im jin hertim di jiyana xwe de serkeftî bin û mafên wan bên parastin û ji her stem û çewisandinê rizgar bibin.

Destxweşiyê li Encûmena Bilind a Jin û Geşepêdanê û Desteya Yeksaniya Zayendî û Desteya Jinê ya Netewên Yekgirtî (UN Women) dikim, ji bo organîzekirina vê boneyê û îmzekirina yadeşta hevtêgihîştinê ji bo xizmeta pirsgirên bi jinan pêwendîdar in.

Bi vê boneyê em piştgiriya xwe ya neguhêr ji bo mafên jinan û rola wan a aktîf di hemû warên jiyanê û civakê de, bi taybetî di saziyên hikûmetê de dubare dikin.

Jinan di dirêjahiya dîroka gelê Kurdistanê de, roleke wan a girîng di nava civaka me de hebûye. Her tim alîkarî û beşdarî qonaxên dijwar ên têkoşîna Kurdistanê bûne û xwedî dîrokeke tijî serwerî ne. Piştî serhildan û avakirina Hikûmeta Herêma Kurdistanê, rola jina Kurdistanê di hemû warên hikumraniyê de diyar e. Em ê kar jî bikin ku zêdetir pêgeha jinan di hikûmetê de li gorî şiyan û karînên wan bihêztir bikin û hemû şêweyên biçûkxistina rola jinan di rêveberiyê de ji holê rakin.

Ez hêvî dikim ku îmzekirina vê hevtêgihîştinê bibe alîkar di warê statîstîkên ku dê bêne berhevkirin û peyda kirin, ji bo destnîşankirina pirsgirêk û astengiyên li pêşiya jinan û rakirina hemû binpêkirinên mafên jinan û astengiyên li pêşiya wekheviya zayendî.

Em wek Hikûmeta Herêma Kurdistanê li dijî hemû cure binpêkirinên mafên mirovan û hemû cureyên tundiyê ne, bi taybetî tundî, kuştin, îşkencekirina jinan û binpêkirina mafên wan. Lê mixabin civaka Kurdistanê jî weke gelek civakên din ên cîhanê ji ber vê êşê dinale. Ev tundûtûjî ji bo me nayê qebûlkirin û em ê bi awayekî giştî di rûbirûbûna vê diyardeyê de berdewam bin.

Rûbirûbûna tundiyê û xebat ji bo pêşxistina çanda wekheviya zayendî erkekî hevpar ê me hemûyan e û divê civak bi giştî, hikûmet, rêxistinên jinan, civaka sivîl, mamosteyên olî, dibistan, zanîngeh û navendên rewşenbîrî bi hev re kar li ser hişyarkirina tak û malbatan bikin û karê cidî ji bo jinavbirina tundiyê, pêşxistina çanda wekhevî, pêkvejiyanê û hevdu qebûlkirinê bikin.

Baweriya Hikûmeta Herêma Kurdistanê a temam bi stratejiya bihêzkirina pêgeha jinan heye û li ser wê yekê kar dike. Divê jin û mêr ji derfetên li ber destên wan in, wekhev sûd werbigirin û her wiha ew ê ji erk û mafên xwe yên wekhev jî sûd werbigirin.

Ez careke din pîrozbahiyê li we dikim û hêviya serkeftinê û jiyaneke xweş û rehet ji we re dixwazim.”

 




Nûçeyên din

Serokwezîr Mesrûr Barzanî nameyek ji Wezîra Derve ya Almanyayê wergirt

TUESDAY, 28 MARCH 2023 22:03:48

Hewlêr-KDP.info- Wezîra Derve ya Almanyayê Annalena Bearbock nameyek ji Serokwezîrê Herêma Kurdistanê re şand û amaje bi serdana xwe ya dawî ya Herêma Kurdistanê da.

 
Nêçîrvan Barzanî nameyek ji Wezîrê Berevaniyê yê Amerîkayê wergirt

THURSDAY, 23 MARCH 2023 13:03:28

Birêz Nêçîrvan Barzanî Serokê Herêma Kurdistanê nameyek ji birêz Lloyd Austin Wezîrê Berevaniyê yê Amerîkayê wergirt ku têda ji bo wê pêşwaziya germa di dema serdana wî ya 7 vê mehê ya bo Hewlêrê lê hatiye kirin, spasiya Serok Nêçîrvan Barzanî kir.

 
Baregeha Barzanî: Em bi tundî wê tawana hovane ya ku li Efrînê çêbûye şermezar dikin

TUESDAY, 21 MARCH 2023 23:03:01

Hewlêr-KDP.info- Baregeha Barzanî di daxuyaniyekê de bi tundî komkujiya 4 welatiyên Kurd li bajarokê Cindirêsê yê li herêma Efrînê şermezar kir.

 
Serokatiya Herêma Kurdistanê tawana li Efrînê şermezar kir

TUESDAY, 21 MARCH 2023 23:03:29

Hewlêr-KDP.info- Serokatiya Herêma Kurdistanê di daxuyaiyekê de tawana Cindirêsa Rojavayê Kurdistanê şermezar dike.

 
Mesrûr Barzanî: Em şehîdkirina Kurdên Efrînê bi awayekî herî tund şermezar dikin

TUESDAY, 21 MARCH 2023 23:03:56

Hewlêr-KDP.info- Serokwezîrê Herêma Kurdistanê Mesrûr Barzanî derbarê êrîşa ser Kurdan li Efrînê got, "Em şehîdkirina welatiyên li Cindrêsê bi awayekî herî tund şermezar dikin."

 


 
© 2023 Kurdistan Democratic Party, KDP

Contact